ମୁମ୍ବାଇ,୩।୧୨: ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ଘୋଷଣାକୁ ୧୧ ଦିନ ବିତିଲାଣି, ଏହା ସତ୍ତ୍ୱେ ମହାୟୁତି ମେଣ୍ଟ ଏପର୍ଯ୍ୟନ୍ତ ସରକାର ଗଠନ କରିପାରୁ ନାହିଁ। ରାଜ୍ୟରେ ସରକାର ଗଠନ ଲାଗି ଦିଲ୍ଲୀରୁ ମହାରାଷ୍ଟ୍ର ପର୍ଯ୍ୟନ୍ତ ନେତାଙ୍କ ଦୌଡ ଜାରି ରହିଛି। ଏହାର ମୂଳ କାରଣ ହେଉଛନ୍ତି ମୁଖ୍ୟମନ୍ତ୍ରୀ ଶିନ୍ଦେ। ପ୍ରଥମେ ଏକନାଥ ଶିନ୍ଦେ ପଦ ଛାଡିବାକୁ ରାଜି ନ ଥିଲେ, ହେଲେ ଯେତେବେଳେ କଥା ଆଗକୁ ନ ବଢିଲା ସେ ଗୃହମନ୍ତ୍ରାଳୟ ଓ ଅନ୍ୟ କିଛି ଗୁରୁତ୍ୱପୂର୍ଣ୍ଣ ମନ୍ତ୍ରାଳୟ ବଦଳେ ମୁଖ୍ୟମନ୍ତ୍ରୀ ପଦ ଛାଡିବାକୁ ରାଜି ହୋଇଛନ୍ତି।
ହେଲେବି କଥା ଏଇଠି ସରିନି। ଏକନାଥ ସିନ୍ଦେ ଏବେ ମହାୟୁତି ସରକାର ଗଂନରେ ବାଧକ ସାଜିଚନ୍ତି। ଗତ ସପ୍ତାହରେ କେନ୍ଦ୍ରମନ୍ତ୍ରୀ ଅମିତ ଶାହାଙ୍କ ସହିତ ଦିଲ୍ଲୀରେ ସାକ୍ଷାତ ପରେ ସେ ମୁମ୍ବାଇ ପହଞ୍ଚିଥିଲେ ଓ ସିଧା ନିଜ ଗାଁକୁ ଚାଲିଯାଇଥିଲେ। ତେବେ ରବିବାର ଗଣମାଧ୍ୟମ ସହ ଆଲୋଚନାରେ ସେ ପୁଣି ମୁଖ୍ୟମନ୍ତ୍ରୀ ପଦ ଉପରେ ନିଜର ଦାବି ଜାହିର କରିଛନ୍ତି। ହେଲେ ସେ ଏହା ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅମିତ ଶାହ ଯାହା ବି ନିଷ୍ପତ୍ତି ନେବେ ସେ ଏହାକୁ ସ୍ବୀକାର କରିବେ। ଏଥିରେ ଏବେ ପ୍ରଶ୍ନ ଉଠୁଛି ଏକନାଥ ଶନ୍ଦେ ଏପରି ବାର୍ଗେନିଂ କେଉଁ ସାହସରେ କରୁଛନ୍ତି?
