ପୁରୀ,୧୭।୭: ଆସନ୍ତାକାଲି ଅର୍ଥାତ୍ ଗୁରୁବାର ଖୋଲିବ ଭିତର ରତ୍ନଭଣ୍ଡାର। ଆଉ ରତ୍ନଭଣ୍ଡାର ଭିତରେ କ’ଣ ରହିଛି, ତାହାକୁ ଜାଣିବା ପାଇଁ ଲକ୍ଷ ଲକ୍ଷ ଭକ୍ତଙ୍କ ମଧ୍ୟରେ ଉତ୍ସାହ ରହିଛି। ହେଲେ ଏହା ପୂର୍ବରୁ ଜଗନ୍ନାଥଙ୍କ ମୁଖ୍ୟ ବାଡ଼ଗ୍ରାହୀ ଜଗନ୍ନାଥ ସ୍ବାଇଁ ମହାପାତ୍ରଙ୍କ ବଡ଼ ପ୍ରତିକ୍ରିୟା ସାମ୍ନାକୁ ଆସିଛି। ସେ କହିଛନ୍ତି, ରାଜା ଯାହା ଜୟ କରନ୍ତି ମହାପ୍ରଭୁଙ୍କୁ ଭେଟି ଦିଅନ୍ତି। ଆଉ ଯାହା ଭେଟି ଦିଅନ୍ତି, ରତ୍ନଭଣ୍ଡାରରେ ରହିଥାଏ। ରତ୍ନଭଣ୍ଡାର ଖୋଲିବା ଛୋଟ କଥା ନୁହେଁ। ଏହା ଦିନିକିଆ କାମ ନୁହେଁ, ମାସ ମାସ ଚାଲିବ। ଏହି ସମୟରେ ସରକାର ରଘୁନାଥ ବେଶ କରନ୍ତୁ। ରଘୁନାଥ ବେଶ ମହାପ୍ରଭୁଙ୍କ ଦୁର୍ଲଭ ବେଶ। ୧୯୦୫ରେ ହୋଇଥିଲା ଦୁର୍ଲଭ ରଘୁନାଥ ବେଶ। ରଘୁନାଥ ବେଶ କଲେ ମୋହନ ସରକାରଙ୍କ ନାଁ ଲିପିବଦ୍ଧ ହେବ।
ରତ୍ନଭଣ୍ଡାର ଗଣତି ପାଇଁ ଲମ୍ବା ସମୟ ଲାଗିବ। ରତ୍ନଭଣ୍ଡାରକୁ ନେଇ ଯେତିକି ଉତ୍କଣ୍ଠା ରହିଛି ସେତିକି ମନରେ ଭୟ ବି ରହୁଛି। ତା’ ଭିତରେ ପାଣି ପଡି ଭିତର କାଳେ କ୍ଷତି ହୋଇଥିବ। ପୂର୍ବରୁ କେହି ରିସ୍କ ନେଉନଥିଲେ କି ଖୋଲୁନଥିଲେ। ଏହି ସରକାର ରିସ୍କ ନେଇଛନ୍ତି ଆଉ ଖୋଲୁଛନ୍ତି। ଏହି ସରକାର ସବୁ ଦେଖିବେ ବୋଲି ମୋର ଆଶା ଅଛି।
ଅଳଙ୍କାର ଗଣତି ଓ ମଣତି ହୋଇ ସୁରକ୍ଷିତ ରଖାଯାଉ। ରତ୍ନଭଣ୍ଡାର ପୂରା ମରାମତି ହେବା ଦରକାର। ଆଗାମୀ ୨୦୦ ବର୍ଷ ଯାଏ ଯେପରି କିଛି କ୍ଷତି ନ ହେବ ସେମିତି ଢଙ୍ଗରେ ମରାମତି କରାଯାଉ ବୋଲି ମୁଖ୍ୟ ବାଡ଼ଗ୍ରାହୀ କହିଛନ୍ତି।
