ବେଜିଂ/ତାଇପେଇ,୬ା୩: ଚାଇନା ପ୍ରଧାନମନ୍ତ୍ରୀ ଲି କେକିଆଙ୍ଗ୍ ରବିବାର ତାଇଓ୍ବାନ୍କୁ ‘ଶାନ୍ତିପୂର୍ଣ୍ଣ ପୁନଃ ଏକତ୍ରୀକରଣ’ ପ୍ରସ୍ତାବ ଦେଇଛନ୍ତି। ଏଥିସହ ତାଇଓ୍ବାନ୍ର ସ୍ବାଧୀନତାକୁ ବିରୋଧ କରିବା ପାଇଁ ଦୃଢ଼ ପଦକ୍ଷେପ ନେବା ଉପରେ ମତ ରଖିଛନ୍ତି। ଅନ୍ୟପକ୍ଷେ ଗଣତନ୍ତ୍ର ଓ ସ୍ବାଧୀନତା ପ୍ରତି ତାଇଓ୍ବାନ୍ବାସୀଙ୍କ ପ୍ରତିଶ୍ରୁତିବଦ୍ଧତାକୁ ବେଜିଂ ସମ୍ମାନ ଦେବା ଉଚିତ ବୋଲି ତାଇପେଇ ଜବାବ ଦେଇଛି।
ନିଜ ଭୂଖଣ୍ଡ ବୋଲି ଦାବି କରୁଥିବା ଚାଇନା ୩ ବର୍ଷ ହେଲା ଗଣତାନ୍ତ୍ରିକ ଦ୍ୱୀପରାଷ୍ଟ୍ର ନିକଟରେ ନିଜ ସାମରିକ କାର୍ଯ୍ୟକଳାପ ବଢ଼ାଇଚାଲିଛି। ତାଇଓ୍ବାନ୍ ସପକ୍ଷରେ ଆମେରିକାର ହସ୍ତକ୍ଷେପକୁ ନେଇ ବେଜିଂ କ୍ଷୁବ୍ଧ ହୋଇଛି। ଗତ ଅଗଷ୍ଟରେ ତାଇଓ୍ବାନ୍ ବିରୋଧରେ ଚାଇନା ‘ଓ୍ବାର୍ ଗେମ୍’ ଆରମ୍ଭ କରିଥିବାବେଳେ ଆମେରିକାର ତତ୍କାଳୀନ ହାଉସ୍ ସ୍ପିକର ନାନ୍ସି ପେଲୋସିଙ୍କ ତାଇପେଇ ଗସ୍ତ ସମ୍ପୃକ୍ତ ଅଞ୍ଚଳରେ ଉତ୍ତେଜନା ବୃଦ୍ଧିର କାରଣ ପାଲଟିଥିଲା। ଚାଇନା ପାର୍ଲାମେଣ୍ଟର ବାର୍ଷିକ ବୈଠକ ଆରମ୍ଭରେ ବିଦାୟୀ ପ୍ରଧାନମନ୍ତ୍ରୀ ଲି କେକିଆଙ୍ଗ୍ କହିଛନ୍ତି, ବେଜିଂ ନିଜର ‘ଓ୍ବାନ୍ ଚାଇନା’ ସିଦ୍ଧାନ୍ତକୁ ବଜାୟ ରଖିଛି। ଓ୍ବାନ୍ ଚାଇନା ପ୍ରିନ୍ସିପୁଲ୍ ଅନୁସାରେ ତାଇଓ୍ବାନ୍ ହେଉଛି ଚାଇନାର ଏକ ଅଂଶ। ପ୍ରଣାଳୀପାର ସମ୍ପର୍କରେ ଶାନ୍ତିପୂର୍ଣ୍ଣ ବିକାଶ ଏବଂ ଚାଇନାର ଶାନ୍ତିପୂର୍ଣ୍ଣ ଏକତ୍ରୀକରଣ ପ୍ରକ୍ରିୟାକୁ ଆମେ ପ୍ରୋତ୍ସାହନ ଦେବା ଉଚିତ ବୋଲି ଗ୍ରେଟ୍ ହଲ୍ ଅଫ୍ ଦି ପିପୁଲରେ ପ୍ରାୟ ୩,୦୦୦ ପ୍ରତିନିଧିଙ୍କୁ ସମ୍ବୋଧିତ କରି ଲି କହିଛନ୍ତି।
ଅଧିକାଂଶ ଲୋକ ଏକଚ୍ଛତ୍ରବାଦ ଶାସନ ଚାଲିଥିବା ଚାଇନାରେ ମିଶ୍ରଣ ଚାହୁଁ ନାହାନ୍ତି। କାରଣ ଚାଇନା ବଳପୂର୍ବକ ତାଇଓ୍ବାନ୍କୁ ନିଜ ନିୟନ୍ତ୍ରଣକୁ ନେବା ପାଇଁ ଉଦ୍ୟମ କରିଆସିଛି। ତାଇଓ୍ବାନ୍ ରାଷ୍ଟ୍ରପତି ସାଇ ଇଙ୍ଗ୍-ଓ୍ବେନ୍ ଚାଇନାକୁ ବାରମ୍ବାର ଆଲୋଚନା ପାଇଁ ପ୍ରସ୍ତାବ ଦେଇଥିଲେ ହେଁ ବେଜିଂ ତାଙ୍କୁ ଜଣେ ବିଚ୍ଛିନ୍ନତାବାଦୀ କହି ଅଗ୍ରାହ୍ୟ କରିଚାଲିଛି। ତେଣୁ ଏହି ଦ୍ୱୀପରାଷ୍ଟ୍ରର ୨୩ ନିୟୁତ ଲୋକ ହିଁ ନିଜ ଭବିଷ୍ୟତ ନିଷ୍ପତ୍ତି ନେଇପାରିବେ ବୋଲି ତାଇଓ୍ବାନ୍ ସରକାର କହିଛନ୍ତି। ୨୦୨୪ ଆରମ୍ଭରେ ତାଇଓ୍ବାନ୍ରେ ହେବାକୁ ଥିବା ରାଷ୍ଟ୍ରପତି ଓ ସଂସଦୀୟ ନିର୍ବାଚନ ବେଳେ ଚାଇନା ବିଭ୍ରାଟ ସୃଷ୍ଟି କରିପାରେ ବୋଲି ଆଶଙ୍କା କରାଯାଉଛି।
