ଦାରିଙ୍ଗବାଡି, ୨୩।୭ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିଆଙ୍ଗବାଲି ପଞ୍ଚାୟତରେ ଦୀର୍ଘ ୮ ମାସ ହେଲା ବିଏସଏନଏଲର ମୋବାଇଲ ସେବା ଅଚଳ ହୋଇପଡିଛି। ଫଳରେ ଅଞ୍ଚଳରେ ଉପଭୋକ୍ତାମାନେ ବହୁ ହଇରାଣ ଭୋଗୁଛନ୍ତି। ବିଶେଷ କରି ଆଦିବାସୀ ଅଧ୍ୟ୍ୟୁଷିତ ଉକ୍ତ ପଞ୍ଚାୟତ ଅଞ୍ଚଳର ଉପଭୋକ୍ତାଙ୍କ ହାତରେ କି ପେଡ ମୋବାଇଲ ସେଟ ରହିଛି। ସମସ୍ତଙ୍କ ହାତରେ ସ୍ମାର୍ଟ ମୋବାଇଲ ନ ଥିବା ବେଳେ ପଞ୍ଚାୟତର ଅଧାରୁ ଉର୍ଦ୍ଧ୍ୱ ଉପଭୋକ୍ତା ବିଏସଏନଏଲ ମୋବାଇଲ ସେବା ଉପରେ ନିର୍ଭର କରୁଛନ୍ତି। ଏହି ନେଟୱାର୍କ ବନ୍ଦ ହୋଇଯିବା ପରେ ଆଉ ବିଭାଗ ନା ମରାମତି କରୁଛି ନା କୌଣସି ଅଧିକାରୀ ସିଆଙ୍ଗବାଲି ଆସି ତାକୁ ମରାମତି ପାଇଁ ପଦକ୍ଷେପ ନେଉଛନ୍ତି। ଫଳରେ ଉପଭୋକ୍ତାମାନଙ୍କ କେବଳ ରିଚାର୍ଜ ଭାଉଚର ପକାଇ ବାହାର ପଞ୍ଚାୟତକୁ ଯାଇ ଓଟିପି କିମ୍ବା ଅନ୍ୟ ଲିଙ୍କ ପାଇଁ ବ୍ୟବହାର କରୁଛନ୍ତି। ନିଜ ପଞ୍ଚାୟତରେ ଏହି ସେବା ଚାଲିଥିଲେ। ହୁଏତ ଲୋକମାନେ ଖର୍ଚ୍ଚାନ୍ତ ହୋଇ ନ ଥାନ୍ତେ ଏଣୁ ମଙ୍ଗଳବାର ଉକ୍ତ ପଞ୍ଚାୟତର ଶତାଧିକ ଉପଭୋକ୍ତା ଏକାଠି ହୋଇ ଆଗାମୀ ଦିନରେ ଏହି ସେବା ଯୋଗାଇଦେବା ଦାବିରେ ଆନ୍ଦୋଳନ କରିବାକୁ ସଜବାଜ ହେଉଥିବା କହିଛନ୍ତି।
ସୂଚନାଯୋଗ୍ୟ ଯେ, କୋଭିଡ ପୂର୍ବରୁ ଲୋକଙ୍କୁ ମୋବାଇଲ ସେବା ଯୋଗାଇବା ପାଇଁ ପଞ୍ଚାୟତ କାର୍ଯ୍ୟାଳୟ ପକ୍ଷରୁ ପଦକ୍ଷେପ ନିଆଯାଇଥିଲା ପଞ୍ଚାୟତ ଅଞ୍ଚଳରେ ନଳକୂପ ମରାମତି ପରେ ବାହାରିଥିବା ନଷ୍ଟ ପାଇପଗୁଡିକୁ ଯୋଡି ଟାୱାର ସ୍ଥାପନ କରାଯାଇ ବାଲିଗୁଡା ବିଏସଏନଏଲର ଉପଖଣ୍ଡ କାର୍ଯ୍ୟାଳୟ ସହାୟତରେ ସିଆଙ୍ଗବାଲିକୁ ପ୍ରଥମେ ୨ଜି ଓ ପରେ ୪ଜି ସେବା ଯୋଗାଇ ଦିଆଯାଇଥିଲା। ଅଞ୍ଚଳରେ ମୋବାଇଲ ନେଟୱାର୍କ ଆସିବା ପରେ କ୍ଷୁଦ୍ର ବ୍ୟାଙ୍କ ସେବା, ମୋ ସେବାକେନ୍ଦ୍ର ଆଦି ଖୋଲି ଲୋକଙ୍କ ସରକାରୀ ଓ ବେସରକାରୀ କାର୍ଯ୍ୟକୁ ସଫଳତାର ସହ କରାଯାଇପାରୁଥିଲା। କୋଭିଡ ସମୟରେ ଛାତ୍ରୀଛାତ୍ର ମାନେ ଅନଲାଇନରେ ପାଠ ପଢୁଥିଲେ ଅନେକ ବିକାଶ ହୋଇପାରିଥିଲା। ଯାହାକି ଏବେ ଏହି ସେବା ବନ୍ଦ ଯୋଗୁ ଅଞ୍ଚଳରେ ସମସ୍ୟା ହିଁ ସମସ୍ୟା ଦେଖାଯାଉଥିବା ଗ୍ରାମର ୱାର୍ଡ ସଭ୍ୟଙ୍କ ସମେତ ଲେଙ୍କା ପ୍ରଧାନ, ପୂରପୁ ପ୍ରଧାନ, ଜିତେନ୍ଦ୍ର ପ୍ରଧାନ,ଧର୍ମେନ୍ଦ୍ର ପ୍ରଧାନ, ସୁଶୀଳ ପ୍ରଧାନ, ପ୍ରମୁଖ ଅଭିଯୋଗ କରିଛନ୍ତି।
