ଇସଲାମାବାଦ,୧୯।୧୦: କିଛି ଦିନର ନିରବତା ପରେ ପୁଣି ପାକିସ୍ତାନ କ୍ରିକେଟରେ ବିବାଦ ଦେଖାଦେଇଛି। ପାକିସ୍ତାନୀ ସୈନ୍ୟର ଆକ୍ରମଣରେ ଆଫଗାନିସ୍ତାନର ୩ ଯୁବ କ୍ରିକେଟରଙ୍କ ମୃତ୍ୟୁ ଘଟଣା ଉଭୟ ଦେଶର କ୍ରିକେଟକୁ ପ୍ରଭାବିତ କରିଛି। ଆଫଗାନିସ୍ତାନ ପାକିସ୍ତାନରେ ହେବାକୁ ଥିବା ଟି୨୦ ସିରିଜ୍ରୁ ନାଁ ଫେରାଇ ନେଇଛି। ଏହି କାରଣରୁ ପାକିସ୍ତାନ କ୍ରିକେଟ ଦଳକୁ ବ୍ୟାନ କରିବା ଦାବି ଜୋର ଧରିଛି। ପାକିସ୍ତାନ କ୍ରିକେଟ ବୋର୍ଡ (ପିସିବି)ରେ ମଧ୍ୟ ଏକ ନୂଆ ଡ୍ରାମା ଆରମ୍ଭ ହୋଇଛି। ସେଇଟି ହେଲା ଅଧିନାୟକ ପଦ। ମହମ୍ମଦ ରିଜଓ୍ବାନଙ୍କ ହାତରୁ ଦିନିକିଆ ଅଧିନାୟକ ପଦ ଯିବା ନିଶ୍ଚିତ ବୋଲି ଚର୍ଚ୍ଚା ହେଉଛି।
ପାକିସ୍ତାନ ଓ ଦକ୍ଷିଣ ଆଫ୍ରିକା ମଧ୍ୟରେ କିଛି ଦିନ ମଧ୍ୟରେ ହେବାକୁ ଥିବା ଦିନିକିଆ ସିରିଜ୍ରୁ ଠିକ ପୂର୍ବରୁ କ୍ୟାପ୍ଟେନ୍ସିରେ ପରିବର୍ତ୍ତନକୁ ନେଇ ପୁନର୍ବାର ବିବାଦ ଆରମ୍ଭ ହୋଇଛି। ବିଗତ ୨-୩ ବର୍ଷ ଧରି ବିଭିନ୍ନ ଅଧିନାୟକଙ୍କ ନିଯୁକ୍ତି ଯୋଗୁ ପାକିସ୍ତାନୀ ଦଳର ଚାରିଆଡେ ଆଲୋଚନା ହେଉଛି। ଏହାସହିତ ଏବେ ଦିନିକିଆ ଦଳର ଅଧିନାୟକ ମହମ୍ମଦ ରିଜୱାନଙ୍କ କ୍ୟାପ୍ଟେନ୍ସି ବି ବିପଦରେ ପଡ଼ିଛି ଏବଂ ପାକିସ୍ତାନୀ ବୋର୍ଡର ନୂଆ ବୟାନ ନିଆଁରେ ଘିଅ ଢ଼ାଳିଛି।
ବାସ୍ତବରେ ବିଗତ କିଛି ଦିନରୁ ପାକିସ୍ତାନୀ ମିଡ଼ିଆରେ ଏଭଳି ରିପୋର୍ଟ ଚାଲୁଛି ଯେ ଦ୍ରୁତ ବୋଲର ଶାହିନ ଶାହ ଆଫ୍ରିଦି ଦିନିକିଆ ଦଳର ନୂଆ କ୍ୟାପ୍ଟେନ ହୋଇପାରନ୍ତି। ଏହି ରିପୋର୍ଟ ମଧ୍ୟରେ ପାକିସ୍ତାନୀ ବୋର୍ଡ ଶନିବାର ଏକ ବୟାନ ଜାରି କରି ଏଭଳି ଦାବିଗୁଡ଼ିକୁ ଆହୁରି ମଜବୁତ କରିଛି। ପିସିବି ଏକ ବୟାନରେ ଶାହିନ୍ଙ୍କ ନୂଆ ଅଧିନାୟକ ହେବା ରିପୋର୍ଟକୁ ଖାରଜ କରିଛି,ହେଲେ ରିଜୱାନ ହିଁ କ୍ୟାପ୍ଟେନ ରହିବେ ବୋଲି କୁହାଯାଇନାହିଁ। ପିସିବି କହିଛି ଯେ ଦକ୍ଷିଣ ଆଫ୍ରିକା ବିରୋଧରେ ଦିନିକିଆ ସିରିଜ ପାଇଁ କ୍ୟାପ୍ଟେନ୍ସିରେ କୌଣସି ନିଷ୍ପତ୍ତି ହୋଇନାହିଁ। ବୟାନରେ ସହିତ ଏହା ମଧ୍ୟ କୁହାଯାଇଛି ଯେ କୋଚ୍ ମାଇକ ହେସନ ପିସିବି ପ୍ରଧାନ ମୋହସିନ ନକଭୀଙ୍କୁ ଅନୁରୋଧ କରିଛନ୍ତି ଯେ ସିଲେକ୍ସନ କମିଟି ଓ ଆଡଭାଇଜରୀ କମିଟିର ଏକ ମିଟିଂ ହେବ, ଯେଉଁଠାରେ କ୍ୟାପ୍ଟେନ୍ସି ବିଷୟରେ ନିଷ୍ପତ୍ତି ନିଆଯାଇପାରିବ। ନକଭୀ ହେସନଙ୍କ କଥା ମାନିଛନ୍ତି ଏବଂ ୨୦ ଅକ୍ଟୋବରରେ ହେବାକୁ ଥିବା ମିଟିଂରେ ଏହାର ନିଷ୍ପତ୍ତି ହେବ।
ଏହାରୁ ସ୍ପଷ୍ଟ ଯେ ରିଜୱାନଙ୍କ କ୍ୟାପ୍ଟେନ୍ସି ସୁରକ୍ଷିତ ନାହିଁ ଏବଂ ଦକ୍ଷିଣ ଆଫ୍ରିକା ବିରୋଧ ଦିନିକିଆ ସିରିଜରେ ପାକିସ୍ତାନୀ ଦଳ ନୂଆ କ୍ୟାପ୍ଟେନଙ୍କ ନେତୃତ୍ୱରେ ଖେଳିବ। ସେମିତିରେ ଚଳିତ ବର୍ଷ ରିଜୱାନଙ୍କ କ୍ୟାପ୍ଟେନ୍ସିରେ ପାକିସ୍ତାନୀ ଦଳର ପ୍ରଦର୍ଶନ ଭଲ ନ ଥିଲା। ସେମାନେ ନିଜ ହୋମଗ୍ରାଉଣ୍ଡରେ ହୋଇଥିବା ଚାମ୍ପିୟନ୍ସ ଟ୍ରଫିର ପ୍ରଥମ ରାଉଣ୍ଡରେ ହିଁ ବାହାରି ଯାଇଥିଲେ। ଏହାପରେ ନ୍ୟୁଜିଲାଣ୍ଡ ବିରୋଧରେ ସେମାନେ ୦-୩ରେ କ୍ଲିନ ସୁଇପ୍ର ସାମ୍ନା କରିଥିଲେ, ଆଉ ୱେଷ୍ଟଇଣ୍ଡିଜ ମଧ୍ୟ ସେମାନଙ୍କୁ ଦିନିକିଆ ସିରିଜରେ ୨-୧ରେ ହରାଇଥିଲା।
