ଭଞ୍ଜନଗର,୧୭ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ଆଉ ୩ ଦିନ ପରେ ୨୦ ତାରିଖରେ ଉଦ୍ଯାପିତ ହେବ। ରବିବାର ପୂର୍ବତନ ମନ୍ତ୍ରୀ ବିକ୍ରମ କେଶରୀ ଆରୁଖ ଅସ୍ଥାୟୀ ମଣ୍ଡପରେ ପହଞ୍ଚି ଦେବୀଙ୍କୁ ପୂଜାର୍ଚ୍ଚନା କରିଥିଲେ। ଏଥିସହ ଯାତ୍ରା କମିଟି କାର୍ଯ୍ୟାଳୟକୁ ଯାଇ ସେଠୀ ସଭାପତି ରାଜେନ୍ଦ୍ର ବିଷୋୟୀ, କୋଷାଧ୍ୟକ୍ଷ ମହେଶ୍ୱର ପାତ୍ର ପ୍ରମୁଖଙ୍କ ସହ ଆଲୋଚନା କରିଥିଲେ। ଏହି ସମୟରେ ଜିଲୁଣ୍ଡି ସରପଞ୍ଚ ରଞ୍ଜିତ ଆରୁଖ, ଆଇନଜୀବୀ ଦିବାକର ନାୟକ, ମୁଦୁଲିପଲ୍ଲୀ ସମିତିସଭ୍ୟ ଲକ୍ଷ୍ମୀନାରାୟଣ ସ୍ବାଇଁ, ଭଞ୍ଜନଗର ମ୍ୟୁନିସିପାଲିଟିର କିଛି କାଉନସିଲର ଉପସ୍ଥିତ ଥିଲେ।
ଅପରପକ୍ଷେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯାତ୍ରାରେ ଯୋଗ ଦେବା ପାଇଁ ଦୁଇ ଦୁଇଥର କାର୍ଯ୍ୟକ୍ରମ ସ୍ଥିର ହୋଇଥିଲେ ମଧ୍ୟ ଶେଷ ମୁହୂର୍ତ୍ତରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟବ୍ୟସ୍ତତା ଯୋଗୁ ସେ ଆଜିସୁଦ୍ଧା ଯାତ୍ରାରେ ଯୋଗ ଦେଇ ପାରିନାହାନ୍ତି। ଆଜିଠାରୁ ଭାଜପା ରାଷ୍ଟ୍ରୀୟ ସଭାପତି ଦୁଇ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି। ତେଣୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟବ୍ୟସ୍ତତା ଯୋଗୁ ଭଞ୍ଜନଗର ଆସିବା ସମ୍ଭାବନା କମିଯାଇଛି।
ଏହିଭଳି ପରିସ୍ଥିତିରେ ରବିବାର ୩ ଜଣ ମନ୍ତ୍ରୀ, ୪ ଜଣ ବିଧାୟକ ଯାତ୍ରାରେ ଯୋଗଦେଇ ଦେବୀଙ୍କ ଦର୍ଶନ କରିବା ସହ ସାଂସ୍କୃତିକ କାର୍ଯ୍ୟକ୍ରମରେ ଅତିଥି ଭାବେ ଯୋଗ ଦେବାର କାର୍ଯ୍ୟକ୍ରମ ରହିଛି। ସେମାନେ ହେଲେ ପୂର୍ତ୍ତ, ଆଇନ ଓ ଅବକାରୀ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ,ଖଣି, ଇସ୍ପାତ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା, ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ, ସୋରଡ଼ା ବିଧାୟକ ନୀଳମଣି ବିଷୋୟୀ, ଫୁଲବାଣୀ ବିଧାୟକ ଉମା ଚରଣ ମଲ୍ଲିକ। ଏଥିସହ ଉକ୍ତ ସଭାରେ ଭଞ୍ଜନଗର ବିଧାୟକ ତଥା ଯାତ୍ରା କମିଟି ମୁଖ୍ୟ ଉପଦେଷ୍ଟା ପ୍ରଦ୍ୟୁମ୍ନ କୁମାର ନାୟକ ମଧ୍ୟ ଉପସ୍ଥିତ ରହିବେ।
ଅପରପକ୍ଷେ ଆଜି ଭଞ୍ଜନଗର ମ୍ୟୁନିସିପାଲିଟି ପକ୍ଷରୁ ଦେବୀଙ୍କୁ ନିମନ୍ତ୍ରଣ କରାଯାଇଛି । ତେଣୁ ମ୍ୟୁନିସିପାଲିଟି ପକ୍ଷରୁ ବିରାଟ ଶୋଭାଯାତ୍ରା ବାହାରିବ। ତେଣୁ ଯାତ୍ରାରେ ଆଜି ଅସମ୍ଭାଳ ଭିଡ଼ ହେବ। ଆଜୀ ଦେବୀ ଅସ୍ଥାୟୀ ମଣ୍ଡପରୁ ପୂର୍ବ ମୁଖା ହୋଇ ବାହାରିବା ପରେ ଟାଉନ ହଲ୍ ପର୍ଯ୍ୟନ୍ତ ଯିବେ। ସେଠାରୁ ପଶ୍ଚିମ ମୁଖା ହୋଇ ମ୍ୟୁନିସିପାଲିଟି କାର୍ଯ୍ୟାଳୟ ପର୍ଯ୍ୟନ୍ତ ଯିବେ। ସେଠାରେ ଦେବୀ ପୂଜା ପାଇବା ପରେ ରେଡକ୍ରସ ରୋଡ୍ ହୋଇ ଭେଜିପୁଟ, ହାର୍ଟ ନଗର ପର୍ଯ୍ୟନ୍ତ ଯିବେ। ସେଠାରୁ ବାହୁଡ଼ି କୋର୍ଟ ରୋଡ୍ ହୋଇ ମୁଖ୍ୟ ସଡ଼କକୁ ଆସି ଦେବୀ ବିଶ୍ରାମ ନେବାର କାର୍ଯ୍ୟକ୍ରମ ରହିଛି।
