ଓ୍ବାଶିଂଟନ୍,୧।୪: ନିକଟରେ ଆମେରିକୀୟ ରାଜନୀତିରେ ଏକ ନୂଆ ବିତର୍କ ଆରମ୍ଭ ହୋଇଛି। ଡୋନାଲ୍ଡ ଟ୍ରମ୍ପ ଏବଂ ବାରାକ ଓବାମା 2028 ରେ ମୁହାଁମୁହିଁ ହେବେ କି? ଏହି ଆଲୋଚନା ଆହୁରି ଗତି ପାଇଲା ଯେତେବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହ୍ବାଇଟ ହାଉସରେ ଏକ ପ୍ରଶ୍ନ ପଚରାଗଲା ଯେ ସେ ବାରାକ ଓବାମାଙ୍କ ବିରୋଧରେ ର୍ନିବାଚନ ଲଢ଼ିବାକୁ ଚାହାଁନ୍ତି କି?
ଏଥିରେ ଟ୍ରମ୍ପ ହସି ହସି ଉତ୍ତର ଦେଲେ, ‘ମୁଁ ଏହାକୁ ବେଶୀ ଉପଭୋଗ କରିବି!’ ତାଙ୍କ ବୟାନ ପରେ ରାଜନୈତିକ ଝଡ଼ ତୀବ୍ର ହୋଇଛି ଏବଂ ଏବେ ଅନୁମାନ କରାଯାଉଛି ଯେ 2028 ର୍ନିବାଚନ ଟ୍ରମ୍ପ ଏବଂ ଓବାମାଙ୍କ ମଧ୍ୟରେ ଏକ ଐତିହାସିକ ପ୍ରତିଯୋଗିତା ହୋଇପାରେ!
ବାରାକ ଓବାମା ଦୁଇଥର ଆମେରିକାର ରାଷ୍ଟ୍ରପତି ହୋଇସାରିଛନ୍ତି। ହୱାଇଟ ହାଉସରେ ତାଙ୍କର ଦୁଇଟି କାର୍ଯ୍ୟକାଳ ରହିଛି। ସେ ୨୦୦୮ ଏବଂ ୨୦୧୨ ର୍ନିବାଚନରେ ବିଜୟୀ ହୋଇଥିଲେ। ୨୦୨୪ ର୍ନିବାଚନରେ, ସେ ଜୋ ବାଇଡେନ ଏବଂ କମଳା ହାରିସ ପାଇଁ ପରଦା ପଛରେ ଏକ ରଣନୈତିକ ଭୂମିକା ଗ୍ରହଣ କରିଥିଲେ।
ପୂର୍ବରୁ କୁହାଯାଉଥିଲା ଯେ ସେ ତାଙ୍କ ପତ୍ନୀ ମିଶେଲ ଓବାମାଙ୍କୁ ରାଷ୍ଟ୍ରପତି ର୍ନିବାଚନ ପାଇଁ ପ୍ରାର୍ଥୀ କରିବାକୁ ଚାହୁଁଥିଲେ, କିନ୍ତୁ ଜୋ ବାଇଡେନ ର୍ନିବାଚନରୁ ଓହରିଯିବା ପରେ କମଳା ହାରିସ ଡେମୋକ୍ରାଟିକ ପ୍ରାର୍ଥୀ ହୋଇଥିଲେ। ତଥାପି, ଟ୍ରମ୍ପ 2024 ରେ ତାଙ୍କୁ ପରାସ୍ତ କରି ହୱାଇଟ ହାଉସ ଆସନ ପୁନର୍ବାର ହାସଲ କରିଥିଲେ। ଏବେ ପ୍ରଶ୍ନ ହେଉଛି, ଯଦି ଟ୍ରମ୍ପ ତୃତୀୟ ଥର ପାଇଁ ର୍ନିବାଚନ ଲଢ଼ିବାର ଉପାୟ ପାଇପାରନ୍ତି, ତେବେ ଓବାମା କ’ଣ ସେହିପରି କରିବେ?
