ବରଗଡ଼,୨୮।୧୧(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ଶୁକ୍ରବାରରୁ ଧାନ ସଂଗ୍ରହ ପ୍ରକ୍ରିୟା ହେବ। ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି। ଜିଲାରେ ପ୍ରଥମଥର ପାଇଁ ଧାନ ସଂଗ୍ରହ ପ୍ରକ୍ରିୟା ଏଭଳି ବିଳମ୍ବ ହୋଇଛି। ଏହାସତ୍ତ୍ୱେ ଏପର୍ଯ୍ୟନ୍ତ ଚାଷୀମାନଙ୍କୁ ଧାନବିକ୍ରି ଟୋକନ ମିଳିପାରି ନାହିଁ। ଏଥିରୁ ଧାନ ସଂଗ୍ରହ ପ୍ରକ୍ରିୟାରେ ସରକାରୀ କଳର ଅବହେଳା ଏବଂ ଅପାରଗତା ପଦାରେ ପଡ଼ିଯାଇଛି। ଏହାକୁ ନେଇ ଜିଲାରେ ଚାଷୀ ଅସନ୍ତୋଷ ପୁଣି ତେଜି ଉଠିଛି। ଗୁରୁବାର ସଂଯୁକ୍ତ କୃଷକ ସଙ୍ଗଠନ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ସ୍ମାରକପତ୍ର ଗ୍ରହଣ କରିଥିଲେ। ଧାନବିକ୍ରି ପଞ୍ଜୀକରଣରୁ ବାଦ୍ ପଡ଼ିଥିବା ଚାଷୀଙ୍କୁ ତୁରନ୍ତ ପଞ୍ଜୀକୃତ ସହିତ ଧାନକ୍ରୟ ବ୍ୟବସ୍ଥା କାର୍ଯ୍ୟକାରୀ କରା ନ ଗଲେ କୌଣସି ମୁହୂର୍ତ୍ତରେ ବଡ଼ ଧରଣର ଆନ୍ଦୋଳନକୁ ଓହ୍ଲାଇବ ବୋଲି ସଂଯୁକ୍ତ କୃଷକ ସଂଗଠନ ଚେତାବନୀ ଦେଇଛି।
ସ୍ମାରକପତ୍ରରେ ଉଲ୍ଲେଖ ରହିଛି, ରାଜ୍ୟରେ ୨୦୦୩ରୁ ବିକେନ୍ଦ୍ରୀତ ଧାନ ସଂଗ୍ରହ ନୀତି କାର୍ଯ୍ୟକାରୀ ହେଉଛି। ଏହି ନୀତି, ନିୟମ ବଳରେ ସରକାର ଧାନ ସଂଗ୍ରହରେ ସ୍ବଚ୍ଛତା ଆଣିବା ପାଇଁ ମଣ୍ଡି, ଧାନକ୍ରୟ ସଂସ୍ଥା ଆଦି ବ୍ୟବସ୍ଥା କରିଛନ୍ତି। ମାତ୍ର ତାହା ଧର୍ମକୁ ଆଖିଠାର ଭଳି ହୋଇପଡ଼ିଛି। ଅପରପକ୍ଷେ ତ୍ରୁଟିପୂର୍ଣ୍ଣନୀତି ଯୋଗୁ ପ୍ରକୃତ ଚାଷୀ ଧାନବିକ୍ରି ପଞ୍ଜୀକରଣରୁ ବାଦ୍ ପଡୁଛନ୍ତି। ସେହିପରି ସରକାରଙ୍କ ଧାନ ସଂଗ୍ରହ ନୀତି ଅନୁଯାୟୀ, ନଭେମ୍ବର ମାସ ୧ରୁ ମାର୍ଚ୍ଚ ମାସ ୩୧ ପର୍ଯ୍ୟନ୍ତ ଖରିଫ ଧାନ ସଂଗ୍ରହ ପ୍ରକ୍ରିୟା ଚାଲିବା କଥା, ହେଲେ ତାକୁ କାର୍ଯ୍ୟକାରୀ କରା ନ ଯାଇ ଜାଣିଶୁଣି ବିଳମ୍ବ କରାଯାଉଛି ବୋଲି ସଂଯୁକ୍ତ କୃଷକ ସଂଗଠନ ଅଭିଯୋଗ କରିଛି। କେବଳ ସେତିକି ନୁହେଁ, ରାସାୟନିକ ସାର, ଉନ୍ନତମାନର ବିହନ ଏବଂ ଆଧୁନିକ ଜ୍ଞାନ କୌଶଳ ଯୋଗୁ ଜିଲାରେ ଧାନ ଉତ୍ପାଦନ ଦିନକୁ ଦିନ ବଢ଼ି ଚାଲିଛି। ମାତ୍ର ଧାନ ସଂଗ୍ରହ ପ୍ରକ୍ରିୟାରେ ଜଳସେଚିତ ଅଞ୍ଚଳରେ ଏକର ପ୍ରତି ୧୯କୁଇଣ୍ଟାଲ ଏବଂ ଅଣଜଳସେଚିତ ଅଞ୍ଚଳରେ ଏକର ପ୍ରତି ୧୩କୁଇଣ୍ଟାଲ ଧାନକିଣାରେ ସୀମିତ ରହିଛି। ଫଳରେ ଚାଷୀମାନେ ସେମାନଙ୍କ ବଳକା ଧାନ ବିକ୍ରି କରିବାରୁ ବଞ୍ଚିତ ହେଉଛନ୍ତି।
ତେବେ ଗୋଟିଏ ପଟେ ମଣ୍ଡି ଖୋଲିବା ବିଳମ୍ବ ଏବଂ ଅନ୍ୟପଟେ ଚାଷୀଙ୍କୁ ଧାନବିକ୍ରି ଟୋକନ ନ ମିଳିବାରୁ ଆରମ୍ଭରୁ ଅଡ଼ୁଆ ସ୍ଥିତି ଉପୁଜିଛି। ଚାଷୀମାନେ ବାଧ୍ୟ ହୋଇ ଅତାବିରା, ଗୋଡ଼ଭଗା, କଲାପାଣି ଭଳି କେତେକ ମଣ୍ଡିରେ ହଜାର ହଜାର ବସ୍ତା ଧାନ ବିକ୍ରି ପାଇଁ ପୂରାଇ ସାରିଲେଣି। କିନ୍ତୁ ଟୋକନ ମିଳି ନ ଥିବାରୁ ସେହି ଧାନ ମଣ୍ଡିରୁ କେବେ ଉଠିବ, ତାକୁ ନେଇ ମଧ୍ୟ ଅନିଶ୍ଚିତତା ଦେଖାଯାଇଛି। ସେହିପରି ବାରମ୍ବାର ଦାବି ସତ୍ତ୍ୱେ ପଞ୍ଜୀକରଣରୁ ବାଦ୍ ପଡ଼ିଥିବା ଚାଷୀମାନେ ଏପର୍ଯ୍ୟନ୍ତ ଧାନବିକ୍ରି ପାଇଁ ପଞ୍ଜୀକୃତ ହୋଇ ପାରି ନାହାନ୍ତି। ଅପରପକ୍ଷେ ବର୍ଷାଭୟ ଚାଷୀଙ୍କ ଚିନ୍ତାକୁ ବଢ଼ାଇ ଦେଇଛି। କ୍ଷେତ, ଖଳାର ଖୋଲା ଆକାଶତଳେ ଅମଳ ଧାନ ପଡ଼ି ରହିଛି। ଫଳରେ ବର୍ଷା ହେଲେ ସେହି ଧାନ ନଷ୍ଟ ହେବାର ଆଶଙ୍କା ଦେଖାଯାଇଛି। ଏଭଳି ସ୍ଥିତିରେ ଆରମ୍ଭରୁ ଧାନ ସଂଗ୍ରହ ପ୍ରକ୍ରିୟାକୁ ତ୍ୱରାନ୍ବିତ କରା ନ ଗଲେ ଚାଷୀଙ୍କ ବ୍ୟାପକ କ୍ଷତି ହେବାର ସମ୍ଭାବନା ରହିଛି। ଫଳରେ ଧାନକିଣା ପାଇଁ ତ୍ୱରିତ୍ ପଦକ୍ଷେପ ନେବାକୁ ଦାବି ହୋଇଛି। ସଂଯୁକ୍ତ କୃଷକ ସଂଗଠନର ଉପଦେଷ୍ଟା ଉପତ୍ନ୍ନ କୁମାର ଭୋଇ, ରମେଶ ମହାପାତ୍ରଙ୍କ ସମେତ ସୁଦାମ ପାତ୍ର, ସୁରେଶ ନେକାଣ୍ଟି, ଶଙ୍କର ଖମାରୀ, କାରଣ ସାହୁ, ଅଭିମନ୍ୟୁ ପ୍ରଧାନ ପ୍ରମୁଖ ସ୍ମାରକପତ୍ର ପ୍ରଦାନବେଳେ ଉପସ୍ଥିତ ଥିଲେ।
Dharitri – Odisha’s No.1 Odia Daily
