ଦାରିଙ୍ଗବାଡ଼ି,୨୪ା୧୦(ଅରୁଣ ସାହୁ): ଦାରିଙ୍ଗବାଡ଼ି ବ୍ଲକ୍ ସଭାଗୃହଠାରେ ଶୁକ୍ରବାର ପଞ୍ଚାୟତ ସମିତି ବୈଠକ ଅନୁଷ୍ଠିତ ହୋଇଛି। ଏଥିରେ ବ୍ଲକ୍ ଅଧକ୍ଷ ସୁଶାନ୍ତ ପ୍ରଧାନ ଅଧ୍ୟକ୍ଷତା କରିଥିବା ବେଳେ ବିଡ଼ିଓ ପ୍ରୀତି ରଞ୍ଜନ ରଥ ପରିଚାଳନା କରିଥିଲେ। ବୈଠକରେ ସ୍ବାସ୍ଥ୍ୟ ବିଭାଗ ବିଷୟରେ ଆଲୋଚନା ହୋଇଥିଲା। ଆୟୁଷ୍ମାନ କାର୍ଡ ବଣ୍ଟନରେ ବିଳମ୍ବ ହୋଇଥିବା ଯୋଗୁ ଜନ ପ୍ରତିନିଧିମାନେ ଅଭିଯୋଗ କରିଥିଲେ। ଫଳରେ ଗରିବ ଶ୍ରେଣୀର ଲୋକେ ସ୍ବାସ୍ଥ୍ୟ ଖରାପ ହେଲେ ଆୟୁଷ୍ମାନ କାର୍ଡ ନ ଥିବାରୁ ମାଗଣା ଚିକିତ୍ସାରୁ ବଞ୍ଚତ୍ତ ହେଉଥିବା ଅଭଯୋଗ ହୋଇଛି। ଏହାକୁ ନେଇ ଲୋକ ପ୍ରତିନିଧିମାନେ ପ୍ରଶ୍ନ କରି ଅସନ୍ତୋଷ ବ୍ୟକ୍ତ କରିଥିଲେ। ବିପର୍ଯ୍ୟୟ ସ୍ବାସ୍ଥ୍ୟସେବା ଡାକ୍ତର ଅଭାବ ଆଦି ଅଭିଯୋଗ ହୋଇଥିଲା। ସେହିପରି ଦାରିଙ୍ଗବାଡି ବ୍ଲକ୍ରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇ ପଡ଼ିଥିବା ଅଭିଯୋଗ ହୋଇଥିବା ବେଳେ ଏକାଧିକ ବିଦ୍ୟାଳୟରେ ଶିକ୍ଷୟିତ୍ରୀଶିକ୍ଷକ ମାନେ ପାଳି କରି ସ୍କୁଲ ଆସୁଥିବା ଅଭିଯୋଗ ହୋଇଥିଲା। ସ୍ଥାୟୀ ବିଇଓ ନ ଥିବା ବେଳେ ଦାୟିତ୍ୱରେ ଥିବା ବିଇଓଙ୍କୁ କୌଣସି ପ୍ରତିନିଧି କେବେ ଦେଖି ନ ଥିବା ଓ ତାଙ୍କୁ ଜାଣି ନ ଥିବା ଓ ସେ ବିଦ୍ୟାଳୟ ପରିଦର୍ଶନ ନ କରିବା ଅନିୟମିତତା ଭାବେ ଶିକ୍ଷୟିତ୍ରୀଶିକ୍ଷକ ଡେପୁଟେଶନ କରାଇବା ଭଳି ସଙ୍ଗୀନ ଅଭିଯୋଗ ହୋଇଥିଲା। ସେହିପରି ନିର୍ଦ୍ଧିଷ୍ଟ ସ୍ବୟଂ ସହାୟକ ଗୋଷ୍ଠୀଙ୍କୁ ଛତୁଆ ପ୍ରସ୍ତୁତି ପାଇଁ ଏକାଧିକ ବର୍ଷ ହେବ ଦିଆ ଯାଉଥିବା ବେଳେ ଅନ୍ୟ ଗୋଷ୍ଠୀଙ୍କୁ ଏହା କରିବା ପାଇଁ ସୁଯୋଗ ଦିଆ ଯାଉନାହିଁ। ଫଳରେ ଉକ୍ତ ସ୍ବୟଂ ସହାୟକ ଗୋଷ୍ଠୀ ନିମ୍ନମାନର ଛତୁଆ ପ୍ରସ୍ତୁତି କରୁଥିବା ସିମନବାଡ଼ି ସମିତି ସଭ୍ୟ ସାଧୁ ନାୟକ ଅଭିଯୋଗ କରିଛନ୍ତି। ତାଜୁଙ୍ଗିଆ ଓ କାଟିଙ୍ଗିଆ ପଞ୍ଚାୟତ ଅଞ୍ଚଳରେ ଥିବା ଅଙ୍ଗନଓ୍ବାଡ଼ିରେ ପାଠପଢା ହେଉ ନାହିଁ। ଏହାସହ ଅଙ୍ଗଓ୍ବାଡି ଗୃହ ନିର୍ମାଣ ପାଇଁ କାର୍ଯ୍ୟାଦେଶ ଆସିଥିବା ବେଳେ ତାହା ନିର୍ମାଣ ହେଉ ନ ଥିବା ଅଭିଯୋଗ ହୋଇଛି। ଏଭଳି ଭାବେ ବିଭିନ୍ନ ବିଭାଗରେ ଅନେକ ଅଭିଯୋଗ ରହିଥିବା ବେଳେ ସରକାରଙ୍କ ଯେଉଁ ଯୋଜନା ସବୁ କାର୍ଯ୍ୟକାରୀ ହେଉଛି ସେ ବିଷୟରେ ଲୋକ ପ୍ରତିନିଧିମାନଙ୍କୁ ବିଭିନ୍ନ ବିଭାଗର ଅଧିକାରୀମାନେ ଅବଗତ କରାଇ ଥିଲେ। ବୈଠକରେ ଲୋକ ପ୍ରତିନିଧିମାନେ ହୋହାଲ୍ଲା କରିବା ସହ ଅସନ୍ତୋଷ ପ୍ରକାଶ କରିଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ଜିଲା ପରିଷଦ ସଭ୍ୟ ରଞ୍ଜନ ପ୍ରଧାନ, ଏମ୍ପି ପ୍ରତିନିଧି ବିଷ୍ଣୁ ଚରଣ ପ୍ରଧାନ, ଜିପିଡିଓ ସୁରେଶ ଚନ୍ଦ୍ର ପଣ୍ଡାଙ୍କ ସମେତ ୨୫ ପଞ୍ଚାୟତର ସମିତି ସଭ୍ୟ, ସରପଞ୍ଚ ଓ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