ଡୋନାଲ୍ଡ ଟ୍ରମ୍ପ ପୂର୍ବରୁ ସମ୍ବିଧାନର 22ତମ ସଂଶୋଧନ ଉପରେ ପ୍ରଶ୍ନ ଉଠାଇ ସାରିଛନ୍ତି, ଯାହା କୌଣସି ବ୍ୟକ୍ତିଙ୍କୁ ଦୁଇଥରରୁ ଅଧିକ ରାଷ୍ଟ୍ରପତି ହେବାରୁ ବାରଣ କରେ। ଏହା ଉପରେ ଟ୍ରମ୍ପ କହିଥିଲେ ଯେ ଲୋକମାନେ କୁହନ୍ତି ଯେ ଏହା କରିବାର ଉପାୟ ଅଛି, କିନ୍ତୁ ମୁଁ ଏପର୍ଯ୍ୟନ୍ତ ଏହା ବିଷୟରେ ଅଧିକ ଚିନ୍ତା କରିନାହିଁ।
ଏହି ବିବୃତ୍ତି ପରେ, କଳ୍ପନାଜଳ୍ପନା ଆରମ୍ଭ ହୋଇଛି ଯେ ଟ୍ରମ୍ପ 2028 ରେ ତୃତୀୟ ଥର ପାଇଁ ର୍ନିବାଚନ ଲଢ଼ିବା ପାଇଁ ଏକ ଆଇନଗତ ଉପାୟ ପାଇପାରନ୍ତି। ଯଦି ଏହି ସଂଶୋଧନ ପରିବର୍ତ୍ତନ କରାଯାଏ କିମ୍ବା ଏହାର ବ୍ୟାଖ୍ୟା ସଂସ୍କାର କରାଯାଏ, ତେବେ ଓବାମାଙ୍କ ପାଇଁ ତୃତୀୟ ଥର ପାଇଁ ର୍ନିବାଚନ ଲଢ଼ିବା ପାଇଁ ପଥ ଖୋଲିପାରେ।
ଯଦି ଏହା ଟ୍ରମ୍ପ ବନାମ ଓବାମା ହୁଏ ତେବେ କଣ ହେବ?
ଯଦି ୨୦୨୮ ମସିହାରେ ଟ୍ରମ୍ପ ଏବଂ ଓବାମାଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହୁଏ, ତେବେ ଏହା ଆମେରିକୀୟ ରାଜନୀତି ଇତିହାସରେ ସବୁଠାରୁ ବଡ଼ ର୍ନିବାଚନୀ ଲଢ଼େଇ ହୋଇପାରେ। ଟ୍ରମ୍ପ ଏବଂ ଓବାମା ଉଭୟ ଅତ୍ୟନ୍ତ ଲୋକପ୍ରିୟ ନେତା ଏବଂ ସେମାନଙ୍କର ଦୃଢ଼ ସମର୍ଥକ ଅଛନ୍ତି।
ଆମେରିକୀୟ ରାଜନୀତି ପରିବର୍ତ୍ତନ ହେବ କି?
ଯଦି ଟ୍ରମ୍ପ ଏବଂ ଓବାମା ଉଭୟ ତୃତୀୟ କାର୍ଯ୍ୟକାଳ ପାଇଁ ର୍ନିବାଚନ ଲଢ଼ିବା ପାଇଁ ସାମ୍ବିଧାନିକ ପରିବର୍ତ୍ତନର ସମ୍ଭାବନା ଅନୁସନ୍ଧାନ କରନ୍ତି, ତେବେ ଏହା ଆମେରିକାର ରାଜନୈତିକ ଦୃଶ୍ୟପଟକୁ ସମ୍ପୂର୍ଣ୍ଣ ପରିବର୍ତ୍ତନ କରିପାରେ। ରୁଷରେ ଭ୍ଲାଦିମିର ପୁଟିନ ଏବଂ ଚୀନରେ ସି ଜିନପିଙ୍ଗ ସାମ୍ବିଧାନିକ ସଂଶୋଧନ କରି ଅସୀମିତ କାର୍ଯ୍ୟକାଳ ପାଇଁ ବ୍ୟବସ୍ଥା କରିସାରିଛନ୍ତି।
ଆମେରିକା ସବୁବେଳେ ଶାନ୍ତିପୂର୍ଣ୍ଣ କ୍ଷମତା ହସ୍ତାନ୍ତରର ପରମ୍ପରା ବଜାୟ ରଖିବା ପାଇଁ ଗର୍ବିତ, କିନ୍ତୁ ଯଦି ଟ୍ରମ୍ପ ଏବଂ ଓବାମା 2028 ମସିହାରେ ପରସ୍ପରର ମୁହାଁମୁହିଁ ହୁଅନ୍ତି, ତେବେ ଏହା ଆମେରିକୀୟ ଗଣତନ୍ତ୍ର ପାଇଁ ଏକ ନୂତନ ଯୁଗ ହୋଇପାରେ। ଏବେ ଦେଖିବାକୁ ବାକି ରହିଲା ଯେ ଏହି ଆଲୋଚନା କେବଳ ଅନୁମାନରେ ପରିଣତ ହେଉଛି ନା ପ୍ରକୃତରେ 2028 ରେ ଇତିହାସ ରଚିବାକୁ ଯାଉଛି!
