ବଞ୍ଚୋ,୧୭ା୫(ପ୍ରଦୋଷ କୁମାର ବିଶ୍ୱାଳ):କେନ୍ଦୁଝର ଜିଲାର ଆନନ୍ଦପୁର ଉପଖଣ୍ଡର ବିଭିନ୍ନ ପେଟ୍ରୋଲ ପମ୍ପରେ ପେଟ୍ରୋଲ ଓ ଡିଜେଲ ପର୍ଯ୍ୟାପ୍ତ ପରିମାଣରେ ଉପଲବ୍ଧ ରହିଥିବା ସୂଚନା ମିଳିଛି। ଇନ୍ଧନ ସଙ୍କଟ ନେଇ କୌଣସି ଗୁଜବରେ ବିଶ୍ୱାସ ନ କରିବା ସହ ଅନାବଶ୍ୟକ ଭିଡ଼ ନକରିବାକୁ ପ୍ରଶାସନ ପକ୍ଷରୁ ସାଧାରଣ ଲୋକଙ୍କୁ ଅନୁରୋଧ କରାଯାଇଛି।
ଆଜି ଯୋଗାଣ ବିଭାଗ ପକ୍ଷରୁ ବିଭିନ୍ନ ଇନ୍ଧନ ପମ୍ପରେ ଅଚାନକ ଯାଞ୍ଚ କରାଯାଇଥିଲା। ଆନନ୍ଦପୁର ଉପଜିଲାପାଳ ନୀଳମାଧବ ସୁନାଙ୍କ ସମେତ ଅନ୍ୟ ବରିଷ୍ଠ ଅଧିକାରୀମାନେ ଏହି ଯାଞ୍ଚରେ ସାମିଲ ହୋଇ ପେଟ୍ରୋଲ ଓ ଡିଜେଲର ମହଜୁଦ, ପୂର୍ବରୁ ବିକ୍ରୟ ସ୍ଥିତି ଓ ରେକର୍ଡ ଯାଞ୍ଚ କରିଥିଲେ।
ଯାଞ୍ଚ ପରେ ଅଧିକାରୀମାନେ କହିଛନ୍ତି ଯେ, ଆନନ୍ଦପୁର ଉପଖଣ୍ଡରେ ଇନ୍ଧନର କୌଣସି ଅଭାବ ନାହିଁ ଏବଂ ସମସ୍ତ ପମ୍ପରେ ସାଧାରଣ ଭାବେ ବିକ୍ରୟ ଚାଲିଛି। ସେହିପରି ଲୋକମାନଙ୍କୁ ଶାନ୍ତ ରହି ସାଧାରଣ ଭାବରେ ଇନ୍ଧନ କ୍ରୟ କରିବାକୁ ପରାମର୍ଶ ଦେଇଥିଲେ।
