ପୁରୀ ଅଫିସ,୧୮ା୫: ଶ୍ରୀମନ୍ଦିର ଭିତର ସେବାୟତ ନିଯୋଗ ଏବଂ ହାଇଟେକ୍ ମେଡିକାଲ କଲେଜ ଓ ହସ୍ପିଟାଲ୍ ମଧ୍ୟରେ ମଙ୍ଗଳବାର ଏକ ରାଜିନାମା ସ୍ବାକ୍ଷରିତ ହୋଇଛି। ସେବାୟତ ନିଯୋଗର ପରିବାର ସଦସ୍ୟମାନଙ୍କୁ ହାଇଟେକ୍ ମେଡିକାଲ କଲେଜ ଶିକ୍ଷା ଓ ସ୍ବାସ୍ଥ୍ୟ ସୁବିଧା ଯୋଗାଇଦେବ। ଫାର୍ମାସିଷ୍ଟ ଓ ବିଜ୍ଞାନରେ ୧୦ଜଣ ଲେଖାଏ, ଯୁକ୍ତ୨ ବିଜ୍ଞାନ ଓ ଇଞ୍ଜିନିୟରିଂରେ ୧୫ ଜଣ ଲେଖାଏଙ୍କ ସମେତ ଅନ୍ୟ ବିଭାଗରେ ସେବାୟତ ଛାତ୍ରୀଛାତ୍ରଙ୍କୁ ଆଡମିଶନ ମିଳିବ। ହାଇଟେକ୍ କଲେଜ ପ୍ରତିବର୍ଷ ୫୦ ଜଣ ଭିତର ସେବାୟତ ନିଯୋଗର ପିଲାଙ୍କୁ ମାଗଣା ଶିକ୍ଷା ପ୍ରଦାନ କରିବ। ସେହିଭଳି ସ୍ବାସ୍ଥ୍ୟକ୍ଷେତ୍ରରେ ବୀମା ସେବା ଯୋଗାଇ ଦିଆଯିବ। ହାଇଟେକ୍ ଗ୍ରୁପ୍ର ଅଧ୍ୟକ୍ଷ ତିରୁପତି ପାଣିଗ୍ରାହୀ କହିଛନ୍ତି, ବୀମା ପାଇଁ ସମ୍ପ୍ରତି ସେବାୟତମାନଙ୍କର ୩ ଲକ୍ଷ ଟଙ୍କା ପର୍ଯ୍ୟନ୍ତ ସୁବିଧା ଥିବାବେଳେ ଏହାର ସିଂହଭାଗ ଅର୍ଥ ଖର୍ଚ୍ଚ କରିପାରୁନାହାନ୍ତି। ହାଇଟେକ୍ ଏହାର ସମାଧାନ କରୁଛି। ବୀମାର ସମ୍ପୂର୍ଣ୍ଣ ବ୍ୟବହାର କରାଯିବ। ଯାହା ଫଳରେ ସ୍ବାସ୍ଥ୍ୟଜନିତ ସମସ୍ୟାରେ ସ୍ବାସ୍ଥ୍ୟବୀମା ଅଭାବ ସେବାୟତମାନଙ୍କ କ୍ଷେତ୍ରରେ ଦେଖାଯିବ ନାହିଁ। ସେହିଭଳି ଗରିବ ମେଧାବୀ ସେବାୟତ ଛାତ୍ରୀଛାତ୍ରଙ୍କୁ ଶିକ୍ଷା ସୁବିଧା ଯୋଗାଇବାରେ ହାଇଟେକ୍ ବଳିଷ୍ଠ ଭୂମିକା ଗ୍ରହଣ କରିବ ବୋଲି ସେ କହିଛନ୍ତି। ସେବାୟତ କମିଟି ଛାତ୍ରୀଛାତ୍ରଙ୍କ ନାମ ସୁପାରିସ କରିବା ପରେ ଶିକ୍ଷା ସୁବିଧା ମିଳିପାରିବ। ଅନ୍ୟପକ୍ଷରେ ଶ୍ରୀମନ୍ଦିର ସମ୍ମୁଖରେ ଏକ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ସ୍ଥାପନ କରିବା ପାଇଁ ପୁରୀ ଜିଲାପାଳଙ୍କୁ ହାଇଟେକ୍ ପକ୍ଷରୁ ପ୍ରସ୍ତାବ ଦିଆଯାଇଛି। ଶ୍ରୀମନ୍ଦିର ଶ୍ରଦ୍ଧାଳୁଙ୍କୁ ଯୁଦ୍ଧକାଳୀନ ଭିତ୍ତିରେ ସ୍ବାସ୍ଥ୍ୟସେବା ଯୋଗାଇବା କ୍ଷେତ୍ରରେ ଏଭଳି ବ୍ୟବସ୍ଥା ସହାୟକ ହେବ। ଆମ୍ବୁଲାନ୍ସ ସେବା ସହ ଡାକ୍ତରମାନେ ମଧ୍ୟ ସ୍ବାସ୍ଥ୍ୟକେନ୍ଦ୍ରରେ ଉପସ୍ଥିତ ରହିବେ। ଏହି ପ୍ରସ୍ତାବକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବଙ୍କୁ ଜଣାଯିବ ଓ ନିଷ୍ପତ୍ତି ନିଆଯିବ ବୋଲି ଜିଲାପାଳ ସମର୍ଥ ବର୍ମା କହିଛନ୍ତି। ଉକ୍ତ କାର୍ଯ୍ୟକ୍ରମରେ ଜିଲାପାଳ, ହାଇଟେକ୍ ଅଧ୍ୟକ୍ଷ, ପରିଚାଳନା କମିଟି ସଦସ୍ୟ ଓ ସେବାୟତ ନିଯୋଗର ପ୍ରମୁଖମାନେ ଉପସ୍ଥିତ ଥିଲେ।
