କେନ୍ଦୁଝର,୨୧ା୫(ସ୍ବ.ପ୍ର.): ଚମ୍ପୁଆ ରେଞ୍ଜ ଅନ୍ତର୍ଗତ ଯୋଡ଼ା ସେକ୍ସନ ଅଧିନସ୍ଥ ବାଂଶପାଣି ବେହେରା ହାଟିଂ ନିକଟରେ ଗୁରୁବାର ରାତିରେ ମାଲବାହୀ ଟ୍ରେନ୍ ଧକ୍କାରେ ଦୁଇ ଛୁଆ ହାତୀ ସମେତ ତିନି ହାତୀର ମୃତ୍ୟୁ ଘଟଣାର ଯାଞ୍ଚ ପାଇଁ ପିସିସିଏଫ୍ (ବନ୍ୟପ୍ରାଣୀ) ଶଶୀ ପଲ ଚକ୍ରଧରପୁର ଡିଭିଜନର ଡିଭିଜନ ରେଲଓ୍ବେ ମ୍ୟାନେଜର ତଥା ଚମ୍ପୁଆ ରେଞ୍ଜରଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ବନ ବିଭାଗ ପକ୍ଷରୁ ହାତୀମାନଙ୍କ ଅବସ୍ଥିତି ସମ୍ପର୍କରେ ସୂଚନା ଦିଆଯାଇଥିଲେ ହେଁ ରେଳ ଚାଳକ ତଦନୁଯାୟୀ ଟ୍ରେନର ବେଗ ନିୟନ୍ତ୍ରଣ କରିବା ସହ ଲମ୍ବା ହ୍ବିସିଲ ମାରିଛନ୍ତି କି ନାହିଁ ତାହାର ଯାଞ୍ଚ କରାଯିବ। ଏଣୁ ସେ ସମୟରେ ଟ୍ରେନ୍ ଗତି କେତେ ଥିଲା ତାହା ମଧ୍ୟ ମଗାଯାଇଛି ବୋଲି ପିସିସିଏଫ୍ କହିଛନ୍ତି। ଅନ୍ୟପକ୍ଷରେ ଯେହେତୁ ଉକ୍ତ ଅଞ୍ଚଳରେ ରେଳପଥ ଜଙ୍ଗଲାଞ୍ଚଳରେ ରହିଛି, ଏହା ହାତୀ ଚଳପ୍ରଚଳ ଅଞ୍ଚଳ ଭାବେ ପରିଗଣିତ ହେଉଛି। ଏଣୁ ବାରମ୍ବାର ଏଭଳି ଅଘଟଣ ଘଟୁଥିବାରୁ ହାଇଟେକ୍ ପ୍ରକ୍ରିୟାରେ ହାତୀମାନଙ୍କ ସୁରକ୍ଷା କରିବା ନେଇ ବନ ବିଭାଗ ପଦକ୍ଷେପ ନେବାକୁ ଯୋଜନା ପ୍ରସ୍ତୁତ କରୁଥିବା ଜଣାପଡ଼ିଛି।
