ମୋରଡ଼ା,୧୫ା୯(ସ୍ମାରକ ମାଜୀ): ପ୍ରଧାନଶିକ୍ଷୟିତ୍ରୀଙ୍କ ବଦଳି ଆଦେଶ ପ୍ରତ୍ୟାହାରକୁ ନେଇ ଅଭିଭାବକମାନେ ବିଦ୍ୟାଳୟ ଶ୍ରେଣୀ ଗୃହ ସମ୍ମୁଖରେ ସୋମବାର ଧାରଣାରେ ବସିଛନ୍ତି। ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଡାକୋଇ ସରକାରୀ ପ୍ରାଥମିକ ବିଦ୍ୟାଳୟରେ ବାଳବାଟିକାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ମୋଟ୍ ୩୮ ଜଣ ଛାତ୍ରୀଛାତ୍ର ପାଠ ପଢ଼ୁଥିବା ବେଳେ ମାଳତୀ ତ୍ରିପାଠୀ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ଭାବେ ଦାୟିତ୍ୱରେ ଅଛନ୍ତି। ସହକାରୀ ଶିକ୍ଷକ ଭାବେ ତୃପ୍ତିରେଖା ରାଉତ ଥିବାବେଳେ କଣ୍ଠାଳିଆ ସରକାରୀ ବିଦ୍ୟାଳୟର ଶିକ୍ଷକ ରାଣୀ ମୁର୍ମୁ ଡେପୁଟେଶନରେ ଆସି ଉକ୍ତ ବିଦ୍ୟାଳୟରେ ପାଠ ପଢ଼ାଉଛନ୍ତି। ପ୍ରଧାନଶିକ୍ଷୟିତ୍ରୀ ମାଳତୀ ତ୍ରିପାଠୀ ଉଲିଡିହି ସରକାରୀ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ଭାବେ କାର୍ଯ୍ୟ କରୁଥିବା ବେଳେ ୪ ବର୍ଷ ପୂର୍ବେ ସେ ଡାକୋଇ ସରକାରୀ ପ୍ରାଥମିକ ବିଦ୍ୟାଳୟକୁ ଡେପୁଟେଶନରେ ଆସି ପ୍ରଧାନଶିକ୍ଷୟିତ୍ରୀର ଦାୟିତ୍ୱ ନେଇ ପିଲାଙ୍କୁ ପାଠ ପଢ଼ାଉଛନ୍ତି । ତେବେ ମାଳତୀଙ୍କୁ ବର୍ତ୍ତମାନ ତାଙ୍କର ପୋଷ୍ଟିଂ ବିଦ୍ୟାଳୟ ଉଲିଡିହିକୁ ବଦଳି କରାଯାଇଛି, ଯାହାକୁ ନେଇ ଅଭିଭାବକମାନେ ଆଜି ଧାରଣାରେ ବସିଛନ୍ତି। ମାଳତୀଙ୍କ ବଦଳିକୁ ସ୍ଥଗିତ କରାଯାଇ ସେ ଡାକୋଇ ସରକାରୀ ପ୍ରାଥମିକ ବିଦ୍ୟାଳୟରେ ଶିକ୍ଷାଦାନ କରନ୍ତୁ ବୋଲି କହିଛନ୍ତି ବିଦ୍ୟାଳୟ ପରିଚାଳନା କମିଟି ଅଧ୍ୟକ୍ଷ କ୍ଷୀତିଶ କୁମାର ବେହେରା, ରୀତା ବେହେରା, ବାସନ୍ତୀ ହେମ୍ବ୍ରମ, ମନୋରଞ୍ଜନ ସେଠୀ। ଅଭିଭାବକମାନେ ବିଦ୍ୟାଳୟ ଶ୍ରେଣୀ ଗୃହ ଆଗରେ ବସି ରହିଥିବାରୁ ଆସିଥିବା ଛାତ୍ରୀଛାତ୍ର ବାରଣ୍ଡାରେ ବସିଥିବାର ଦେଖିବାକୁ ମିଳିଛି।
