ଇସଲାମାଦାବ,୨୫।୯ : ପାକିସ୍ତାନରେ ମୁଦ୍ରାସ୍ଫୀତି ସର୍ବୋଚ୍ଚ ସ୍ତରରେ ରହିଛି। ପାକିସ୍ତାନର ଅର୍ଥନୈତିକ ବ୍ୟବସ୍ଥା ଉପରେ ବିଶ୍ୱ ବ୍ୟାଙ୍କ ମନ୍ତବ୍ୟ ଦେଇଛି। ବିଶ୍ୱ ବ୍ୟାଙ୍କ ରିପୋର୍ଟ କରିଛି ପାକିସ୍ତାନର ୪୦ ପ୍ରତିଶତ ଜନସଂଖ୍ୟା ଦାରିଦ୍ର ସୀମାରେଖା ତଳେ ବାସ କରନ୍ତି। ପାକିସ୍ତାନୀ ଗଣମାଧ୍ୟମ ଅନୁଯାୟୀ ଦେଶର ସାମରିକ, ରାଜନୈତିକ ଏବଂ ବ୍ୟବସାୟିକ ନେତାମାନେ ବର୍ତ୍ତମାନ ନୀତିଗତ ନିଷ୍ପତ୍ତି ଉପରେ ଦୃଷ୍ଟି ଦେବା ଆବଶ୍ୟକ।
ଗତ ବର୍ଷ ତୁଳନାରେ ପାକିସ୍ତାନରେ ଦାରିଦ୍ର୍ୟ ୩୯.୪ ପ୍ରତିଶତ ବୃଦ୍ଧି ପାଇଛି ବୋଲି ବିଶ୍ୱ ବ୍ୟାଙ୍କ ପ୍ରକାଶ କରିଛି। ଖରାପ ଅର୍ଥନୈତିକ ଅବସ୍ଥା ଯୋଗୁ ୧୨.୫ ନିୟୁତରୁ ଅଧିକ ଲୋକ ଦାରିଦ୍ରରେ ଫସି ରହିଛନ୍ତି। ଯେଉଁଠାରେ ୯୫ ନିୟୁତ ପାକିସ୍ତାନୀ ବର୍ତ୍ତମାନ ଦାରିଦ୍ରରେ ଜୀବନ ବିତାଉଛନ୍ତି। ବିଶ୍ୱ ବ୍ୟାଙ୍କ ପାକିସ୍ତାନକୁ କିଛି ପରାମର୍ଶ ଦେଇଛି। ଏଥିରେ କୁହାଯାଇଛି ଟିକସରୁ ଜିଡିପି ଅନୁପାତ ତୁରନ୍ତ ପାଞ୍ଚ ପ୍ରତିଶତ ବୃଦ୍ଧି ଏବଂ ଜିଡିପିର ୨.୭ ପ୍ରତିଶତ ଖର୍ଚ୍ଚ ହ୍ରାସ ହେବା ଉଚିତ।
ପାକିସ୍ତାନୀ ଅର୍ଥନୀତିଜ୍ଞ ଟୋବିୟାସ ହକ କହିଛନ୍ତି ଦେଶର ଆଜିର ଅବସ୍ଥା ଅତ୍ୟନ୍ତ ଚିନ୍ତାଜନକ। ପାକିସ୍ତାନ ଏକ ଗୁରୁତର ଅର୍ଥନୈତିକ ଏବଂ ମାନବ ବିକାଶ ସଙ୍କଟ ଦେଇ ଗତି କରୁଛି। ଦେଶର ଅନେକ ଦିଗରେ ନୀତି ପରିବର୍ତ୍ତନ ଆବଶ୍ୟକ । ଗଣମାଧ୍ୟମର ରିପୋର୍ଟ ଅନୁଯାୟୀ, ସରକାରୀ ରାଜସ୍ବକୁ ମଜବୁତ କରିବା ସହ ରିଅଲ ଇଷ୍ଟେଟ ଏବଂ କୃଷି କ୍ଷେତ୍ର ଉପରେ ଟିକସ ଭାର ବଢ଼ାଇ ରାଜସ୍ବ-ଜିଡିପି ଅନୁପାତରେ ପାଞ୍ଚ ପ୍ରତିଶତ ବୃଦ୍ଧି କରିବାକୁ ଅନେକ ପଦକ୍ଷେପ ନିଆଯାଇଛି।