ମାହାୟୁତିରେ ଭାଜପା ସବୁଠୁ ବଡ଼ ପାର୍ଟି ଓ ନିର୍ବାଚନରେ ୧୩୨ଟି ଆସନ ହାତେଇଛି। ଏଥିରେ ଭାଜପା ଚାହିଁଲେ ନିମିଷେକରେ ଶିବସେନା (ଶିନ୍ଦେ)କୁ ଆଡେଇ ଦେଇ ଏନସିପି(ଅଜିତ)କୁ ସାଙ୍ଗରେ ନେଇ ସରକାର ଗଢି ପାରିବ। ହେଲେ କଥା ଯେମିତି ସହଜ ଲାଗୁଛି ସେମିତି ସହଜ ନୁହେଁ। କାରଣ ଏକନାଥ ସିନ୍ଦେଙ୍କ ଅସଲି ତାକତ ତାଙ୍କର ୫୭ ଜଣ ବିଧାୟକ ନୁହନ୍ତି, ୭ ଲୋକ ସଭା ଏମପି, ଯାହା କେନ୍ଦ୍ରରେ ମୋଦି ସରକାରଙ୍କ ସ୍ଥାୟିତ୍ୱର କାରଣ।
ଗତ ଲୋକ ସଭା ର୍ନିବାଚନରେ ଭାଜପାକୁ ସଂଖ୍ୟାଗରିଷ୍ଠତା ମିଳିନଥିଲା। ଭାଜପାର ୨୪୦ ଏମପି ଅଛନ୍ତି, ତେବେ କେନ୍ଦ୍ରରେ ସରକାର କରିବାକୁ ୨୭୨ ଏମପିଙ୍କ ସମର୍ଥନ ଦରକାର। ଏଣୁ ୩୨ ଏମପିଙ୍କ ଆବଶ୍ୟକତା ପୂରଣ କରିବାରେ ଶିବସେନା (ଶିନ୍ଦେ)ର ଭୂମିକା ଗୁରୁତ୍ୱପୂର୍ଣ୍ଣ। କେନ୍ଦ୍ରର ଏନଡିଏ ସରକାରରେ ଭାଜପା ପରେ ସବୁଠୁ ବଡ଼ ପାର୍ଟି ଆନ୍ଧ୍ରପ୍ରଦେଶର ଟିଡିପି। ଚନ୍ଦ୍ରବାବୁ ନାଇଡୁଙ୍କ ପାର୍ଟିର ୧୬ ଜଣ ଏମପି ଅଛନ୍ତି। ତୃତୀୟ ସ୍ଥାନରେ ଜେଡିୟୁ ଅଛି ଯାହାର ୧୨ ଜଣ ଏମପି ଅଛନ୍ତି। ଏବେ କେନ୍ଦ୍ର ସରକାରରେ ଏନଡିଏର ୨୯୩ ଜଣ ଏମପି ଅଛନ୍ତି।
ଏଥିରେ ଯଦି ଶିନ୍ଦେ ଏନଡିଏରୁ ପୃଥକ ହୁଅନ୍ତି ତେବେ କେନ୍ଦ୍ରରେ ସରକାର ଉପରେ କୌଣସି ପ୍ରଭାବ ପଡିବ ନାହିଁ, ହେଲେ ମୋଦି ସରକାରଙ୍କ ଉପରେ ଚାପରେ ଆସିଯିବ। ଏଣୁ କେନ୍ଦ୍ରର ଭାଜପା ସରକାର ବିରୋଧୀଙ୍କୁ ଏପରି କୌଣସି ସୁଯୋଗ ଦେବାକୁ ଚାହାନ୍ତିନି ଯେଉଁଥିରୁ ଲାଗିବ ମୋଦି ସରକାର ଦୁର୍ବଳ। ଅନ୍ୟପଟେ ଶିନ୍ଦେ ଭାଜପା ସହିତ ଏହି ପ୍ରସଙ୍ଗରେ ମଧ୍ୟ ବାର୍ଗେନିଂ ଚଳାଇଛନ୍ତି। ସେ ଜାଣିଛନ୍ତି ରାଜ୍ୟରେ ଭାଜପାର ସରକାରକୁ ସେ କୌଣସିବି ସ୍ତରରେ ରୋକି ପାରିବେନି, ହେଲେ ନିଜ ଏମପିଙ୍କ ବଳରେ ସେ ନିଜ ପାଇଁ ରାଜ୍ୟ ସରକାରରେ କିଛି ଗୁରୁତ୍ୱପୂର୍ଣ୍ଣ ମନ୍ତ୍ରାଳୟ ହାସଲ କରିନେବାକୁ ଚାହୁଁଛନ୍ତି।
