ଦାରିଙ୍ଗବାଡି, ୨୯।୧୦ (ଅରୁଣ ସାହୁ): ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ‘ମୋନ୍ଥା’ ଦୁର୍ବଳ ହୋଇଛି। ବୁଧବାର ଭୋର ପର୍ଯ୍ୟନ୍ତ ବର୍ଷାର ପ୍ରଭାବ ରହିଥିବାବେଳେ ସକାଳ ୧୦ଟା ପରେ ସୂର୍ଯ୍ୟଙ୍କୁ ଦେଖିବାକୁ ମିଳିଛି। ଖରା ଆଉ କେତେବେକେ ପାଗ ମେଘୁଆ ହେଉଥିବାବେଳେ ପ୍ରାୟ ପାଗ ଶୁଖିଲା ହେଉଛି। ଧୀରେ ଧୀରେ ବଜାରରେ ଭିଡ଼ ଲାଗିବା ଆରମ୍ଭ ହୋଇଛି। ଦୁର୍ଗମ ଅଞ୍ଚଳରୁ ଲୋକଙ୍କ ଦାରିଙ୍ଗବାଡି ସମେତ ଆଖପାଖ ସିମନବାଡି, ବ୍ରାହ୍ମଣୀଗାଁ, ବୁଡ଼ାଗୁଡା ଆଦି ବଜାରକୁ ଲୋକଙ୍କ ଆଗମନ ହୋଇଛି। ତେବେ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା ରାଜ୍ୟ ସରକାରଙ୍କ ପକ୍ଷରୁ ଏନଡିଆରଏଫ ଟିମ ଦାରିଙ୍ଗବାଡିରେ ସୋମବାରଠାରୁ ଡେରା ପକାଇଛନ୍ତି।
ଏନଡିଆରଏଫର ଅଧିକାରୀ ଅଭିଷେକ ମିଶ୍ରଙ୍କ ନେତୃତ୍ୱରେ ଟିମ ଦାରିଙ୍ଗବାଡି ସରକାରୀ ଆଇଟିଆଇ କେନ୍ଦ୍ରରେ ରହି ମକଡ୍ରିଲ କରିବା ସହ ବିଡ଼ିଓ ପ୍ରୀତିରଞ୍ଜନ ରଥଙ୍କ ନେତୃତ୍ୱରେ ଉକ୍ତ ଟିମ ସଜାଗ ରହିଥିଲେ। ସେହିପରି ଜାଗୃତି ସ୍ବେଚ୍ଛାସେବୀ ଅନୁଷ୍ଠାନ ରାଜ୍ୟ ସରକାରଙ୍କ ସହାଭାଗିତାରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ରହିଥିବା ମା’ଗୃହକୁ ୧୧ ଜଣ ଆସନ୍ନ ପ୍ରସବାଙ୍କୁ ଅଣାଯାଇ ସେମାନଙ୍କ ଚିକିତ୍ସା ଓ ଆବଶ୍ୟକ ସେବା ଯୋଗାଇଦିଆଯାଇଥିଲା। ପୂର୍ବରୁ ଏହି ମା’ଗୃହରେ ୪ ଜଣ ଆସନ୍ନ ପ୍ରସବା ରହିଥିଲେ। ସମସ୍ତେ ସୁରକ୍ଷିତ ଓ ସୁସ୍ଥ ରହିଥିବା ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟ କହିଛନ୍ତି, ଅତି ଦୁର୍ଗମ ଅଞ୍ଚଳରୁ ସେମାନଙ୍କୁ ସୁରକ୍ଷିତ ଭାବେ ଅଣାଯାଇଥିଲା ବୋଲି ସେ କହିଛନ୍ତି।
ତେବେ ଅଞ୍ଚଳରେ ଏହି ବାତ୍ୟା ସମୟରେ ବିଦ୍ୟୁତ ଅଚଳ ଦେଖାଯାଇଥିବାବେଳେ ସିମନବାଡି ଫିଡ଼ରରେ ୨୬ ଘଣ୍ଟା ବିଦ୍ୟୁତ ଅଚଳ ହୋଇଥିଲା ଏଥିସହ ବିଦ୍ୟୁତ ଅଚଳ ଯୋଗୁ ମୋବାଇଲ ସେବାକୁ ମଧ୍ୟ ବନ୍ଦ କରିଦିଆଯାଇଥିଲା ଏହି ୨ଟି ବିଭାଗର ଅବହେଳା ପାଇଁ ହଜାର ହଜାର ଉପଭୋକ୍ତା ହଇରାଣ ହୋଇଥିଲେ। ପରେ ଏନେଇ କନ୍ଧମାଳ ଜିଲାପାଳ ବେଦଭୂଷଣଙ୍କୁ ଅବଗତ କରାଯିବା ପରେ ସେ ପୁନଃସ୍ଥାପନ ପାଇଁ ପଦକ୍ଷେପ ନେବାକୁ ପ୍ରତିଶ୍ରୁତି ଦେବା ସହ ମଙ୍ଗଳବାର ବିଳମ୍ବିତ ରାତିରେ ବିଏସଏନଏଲ ଏବଂ ଜିଓ ନେଟୱାର୍କ ସିମନବାଡି ଅଞ୍ଚଳରେ ସ୍ବାଭାବିକ ହୋଇଥିଲା। ତେବେ ଏହି ବାତ୍ୟା ସମୟରେ ଦାରିଙ୍ଗବାଡି ଅଞ୍ଚଳରେ ସର୍ବାଧିକ ୫୧ ମିମି ବର୍ଷା ରେକର୍ଡ କରାଯାଇଥିଲା ଏବଂ କୌଣସି ସ୍ଥାନରେ ଏହି ବାତ୍ୟାରେ କ୍ଷୟକ୍ଷତି ହୋଇ ନ ଥିବା ବିଡ଼ିଓ ପ୍ରୀତିରଞ୍ଜନ ରଥ କହିଛନ୍ତି।
Dharitri – Odisha’s No.1 Odia Daily
