ୱାଶିଂଟନ, ୧୪ା୫:ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଏକ ବିବାଦୀୟ ବୟାନ ଓ ସୋସିଆଲ ମିଡିଆ ପୋଷ୍ଟକରି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଛନ୍ତି। ଚାଇନା ଗସ୍ତରେ ଥିବା ସମୟରେ ଟ୍ରମ୍ପ ନିଜର ‘ଟ୍ରୁଥ୍ ସୋସିଆଲ’ ପ୍ଲାଟ୍ଫର୍ମରେ ଭେନେଜୁଏଲାର ଏକ ମାନଚିତ୍ର ପୋଷ୍ଟ କରିଛନ୍ତି, ଯେଉଁଥିରେ ଆମେରିକାର ପତାକା ସହ ଏହାକୁ ଆମେରିକାର ‘୫୧ତମ ରାଜ୍ୟ’ ଭାବେ ଦର୍ଶାଯାଇଛି। ଏହି ପୋଷ୍ଟଟି ଏପରି ଏକ ସମୟରେ ଆସିଛି, ଯେତେବେଳେ ଭେନେଜୁଏଲାର ମଧ୍ୟବର୍ତ୍ତିକାଳୀନ ରାଷ୍ଟ୍ରପତି ଡେଲସି ରୋଡ୍ରିଗୁଏଜ ଗୋଟିଏ ଦିନ ପୂର୍ବରୁ ସ୍ପଷ୍ଟ କରିଥିଲେ, ତାଙ୍କ ଦେଶ କେବେ ହେଲେ ଆମେରିକାର ୫୧ତମ ରାଜ୍ୟ ହେବା କଥା ଚିନ୍ତା କରିନାହିଁ। ସୂଚନାଯୋଗ୍ୟ ଯେ, ଚଳିତ ବର୍ଷ ଜାନୁଆରୀରେ ଆମେରିକୀୟ ସେନା ଦ୍ୱାରା ପୂର୍ବତନ ଶାସକ ନିକୋଲାସ ମାଦୁରୋଙ୍କୁ କ୍ଷମତାଚ୍ୟୁତ କରାଯାଇଥିଲା। ସେବେଠାରୁ ଭେନେଜୁଏଲାର ତୈଳ ସମ୍ପଦ ଉପରେ ଟ୍ରମ୍ପଙ୍କ ନଜର ରହିଛି। ପୂର୍ବରୁ ଟ୍ରମ୍ପ କାନାଡାକୁ ମଧ୍ୟ ଆମେରିକାର ୫୧ତମ ରାଜ୍ୟ କରିବା ନେଇ ବାରମ୍ବାର ପରିହାସ କରିଆସୁଥିଲେ। ୨୦୨୪ରେ ଜଷ୍ଟିନ୍ ଟ୍ରୁଡୋ ଏବଂ ପରେ ୨୦୨୫ରେ ମାର୍କ କାର୍ନେଙ୍କୁ ସେ କାନାଡ଼ା-ଆମେରିକାର ମିଶ୍ରଣ ପାଇଁ ପ୍ରସ୍ତାବ ଦେଇଥିଲେ। ମାତ୍ର କାନାଡା ଏହାକୁ ସିଧାସଳଖ ପ୍ରତ୍ୟାଖ୍ୟାନ କରିଥିଲା। ରୋଡ୍ରିଗୁଏଜ ଶାସନ ଭାର ଗ୍ରହଣ କରିବା ପରେ ଆମେରିକା ସହ
ସମ୍ପର୍କରେ କିଛିଟା ସୁଧାର ଆସିଛି। ସେଠାକାର ଖଣି ଏବଂ ତୈଳ କ୍ଷେତ୍ରକୁ ବିଦେଶୀ କମ୍ପାନୀ, ବିଶେଷକରି ଆମେରିକୀୟ କମ୍ପାନୀଙ୍କ ପାଇଁ ଖୋଲାଯାଇଛି। ମାତ୍ର ବିରୋଧୀ ଦଳ ପକ୍ଷରୁ ନିର୍ବାଚନ ପାଇଁ ଦାବି ହେଉଥିବା ବେଳେ ସରକାର ଏଥିପାଇଁ କୌଣସି ନିର୍ଦ୍ଦିଷ୍ଟ ସମୟସୀମା ଧାର୍ଯ୍ୟ କରିନାହାନ୍ତି। ଟ୍ରମ୍ପଙ୍କର ଏହି ‘୫୧ତମ ରାଜ୍ୟ’ ପୋଷ୍ଟ ଦକ୍ଷିଣ ଆମେରିକାର ଦେଶଗୁଡ଼ିକ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ବିଶେଷଜ୍ଞଙ୍କ ମତରେ, ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ସହ ଗୁରୁତ୍ୱପୂର୍ଣ୍ଣ ଶିଖର ସମ୍ମିଳନୀ ପୂର୍ବରୁ ଟ୍ରମ୍ପ ଏଭଳି ପୋଷ୍ଟ କରି ନିଜର ଶକ୍ତି ପ୍ରଦର୍ଶନ କରିବାକୁ ଚାହୁଁଛନ୍ତି।
Dharitri – Odisha’s No.1 Odia Daily
