ଭୁବନେଶ୍ୱର,୨୪ା୧୧: ଜଳବାୟୁ ପରିବର୍ତ୍ତନର ମୁକାବିଲା କ୍ଷେତ୍ରରେ ଯୁବପିଢ଼ିଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେଣୁ ସେମାନେ କିଭଳି ସଚେତନ ହେବା ସହ ଅନ୍ୟମାନଙ୍କୁ ସଚେତନ କରି ଏହି ଅଭିଯାନରେ ସାମିଲ କରିପାରିବେ ସେ ସଂକ୍ରାନ୍ତରେ ‘ଧରିତ୍ରୀ’ ପକ୍ଷରୁ ପ୍ରତିବର୍ଷ ‘ୟୁଥ କନ୍କ୍ଲେଭ୍ ବା ଯୁବ ସମ୍ମିଳନୀ’ ସ୍ବସ୍ତି ପ୍ରିମିୟମ୍ରେ ଅନୁଷ୍ଠିତ ହୋଇଛି। ଚଳିତବର୍ଷ ଏହି କାର୍ଯ୍ୟକ୍ରମ ୫ମ ସଂସ୍କରଣରେ ପହଞ୍ଚିଥିବାବେଳେ ସୋମବାର ପ୍ରସଙ୍ଗ ରହିଛି ‘କ୍ଲାଇମେଟ୍ ଚେଞ୍ଜ: ଫାଇଣ୍ଡିଂ ସଲ୍ୟୁଶନ୍ସ’।
ଧରିତ୍ରୀ ଏବଂ ଓଡ଼ିଶା ପୋଷ୍ଟର ସିଇଓ ଆଦ୍ୟାଶା ସତପଥୀ ଧରିତ୍ରୀ ୟୁଥ କନ୍କ୍ଲେଭ୍କୁ ଉଦ୍ଘାଟନ କରି ଏହାକୁ ତୃଣମୂଳ ସ୍ତରରେ ପରିବେଶବିତ୍ଙ୍କ ପାଇଁ ଏକ ପ୍ଲାଟଫର୍ମ ବୋଲି କହିଛନ୍ତି। ସେ ଯୁବ ପରିବେଶବିତ୍ମାନଙ୍କୁ ସମର୍ଥନ କରିବା ସହ ‘ଧରିତ୍ରୀ କ୍ଲାଇମେଟ୍ ଗ୍ରାଣ୍ଟ’ର ଭୂମିକା ଉପରେ ଆଲୋକପାତ କରିଛନ୍ତି।
ସେହିପରି ଧରିତ୍ରୀ ଏବଂ ଓଡ଼ିଶା ପୋଷ୍ଟର ସମ୍ପାଦକ ତଥାଗତ ସତପଥୀ ଜଳବାୟୁ ପରିବର୍ତ୍ତନ ସମ୍ପର୍କରେ ଆଲୋଚନାକୁ ପୂର୍ବ ଏବଂ ଉତ୍ତର-ପୂର୍ବ ଭାରତର ବ୍ରିଟିଶ ଡେପୁଟି ହାଇକମିଶନର ଡକ୍ଟର ଆଣ୍ଡ୍ର୍ୟୁ ଫ୍ଲେମିଙ୍ଗ, ଡାଉନ ଟୁ ଆର୍ଥ’ର ଏଡିଟର ସୁନୀତା ନାରାୟଣ, ବନ୍ୟପ୍ରାଣୀ ଜୀବବିଜ୍ଞାନୀ ପୂର୍ଣ୍ଣିମା ଦେବୀ ବର୍ମନଙ୍କୁ ସ୍ବାଗତ କରିଛନ୍ତି।
ସ୍ବତନ୍ତ୍ର ଅତିଥି ଭାବରେ ପୂର୍ବ ଏବଂ ଉତ୍ତର-ପୂର୍ବ ଭାରତ ପାଇଁ ବ୍ରିଟିଶ ଡେପୁଟି ହାଇକମିଶନର ଡକ୍ଟର ଆଣ୍ଡ୍ର୍ୟୁ ଫ୍ଲେମିଙ୍ଗ୍ ଆଲୋକପାତ କରି କହିଛନ୍ତି ଯେ, ଆଜିର ଯୁବପିଢ଼ି ମାନବ ଇତିହାସର ସବୁଠାରୁ ପ୍ରଭାବଶାଳୀ।
