ନୟାଗଡ଼,୨୯ା୯(ଲୋକନାଥ ମିଶ୍ର): ନୟାଗଡ ଜିଲାର ଦଶପଲ୍ଲା ରେଳଷ୍ଟେଶନ ଉଦ୍ଘାଟନ ତାରିଖ ବାରମ୍ବାର ଘୁଞ୍ଚତ୍ ଚାଲିଛି। ଦଶପଲ୍ଲାକୁ ଟ୍ରେନ ଚଳାଚଳ ଆରମ୍ଭ ହେଉ ନ ଥିବାରୁ ବଢୁଛି ଅସନ୍ତୋଷ। ଏଣେ ଦାନା ବାନ୍ଧୁଛି ଆନ୍ଦୋଳନ। ରେଳ ଷ୍ଟେଶନର ନିର୍ମାଣ କାର୍ଯ୍ୟ ଶେଷ ହୋଇ ସମସ୍ତ ପ୍ରକାର ଯାଞ୍ଚ ଏବଂ ପରୀକ୍ଷଣ କାର୍ଯ୍ୟ ଶେଷ ହୋଇଛି। ଏପରି କି ଦକ୍ଷିଣ-ପୂର୍ବ ସର୍କଲ ରେଳପଥ ମୁଖ୍ୟ ସୁରକ୍ଷା ଅଧିକାରୀ ଏ.ଏମ୍.ଚୌଧୁରୀ ସମସ୍ତ ପ୍ରକାରର ଯାଞ୍ଚ କାର୍ଯ୍ୟ ଶେଷ କରି ଟ୍ରେନ ଚଳାଚଳ ପାଇଁ ନିରାପତ୍ତା ପ୍ରମାଣପତ୍ର ବିଭାଗ ନିକଟରେ ଗତ ୨ ମାସ ପୂର୍ବରୁ ଦାଖଲ କରି ସାରିଛନ୍ତି। ତେବେ ସମସ୍ତ ପ୍ରକାରର ଆନୁସଙ୍ଗିକ କାର୍ଯ୍ୟ ଶେଷ ହୋଇଥିବା ବେଳେ ଦଶପଲ୍ଲାକୁ ଟ୍ରେନ ଚଳାଚଳ ଆରମ୍ଭ ହେଉ ନ ଥିବାରୁ ନୟାଗଡ଼ ଜିଲାବାସୀଙ୍କ ପକ୍ଷରୁ ଅସନ୍ତୋଷ ପ୍ରକାଶ ପାଇଛି।
ଦଶପଲ୍ଲାରୁ ରେଳ ଚଳାଚଳ ଆରମ୍ଭ ହେଲେ ଦଶପଲ୍ଲା ଏବଂ ଏହାର ନିକଟବର୍ତ୍ତୀ ଅଞ୍ଚଳ ଯଥା ବାଣିଗୋଚ୍ଛା, ଟାକରା, ଗଣିଆ, ଛାମୁଣ୍ଡିଆ ଏପରି କି ଜିଲା ବାହାର ଫୁଲବାଣୀ,ବୌଦ୍ଧ ଆଦି ସ୍ଥାନରୁ ଯାତ୍ରୀମାନେ ପୁରୀଧାମ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ସୁବିଧା ହେବ। ମାତ୍ର ସେମାନଙ୍କ ଜଗନ୍ନାଥ ଦର୍ଶନ ଅଭିଳାଷକୁୁ ରେଳବିଭାଗ ଅନ୍ତରାୟ ସାଜିଛି। ଏ ନେଇ ପୂର୍ବତଟ ରେଳବିଭାଗର ଜଣେ ପଦସ୍ଥ ଅଧିକାରୀ ନିଜ ନାମ ଗୋପନ ରଖିବା ସୂତ୍ରରେ କହିଛନ୍ତି, ରେଳମନ୍ତ୍ରୀ ନିର୍ବାଚନକୁ ଆଖି ଆଗରେ ରଖି ଏହାର ଉଦଘାଟନ ତାରିଖ ସ୍ଥିର କରିବେ। ଖୋଦ୍ ରେଳମନ୍ତ୍ରୀ ଦଶପଲ୍ଲା ରେଳଷ୍ଟେଶନ ଉଦଘାଟନର ଅନ୍ତରାୟ ସୃଷ୍ଟି କରୁଥିବାରୁ ଅସନ୍ତୋଷ ପ୍ରକାଶ ପାଇଛି। ସୂଚନାଯୋଗ୍ୟ, ୨୦୧୫ରେ ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ୨୦୧୬ରେ ବେଗୁନିଆ ରେଳ ଷ୍ଟେଶନ ଉଦଘାଟନ ହୋଇଥିଲା। ପରବର୍ତ୍ତୀ ସମୟରେ ୨୦୧୭ରେ ନୟାଗଡ଼ ଟାଉନ ଏବଂ ୨୦୧୯ରେ ମହୀପୁର ଏବଂ ୨୦୨୨ରେ ନୂଆଗାଁ ରୋଡ୍ ରେଳ ଷ୍ଟେଶନ ଉଦଘାଟିତ ହୋଇ ରେଳ ଚଳାଚଳ କରୁଛି। ହେଲେ ଦଶପଲ୍ଲା ଷ୍ଟେଶନକୁ ଉଦ୍ଘାଟନ ବିଳମ୍ବ ହୋଇ ଚାଲିଛି। ଦଶହରା ପୂର୍ବରୁ ଦଶପଲ୍ଲାକୁ ଟ୍ରେନ ଚଳାଚଳ ନ ହେଲେ ଜିଲାବାସୀ ଆନ୍ଦୋଳନ କରିବେ ବୋଲି ଧମକ ଦେଇଛନ୍ତି।
