ମେଲବୋର୍ନ,୨୦ା୧୨(ପି.ଟି.): ବର୍ଡର-ଗାଭାସ୍କର ଟ୍ରଫିର ଅନ୍ତିମ ଦୁଇ ଟେଷ୍ଟ ମ୍ୟାଚ୍ ପାଇଁ ଟିନ୍ ଏଜ୍ ସେନସେସନ ସାମ କୋନଷ୍ଟାସଙ୍କୁ ଅଷ୍ଟ୍ରେଲିଆ ଦଳକୁ ଡାକରା ମିଳିଛି। ଓପନର ନାଥାନ ମ୍ୟାକସୁଇନିଙ୍କୁ ବାଦ୍ ଦିଆଯାଇ ତାଙ୍କ ସ୍ଥାନରେ କୋନଷ୍ଟାସଙ୍କୁ ସାମିଲ କରାଯାଇଛି। ୧୯ ବର୍ଷୀୟ କୋନଷ୍ଟାସ ୭୦ ବର୍ଷରେ ଅଷ୍ଟ୍ରେଲିଆର ସର୍ବକନିଷ୍ଠ ବ୍ୟାଟର ଭାବରେ ପଦାର୍ପଣ କରିବାକୁ ଯାଉଛନ୍ତି। ସେହିପରି ଦ୍ୱିତୀୟ ସର୍ବକନିଷ୍ଠ ଖେଳାଳି ଭାବରେ ବକ୍ସିଂ ଡେ ଟେଷ୍ଟ ଖେଳିବାକୁ ଯାଉଛନ୍ତି। ବର୍ତ୍ତମାନର ଅଷ୍ଟ୍ରେଲିଆ ଅଧିନାୟକ ପ୍ୟାଟ କୁମିନ୍ସ ୧୮ ବର୍ଷ ୧୯୩ ଦିନରେ ୨୦୧୧ରେ ଦକ୍ଷିଣ ଆଫ୍ରିକା ବିପକ୍ଷରେ ବକ୍ସିଂ ଡେ ଟେଷ୍ଟ ଖେଳିଥିଲେ।
୨୫ ବର୍ଷୀୟ ମ୍ୟାକ୍ସୁଇନି ପର୍ଥରେ ପଦାର୍ପଣ କରିଥିଲେ। ୩ ଟେଷ୍ଟର ୬ ଇନିଂସରେ ସେ ଯଥାକ୍ରମେ ୧୦, ୦, ୩୯, ୧୦, ୯ ଓ ୪ ରନ୍ ସ୍କୋର କରିଥିଲେ। ଏହି ୬ ଇନିଂସ ମଧ୍ୟରେ ବୁମ୍ରା ତାଙ୍କୁ ୪ ଥର ଆଉଟ କରିଥିଲେ। ନିକଟରେ କୋନଷ୍ଟାସ ସେଫଲ୍ଡ ସିଲ୍ଡରେ ନ୍ୟୁ ସାଉଥ ଓ୍ବେଲ୍ସ ପାଇଁ ଦୁଇଟି ଶତକ ହାସଲ କରିଥିଲେ। ଏହା ବ୍ୟତୀତ ଭାରତ ଏ ବିପକ୍ଷ ଅଭ୍ୟାସ ମ୍ୟାଚରେ ୭୩ ଓ ପ୍ରଧାନମନ୍ତ୍ରୀ ଏକାଦଶ ପକ୍ଷରୁ ଖେଳି ୧୦୭ ରନ୍ ସ୍କୋର କରିଥିଲେ।
