ବାସୁଦେବପୁର,୧୪।୫(କାଳୀପଦ ରାୟ): ଭଦ୍ରକ ଜିଲା ବାସୁଦେବପୁର ବ୍ଲକ ବିଦେଇପୁର ୩୩ କେଭି ଷ୍ଟ୍ରକ୍ଚର ଠାରେ ବିଦ୍ୟୁତ ଆଘାତରେ ସହଦେଵ ତରେଇ ଆହତ ହୋଇଥିଲେ । ତାଙ୍କୁ କ୍ଷତିପୂରଣ ଦେବା ଦାବିରେ କରଞ୍ଜ ଆଡିଆର ଶତାଧିକ ଗ୍ରାମବାସୀ ବିଦେଇପୁର ବିଦ୍ୟୁତ କାର୍ଯ୍ୟାଳୟ ଆଗରେ ଗୁରୁବାର ସକାଳେ ଧାରଣାରେ ବସିଛନ୍ତି ।
ସୂଚନା ଅନୁଯାୟୀ କରଞ୍ଜ ଆଡିଆ ଗ୍ରାମର ସହଦେଵଙ୍କୁ ବିଦ୍ୟୁତ ତାର ସଜାଡ଼ିବା ପାଇଁ ଟିପିଏନଓଡିଏଲର କର୍ମଚାରୀମାନେ ଡାକିଥିଲେ । ଗତ ୨୦ ତାରିଖ ଦିନ ସହଦେଵ ଚରପୋଖରିଆ ଠାରେ ବିଦ୍ୟୁତ ତାର ସଜାଡୁ ଥିବା ବେଳେ ହଠାତ୍ ବିଦ୍ୟୁତ ପ୍ରବାହ ହେବାରୁ ସେ ଗୁରୁତର ଆହତ ହୋଇ ପଡ଼ିଥିଲେ । ତାଙ୍କୁ ପରିବାର ଲୋକେ ଉଦ୍ଧାର କରି ଚିକିତ୍ସା ପାଇଁ କଟକର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିଥିଲେ । ସେ ଏବେ ସୁଦ୍ଧା ସେଠାରେ ଚିକିତ୍ସାଧୀନ ଥିବା ବେଳେ ତାଙ୍କର ଡାହାଣ ହାତ କଟାଯାଇଛି, ତାଙ୍କ ଶରୀରର ବିଭିନ୍ନ ସ୍ଥାନରେ ଗୁରୁତର କ୍ଷତ ରହିଥିବା ବେଳେ ତାଙ୍କର ସ୍ୱାସ୍ଥ୍ୟ ଅବସ୍ଥା ଗୁରୁତର ରହିଛି ।
ଲୋକମାନଙ୍କର ଧାରଣାର ଖବର ପାଇ ବାସୁଦେବପୁର ନାୟିକାଣୀ ଡ଼ିହି ପୋଲିସ, ତହସିଲଦାର ପ୍ରିୟବ୍ରତ ଦାସ ଘଟଣାସ୍ଥଳରେ ପହଂଚି ଲୋକମାନଙ୍କୁ ବୁଝା ସୁଝା କରିଥିଲେ । ତହସିଲଦାର ଜିଲାପାଳ ଦିଲ୍ଲୀପ କୁମାର ରାଉତରାୟଙ୍କ ସହ ଫୋନରେ ଯୋଗାଯୋଗ କରିବା ପରେ ଜିଲାପାଳ ଆହତଙ୍କ ଚିକିତ୍ସା ପାଇଁ ରେଡ଼କ୍ରସ ପାଣ୍ଠିରୁ ନଗଦ ୨୫ ହଜାର ଟଙ୍କା ପ୍ରଦାନ ସହ ଏକ କମିଟି ଗଠନ କରି ଘଟଣାର ତଦନ୍ତ ପାଇଁ ପ୍ରତିଶୃତି ଦେବା ପରେ ଅପରାହ୍ନ ରେ ଧାରଣା ପ୍ରତ୍ୟାହୃତ ହୋଉଥିଲା । ଆହତଙ୍କ ବାପା ବସନ୍ତ ତରେଇ, ଭାଇ ଅଭିମନ୍ୟୁ ତରେଇ, ସାମାଜିକ କର୍ମୀ ରତିକାନ୍ତ ପ୍ରଧାନ, ଅଦୈତ୍ୟ ପ୍ରସାଦ ମହାପାତ୍ରଙ୍କ ସମେତ ଶତାଧିକ ଗ୍ରାମବାସୀ ଧାରଣାରେ ବସିଥିଲେ ।