ସେ କହିଛନ୍ତି, ଯୁବପିଢ଼ି ଜଳବାୟୁ ପରିବର୍ତ୍ତନର ଚ୍ୟାଲେଞ୍ଜ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସମସ୍ୟାର ଉତ୍ତରାଧିକାରୀ ହୋଇଥିଲେ ମଧ୍ୟ ଯୁବପିଢ଼ି ନିରନ୍ତର ସ୍ପଷ୍ଟତା, ଉଦ୍ଦେଶ୍ୟ ଏବଂ କାର୍ଯ୍ୟ ପ୍ରତି ଏକ ଦୃଢ଼ ପ୍ରତିବଦ୍ଧତା ପ୍ରଦର୍ଶନ କରନ୍ତି। ଯାହା ଭବିଷ୍ୟତ ପାଇଁ ଆଶା ପ୍ରଦାନ କରେ।
ସେ ଆହୁରି ମଧ୍ୟ କହିଛନ୍ତି ଯେ, ଓଡ଼ିଶା ଜଳବାୟୁ ପରିବର୍ତ୍ତନର ପ୍ରଭାବ ଅଧିକାଂଶ ଅଞ୍ଚଳ ତୁଳନାରେ ଅଧିକ ତୀବ୍ର ଭାବରେ ଅନୁଭବ କରୁଛି କିନ୍ତୁ ଏହାର ସ୍ଥିରତା ଏବଂ ଅନୁକୂଳନ କ୍ଷମତା ପାଇଁ ବିଶ୍ୱ ସ୍ତରରେ ମଧ୍ୟ ସ୍ବୀକୃତି ପାଇଛି। ଫ୍ଲେମଙ୍ଗ୍ ଜଳବାୟୁ ପରିବର୍ତ୍ତନ ବିରୋଧରେ ଲଢ଼ିବା ପାଇଁ ଧରିତ୍ରୀ ଏବଂ ଓଡ଼ିଶା ପୋଷ୍ଟର ପ୍ରୟାସକୁ ମଧ୍ୟ ପ୍ରଶଂସା କରିଛନ୍ତି।
ମୁଖ୍ୟ ଅତିଥି ଡକ୍ଟର ପୂର୍ଣ୍ଣିମା ଦେବୀ ବର୍ମନ ଆସାମର ଜଣେ ଅସାଧାରଣ ଜୀବବିଜ୍ଞାନୀ। ସେ କହିଛନ୍ତି, ‘ହାରଗିଲା’ (ବୃହତ୍ତର ସାରସ) ଯାହାକୁ ଥରେ ଏକ ଅଶୁଭ ଲକ୍ଷଣ ଭାବରେ ବିବେଚନା କରାଯାଉଥିଲା, ତାହା କଲ୍ଚରର ଏକ ଶକ୍ତିଶାଳୀ ପ୍ରତୀକ ପାଲଟିଛି। ତାଙ୍କର ୨୦୦୦୦ ମହିଳାଙ୍କ ‘ହାରଗିଲା ଆର୍ମି’ ବସା ବାନ୍ଧିବା ଗଛଗୁଡ଼ିକୁ ସୁରକ୍ଷା ଦିଏ, ଆର୍ଦ୍ରଭୂମି ବାସସ୍ଥାନକୁ ପୁନରୁଦ୍ଧାର କରେ ଏବଂ ସଂରକ୍ଷଣକୁ ସାମୁହିକ ଜୀବନରେ ପରିଣତ କରେ ବୋଲି କହିଛନ୍ତି। ।
ଧରିତ୍ରୀ ୟୁଥ କନ୍କ୍ଲେଭ୍ରେ ୨୦୨୫ରେ ରାଜ୍ୟର ବିଭିନ୍ନ ଅଞ୍ଚଳରୁ ଯୁବ ପରିବେଶବିତ୍ମାନେ ଯୋଗଦେଇଛନ୍ତି।
