ନାଗପୁର,୨୨ା୫: ପ୍ରଧାନମନ୍ତ୍ରୀ କାର୍ଯ୍ୟାଳୟ(ପିଏମ୍ଓ)ର ଅତିରିକ୍ତ ନିର୍ଦ୍ଦେଶକ ପରିଚୟ ଦେଇ ଲୋକଙ୍କୁ ଠକିବା ଅଭିଯୋଗରେ କିଛି ଦିନ ତଳେ ଜମ୍ମୁ-କଶ୍ମୀରର ଶ୍ରୀନଗରରେ ଗୁଜରାଟର ମହାଠକ କିରନ୍ ପଟେଲ ଧରାପଡ଼ିଥିବାବେଳେ ତାଙ୍କ ଭଳି ଆଉ ଜଣେ ଅଭିଯୁକ୍ତ ଗିରଫ ହୋଇଛନ୍ତି। ଗୁଜରାଟର ଅହମଦାବାଦ ଜିଲା ମୋର୍ବି ବାସିନ୍ଦା ନୀରଜ ସିଂ ରାଠୋରଙ୍କୁ ମହାରାଷ୍ଟ୍ରର ନାଗପୁର ପୋଲିସ ଗିରଫ କରିଛି। ସେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ କ୍ୟାବିନେଟରେ ମନ୍ତ୍ରୀ କରାଇବା ପ୍ରତିଶ୍ରୁତି ଦେଇ ୩ ଭାଜପା ବିଧାୟକଙ୍କଠାରୁ ବେଆଇନ ଭାବେ ଟଙ୍କା ନେଇଥିବା ପୋଲିସ କହିଛି। କେବଳ ଏତିକି ନୁହେଁ, ନୀରଜ ବିଭିନ୍ନ ରାଜ୍ୟର ୨୮ ବିଧାୟକଙ୍କ ସହ ଯୋଗସୂତ୍ରରେ ଥିଲେ।
ନାଗପୁର ପୋଲିସର କହିବା ହେଲା, ଗତ ୩ ମାସ ମଧ୍ୟରେ ମହାଠକ ନୀରଜ ନିଜକୁ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କ ବ୍ୟକ୍ତିଗତ ସହାୟକ (ପିଏ) ପରିଚୟ ଦେଇ ମହାରାଷ୍ଟ୍ର, ପଶ୍ଚିମବଙ୍ଗ, ହରିୟାଣା, ଝାଡ଼ଖଣ୍ଡ ଓ ଦିଲ୍ଲୀର ୨୮ ବିଧାୟକଙ୍କୁ ମନ୍ତ୍ରୀ କରାଇବା ପ୍ରତିଶ୍ରୁତି ଦେଇ ସେମାନଙ୍କଠାରୁ ବିପୁଳ ଅର୍ଥ ଲୁଟିଥିଲେ। ଏପରି କି ସେମାନଙ୍କ ମଧ୍ୟରୁ ୩ ଜଣଙ୍କୁ କୌଣସି ପ୍ରକାରେ ମନ୍ତ୍ରୀ କରାଇବାରେ ସକ୍ଷମ ହୋଇଥିଲେ। ଗତବର୍ଷ ଦିଲ୍ଲୀର ଜଣେ ଭାଜପା ବିଧାୟକଙ୍କୁ କେନ୍ଦ୍ରର ଗୃହ ନିର୍ମାଣ ସ୍କିମ୍ ପ୍ରଧାନମନ୍ତ୍ରୀ ଆବାସ ଯୋଜନା ପାଇଁ ଦାୟିତ୍ୱ ପ୍ରଦାନ ପ୍ରତିଶ୍ରୁତି ଦେଇଥିଲେ। ସମ୍ପୃକ୍ତ ବିଧାୟକଙ୍କ ଅଭିଯୋଗକ୍ରମେ ଦିଲ୍ଲୀ ପୋଲିସ ନୀରଜଙ୍କୁ ଗିରଫ କରିଥିଲା। ଗତ ଜାନୁୟାରୀରେ ସେ ଜାମିନରେ ଆସିଥିଲେ। ନୀରଜଙ୍କ ବିରୋଧରେ ଆଇପିସି ଦଫା ୪୧୯ (ମିଥ୍ୟା ପରିଚୟ ଦେଇ ଠକିବା), ୪୨୦ (ଠକେଇ), ୧୨୦-ବି (ଆପରାଧିକ ଷଡ଼ଯନ୍ତ୍ର) ଏବଂ ୫୧୧ (ଅପରାଧ ଘଟାଇବା ଉଦ୍ୟମ ପାଇଁ ଆଜୀବନ କାରାଦଣ୍ଡାଦେଶ) ବଳରେ ମାମଲା ରୁଜୁ ହୋଇଛି। ନୀରଜଙ୍କ ଘର ନିକଟସ୍ଥ ଏକ ମୋବାଇଲ୍ ଦୋକାନର ମାଲିକ ତାଙ୍କ ତରଫରୁ ଅନ୍ଲାଇନ୍ରେ ବିଧାୟକମାନଙ୍କଠାରୁ ଟଙ୍କା ଗ୍ରହଣ କରୁଥିଲେ ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି।
