ଥିରୁଭାନନ୍ତପୁରମ୍, ୧୧।୯ : କଂଗ୍ରେସର ଭାରତ ଯୋଡ ଯାତ୍ରା ତାମିଲନାଡୁ ଦେଇ କେରଳରେ ପହଞ୍ଚିଛି। ରବିବାର ଭାରତ ଯାତ୍ରୀଙ୍କୁ କେରଳର ପାରାସାଲା ଅଞ୍ଚଳରେ ସ୍ବାଗତ କରାଯାଇଛି। ଏହା ସହିତ ଯାତ୍ରାର ୧୯ ଦିନିଆ କେରଳ ଯାତ୍ରା ମଧ୍ୟ ଆରମ୍ଭ ହୋଇଛି। ଏହି ଯାତ୍ରା ଆସନ୍ତା ୧୯ ଦିନ ପାଇଁ ରାଜ୍ୟର ବିଭିନ୍ନ ସ୍ଥାନ ଦେଇ ଯାତ୍ରା କରିବ ଏବଂ ୩୦ ସେପ୍ଟେମ୍ବରରେ କର୍ନାଟକରେ ପହଞ୍ଚିବ।
ରାହୁଲ ଗାନ୍ଧୀଙ୍କୁ କେରଳ ପ୍ରଦେଶ କଂଗ୍ରେସ କମିଟି (କେପିସିସି) ସଭାପତି ତଥା ଏମ୍ ପି. କେ ସୁଧାକରନ, ରାଜ୍ୟସଭାରେ ବିରୋଧୀ ଦଳର ନେତା ଭି ଡି ସାଥେସନ ଏବଂ ଏଆଇସିସି ସାଧାରଣ ସମ୍ପାଦକ ତାରିକ ଅନୱାର ଏବଂ ଅନ୍ୟ ନେତାମାନେ ସ୍ବାଗତ କରିଛନ୍ତି। ଏହି ସମୟରେ ରାହୁଲଙ୍କ ସହ ବହୁ ବଡ କଂଗ୍ରେସ ନେତା ଉପସ୍ଥିତ ଥିଲେ। ଏଥିମଧ୍ୟରେ କେରଳର ପୂର୍ବତନ ମୁଖ୍ୟମନ୍ତ୍ରୀ ଓମେନ ଚାଣ୍ଡି ଏବଂ ପୂର୍ବତନ ଏଲଓପି ରମେଶ ଚେନିଥାଲାଙ୍କ ବ୍ୟତୀତ କେସି ଭେନୁଗୋପାଲ ଏବଂ ଶଶି ଥରୁର ସାମିଲ ହୋଇଛନ୍ତି।
ସୂଚନା ଅନୁଯାୟୀ, କେରଳରେ ପ୍ରବେଶ କରିବା ପରେ ରାହୁଲ ଗାନ୍ଧୀ ଆଗାମୀ ୧୯ ଦିନ ମଧ୍ୟରେ ୪୫୦ କିଲୋମିଟର ଯାତ୍ରା କରି ମାଲାପୁରାମର ନୀଲାମ୍ବୁରକୁ ଯିବେ। ଏହି ଯାତ୍ରା ସେପ୍ଟେମ୍ବର ୧୪ ରେ କୋଲାମ ଜିଲାରେ ପ୍ରବେଶ କରିବ। ଏହା ପରେ ସେପ୍ଟେମ୍ବର ୧୭ ରେ ଆଲାପୁଝା ଏବଂ ସେପ୍ଟେମ୍ବର ୨୩ ରେ ଏର୍ନାକୁଲମ ଜିଲା ଦେଇ ଥ୍ରିସୁରରେ ପହଞ୍ଚିବ। ଏହା ପରେ ଯାତ୍ରାର ଅନ୍ୟ ପର୍ଯ୍ୟାୟ ଆରମ୍ଭ ହେବ ।
ସେପ୍ଟେମ୍ବର ୧୯ ରେ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଭାରତ ଯୋଡ ଯାତ୍ରାରେ ଯୋଗଦେବାର ସମ୍ଭାବନା ରହିଛି।
