ନୂଆଦିଲ୍ଲୀ, ୧୩।୧: ଆସନ୍ତା ମାସରେ ପାକିସ୍ତାନ ଦ୍ୱାରା ଆୟୋଜିତ ହେବାକୁ ଯାଉଥିବା ଚାମ୍ପିୟନ୍ସ ଟ୍ରଫି ୨୦୨୫କୁ ନେଇ ପ୍ରାୟ ସମସ୍ତ ଦେଶ ନିଜର ଟିମ୍ ଘୋଷଣା କରିଦେଲେଣି। କିନ୍ତୁ ଭାରତ ଏପର୍ଯ୍ୟନ୍ତ ଏହାର ଦଳ ଘୋଷଣା କରିନାହିଁ।
ବିସିସିଆଇ ଅପାଧ୍ୟକ୍ଷ ରାଜୀବ ଶୁକ୍ଳା କହିଛନ୍ତି ଯେ, ଆସନ୍ତା ୧୮ ଏବଂ ୧୯ ଜାନୁଆରୀରେ ଏକ ବୈଠକ ହେବାର ଅଛି। ଏହାପରେ ଟିମ୍ ଘୋଷଣା ହୋଇପାରେ। କିନ୍ତୁ ଏହା ପୂର୍ବରୁ ମଧ୍ୟ ଅନେକ ପୁର୍ବାନୁମାନ କରାଯାଉଛି। କିଛି ପୂର୍ବତନ ଖେଳାଳି ନିଜର ସମ୍ଭାବ୍ୟ ଟିମ୍ ଘୋଷଣା ମଦ୍ୟ କରିସାରିଲେଣି।
ଏସବୁ ମଧ୍ୟରେ ଉଇକେଟ କିପରକୁ ନେଇ ମଧ୍ୟ ଅନେକ ଟଣା ଓଟରା ଲାଗିଲାଣି। ଚାମ୍ପିୟନ୍ସ ଟ୍ରଫିରେ ଭାରତୀୟ ଦଳ ପାଇଁ କେଉଁ ଦୁଇଜଣ କିପର ରହିବେ। ଏହାକୁ ନେଇ ଅନେକ ଚର୍ଚ୍ଚା କରାଯାଉଛି। ତେବେ ଏଥିରେ ଏକ ନାଁ କେଏଲ. ରାହୁଲ ନିଶ୍ଚିନ୍ତ ଦେଖାଯାଉଛି।
ଦିନିକିଆରେ ସଞ୍ଜୁଙ୍କ ପଲା ଭାରି
ଯେତେବେଳେ ଦ୍ୱିତୀୟ ୱିକେଟକିପର ପାଇଁ, ସଞ୍ଜୁ ସାମସନ କିମ୍ବା ରିଷଭ ପନ୍ତଙ୍କୁ ଚୟନ କରାଯାଇପାରେ। ଏଥିରେ କାହାର ପଲା ଭାରି ଦେଖାଯାଉଛି, ତାହା ଦୁଇଜଣଙ୍କର ରେକର୍ଡ ପ୍ରମାଣ ଦେଉଛି। ଯଦି ଆମେ ବର୍ତ୍ତମାନର ସଂଖ୍ୟା ଉପରେ ନଜର ପକାଇବା, ତେବେ ସଞ୍ଜୁଙ୍କ ପଲା ଅଧିକ ଭାରି ଥିବା ପରି ମନେ ହେଉଛି।
ରିଷଭ ପନ୍ତ ଏପର୍ଯ୍ୟନ୍ତ ମୋଟ ୩୧ଟି ଦିନିକିଆ ମ୍ୟାଚ୍ ଖେଳିଛନ୍ତି, ଯେଉଁଥିରେ ସେ ୩୩.୫୦ ହାରରେ ୮୭୧ ରନ କରିଛନ୍ତି। ଏଥିରେ ସେ ଗୋଟିଏ ଶତକ ଏବଂ ୫ଟି ଅର୍ଦ୍ଧଶତକ ମାରିଛନ୍ତି। ପନ୍ତଙ୍କ ଷ୍ଟ୍ରାଇକ୍ ରେଟ୍ ୧୦୬.୨୧ ରହିଛି। କିନ୍ତୁ ସଞ୍ଜୁଙ୍କ ରେକର୍ଡ ଏହା ଅପେକ୍ଷା ଭଲ ମନେ ହେଉଛନ୍ତି। ସେ ୧୬ଟି ଦିନିକିଆ ଖେଳି ୫୬.୬୬ ହାରରେ ୫୧୦ ରନ୍ କରିଛନ୍ତି। ଏହି ସମୟ ମଧ୍ୟରେ, ସେ ୯୯.୬୦ ଷ୍ଟ୍ରାଇକ୍ ରେଟ୍ ସହିତ ୧ ଶତକ ଏବଂ ୩ ଅର୍ଦ୍ଧଶତକ ହାସଲ କରିଛନ୍ତି।
