ମସ୍କୋ,୨୬ା୧୨: ୟୁକ୍ରେନ୍ ଯୁଦ୍ଧର ସମସ୍ତ ପକ୍ଷଙ୍କ ସହ ଆଲୋଚନା ପାଇଁ ରୁଷିଆ ପ୍ରସ୍ତୁତ। କିତୁ କିଭ୍ ଓ ଏହାର ପାଶ୍ଚାତ୍ୟ ସମର୍ଥନକାରୀମାନେ ଆଲୋଚନା ପ୍ରସ୍ତାବକୁ ଅଗ୍ରାହ୍ୟ କରିଦେଇଛନ୍ତି ବୋଲି ରବିବାର ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ପ୍ରକାଶ କରିଛନ୍ତି।
ସେଣ୍ଟ୍ରାଲ ଇଣ୍ଟେଲିଜେନ୍ସ ଏଜେନ୍ସି (ସିଆଇଏ) ନିର୍ଦ୍ଦେଶକ ଓ୍ବିଲିୟମ୍ ବନର୍ସ ନିକଟରେ ପ୍ରକାଶିତ ଏକ ସାକ୍ଷାତ୍କାରରେ କହିଥିଲେ, ଅଧିକାଂଶ ସଂଘର୍ଷ ଆଲୋଚନା ଜରିଆରେ ହିଁ ଶେଷ ହୋଇଥାଏ। କିନ୍ତୁ ରୁଷିଆ ଯୁଦ୍ଧ ଶେଷ ପାଇଁ ଗମ୍ଭୀର ଥିବା ଭଳି ମନେହେଉନାହିଁ। ରୁଷିଆର ଏକ ସରକାରୀ ଟିଭି ଚ୍ୟାନେଲକୁ ରବିବାର ସାକ୍ଷାତ୍କାର ଦେଇ ଷ୍ଟ୍ରଙ୍ଗ୍ମ୍ୟାନ୍ ଭ୍ଲାଡିମିର ପୁଟିନ୍ କହିଛନ୍ତି, ସମାଧାନର ଗ୍ରହଣଯୋଗ୍ୟ ପନ୍ଥା ବାହାର କରିବା ପାଇଁ ଆମେ ସମସ୍ତ ସମ୍ପୃକ୍ତ ପକ୍ଷଙ୍କ ସହ ଆଲୋଚନା କରିବାକୁ ପ୍ରସ୍ତୁତ ଅଛୁ। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କିଙ୍କ ପରାମର୍ଶଦାତା ମିଖାଇଲୋ ପୋଡୋଲୟାକ୍ଙ୍କ ମତରେ ପୁଟିନ୍ ବାସ୍ତବତାକୁ ଫେରିବା ଆବଶ୍ୟକ। ରୁଷିଆ ଏକୁଟିଆ ୟୁକ୍ରେନ୍କୁ ଆକ୍ରମଣ କରି ନାଗରିକମାନଙ୍କୁ ହତ୍ୟା କରିଛି।
ମସ୍କୋ ଆଲୋଚନା ଚାହୁଁନାହିଁ, ବରଂ ନିଜ ମୁଣ୍ଡରୁ ଉତ୍ତରଦାୟିତ୍ୱ ଖସାଇବାକୁ ଚାହୁଁଛି। ପ୍ରକାଶ ଯେ, ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆର ଆକ୍ରମଣ କରିଥିଲା। ଦ୍ୱିତୀୟ ବିଶ୍ୱଯୁଦ୍ଧ ପରଠୁ ଏହା ହେଉଛି ୟୁରୋପରେ ସବୁଠୁ ଘାତକ ସଂଘର୍ଷ। ସେହିପରି ୧୯୬୨ କ୍ୟୁବା ମିଶାଇଲ୍ କ୍ରାଇସିସ୍ ପରେ ମସ୍କୋ ଓ ପାଶ୍ଚାତ୍ୟ ମଧ୍ୟରେ ସବୁଠୁ ବଡ଼ ମୁହଁାମୁହିଁ। ଇତିମଧ୍ୟରେ ଏହି ଯୁଦ୍ଧକୁ ୩୦୫ ଦିନ ବିତିଥିବାବେଳେ ରୁଷିଆର ସବୁ ଲକ୍ଷ୍ୟ ହାସଲ ନ ହେବା ଯାଏ ଲଢ଼େଇ ଜାରି ରହିବ ବୋଲି କ୍ରେମ୍ଲିନ୍ କହିଛି। କିଭ୍ର କହିବା ହେଲା କ୍ରିମିଆ ସମେତ ସମ୍ପୂର୍ଣ୍ଣ ୟୁକ୍ରେନୀୟ ଭୂଖଣ୍ଡରୁ ପ୍ରତ୍ୟେକ ରୁଷୀୟ ସୈନ୍ୟଙ୍କୁ ନ ଘଉଡ଼ାଇବା ପର୍ଯ୍ୟନ୍ତ ଲଢ଼େଇ କରାଯିବ।
