ଭୁବନେଶ୍ୱର, ୧୩।୧୨ (ବନ୍ଦନା ସେଠୀ):ସହରରେ ମାଗଣାରେ ଓ୍ବାଇ-ଫାଇ ସେବା ଯୋଗାଉଛି ଭୁବନେଶ୍ୱର ସ୍ମାଟ୍ ସିଟି ଲିମିଟେଡ୍ (ବିଏସ୍ଏଲ୍)। ରାଉଟର ଲାଗିଥିବା ସ୍ଥାନର ୫୦ ମିଟର ମଧ୍ୟରେ ଜଣେ ବ୍ୟକ୍ତି ଏହି ସେବା ପାଇପାରିବ। ମାତ୍ର ଏହି ମାଗଣା ସେବା କେଉଁଠି ମିଳୁଛି ଲୋକେ ତାହାର ଠିକଣା ଖୋଜିଖୋଜି ପାଉନାହାନ୍ତି। କାରଣ ସ୍ମାର୍ଟସିଟି ୱାଇ-ଫାଇର ରାଉଟର କେଉଁଠି ଲଗାଇଛି ତାହା କେହି ଜାଣି ନାହାନ୍ତି। ମାଗଣା ଓ୍ବାଇ-ଫାଇ ନେଇ କୌଣସି ସ୍ଥାନରେ ସାଇନ୍ଏଜ୍ଟିଏ ବି ଦେଖିବାକୁ ମିଳୁନାହିଁ। ଜରୁରୀକାଳୀନ ପରିସ୍ଥିତିରେ ଲୋକେ ଏବେ ଏହି ସେବା ଆବଶ୍ୟକ କରୁଥିଲାବେଳେ ସାଇନ୍ଏଜ୍ ନ ଥିବା କାରଣରୁ ହଇରାଣ ହେଉଛନ୍ତି। ତେଣୁ କେଉଁମାନେ ଏହି ସେବାର ଲାଭ ଉଠାଉଛନ୍ତି ବୋଲି ସାଧାରଣରେ ପ୍ରଶ୍ନ ଉଠିଛି। ଅପରପକ୍ଷେ ଓ୍ବାଇ-ଫାଇ ବାବଦରେ ସ୍ମାର୍ଟସିଟି ମାସକୁ ଲକ୍ଷାଧିକ ଟଙ୍କା ଖର୍ଚ୍ଚ କରୁଛି।
ରାଜଧାନୀରେ ମୋଟ୍ ୫୧୮ଟି ସ୍ଥାନରେ ମାଗଣା ୱାଇ-ଫାଇ ସେବା ଉପଲବ୍ଧ ରହିଛି। ପ୍ରତ୍ୟେକ ବ୍ୟକ୍ତି ଦୈନିକ ୫୧୨ ଏମ୍ବି ଡାଟା ମାଗଣାରେ ବ୍ୟବହାର କରି ପାରିବେ। ଏହାସହିତ ୱାଇ-ଫାଇର ସ୍ପିଡ୍ ମଧ୍ୟ ୩୦ ଏମ୍ବିପିଏସ୍ ରହୁଥିବା ଜଣେ ଅଧିକାରୀ କହିଛନ୍ତି। ତେବେ ସହରର ଅଧିକାଂଶ ଲୋକ ଏନେଇ ଜାଣି ନାହାନ୍ତି। କିଛିବର୍ଷ ତଳେ ମାଗଣା ଇଣ୍ଟରନେଟ୍ ସେବା ମିଳୁଥିବା ସ୍ଥାନରେ ଲୋକଙ୍କ ଭିଡ ହେଉଥିଲା। ପ୍ରାରମ୍ଭରୁ ଲକ୍ଷାଧିକ ଲୋକ ଏହି ସେବାକୁ ବ୍ୟବହାର କରୁଥିଲେ। ମାତ୍ର ଏବେ ଇଣ୍ଟରନେଟ୍ର ବହୁଳ ବ୍ୟବହାର ଏବଂ ଡାଟା ମୂଲ୍ୟ ଶସ୍ତା ଯୋଗୁଁ ମାଗଣା ଇଣ୍ଟରନେଟ୍ ମିଳୁଥିବା ସ୍ଥାନରେ ଲୋକେ ଆଉ ଭିଡ ଜମାଉ ନାହାନ୍ତି। ଏବେ ଦୈନିକ ମାତ୍ର ୧୭୦୦ରୁ ୧୬୦୦ ୟୂଜର୍ସ ଏହି ସେବା ବ୍ୟବହାର କରୁଛନ୍ତି। ଏହାର ସ୍ପଡ୍ ମଧ୍ୟ କମ୍ ରହୁଛି ବୋଲି ଅନେକ ସମୟରେ ଅଭିଯୋଗ ହେଉଛି। ଅନ୍ୟପକ୍ଷରେ ଲୋକମାନେ ମାଗଣା ସେବାକୁ କେବଳ ଜରୁରିକାଳୀନ ପରିସ୍ଥିତିରେ ବ୍ୟବହାର କରିବାକୁ ଚାହୁଁଛନ୍ତି। ମାତ୍ର ଏହି ସେବା କେଉଁ ଅଞ୍ଚଳରେ ମିଳୁଛି ତାହାର ସୂଚନା ଲୋକେ ପାଇ ପାରୁ ନଥିବା ଅଭିଯୋଗ ହୋଇଛି।
