ନୂଆଦିଲ୍ଲୀ,୯।୫: ଭାରତର ପ୍ରାୟ ଏକତୃତୀୟାଂଶ ମହିଳା ଶାରୀରିକ ଏବଂ ଯୌନହିଂସାର ଶିକାର ହୋଇଥାନ୍ତି। ଜାତୀୟ ପରିବାର ସ୍ବାସ୍ଥ୍ୟ ସର୍ଭେ-୫ (ଏନ୍ଏଫ୍ଏଚ୍ଏସ୍-୫) ରିପୋର୍ଟରେ ଏହା କୁହାଯାଇଛି। ଦେଶରେ ମହିଳାମାନଙ୍କ ପ୍ରତି ଘରୋଇ ହିଂସା ୩୧.୨ ପ୍ରତିଶତରୁ ୨୯.୩ ପ୍ରତିଶତକୁ ହ୍ରାସ ପାଇଛି। ଅନ୍ୟପକ୍ଷରେ ୧୮ରୁ ୪୯ ବର୍ଷ ବୟସ ବର୍ଗର ୩୦% ମହିଳା ୧୫ ବର୍ଷ ବୟସରୁ ଶାରୀରିକ ହିଂସାର ସମ୍ମୁଖୀନ ହେଉଥିବାବେଳେ ୬ ପ୍ରତିଶତ ସାରା ଜୀବନ ଏଭଳି ନିର୍ଯାତନାର ଶିକାର ହୋଇଥାନ୍ତି। ତେବେ ମାତ୍ର ୧୪ ପ୍ରତିଶତ ମହିଳା ସେମାନଙ୍କ ପ୍ରତି ହେଉଥିବା ଶାରୀରିକ କିମ୍ବା ଯୌନ ହିଂସା ବିରୋଧରେ ସ୍ବର ଉଠାଇଥାନ୍ତି ବୋଲି ରିପୋର୍ଟରେ ଦର୍ଶାଯାଇଛି। କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ଗୁରୁବାର ଉକ୍ତ ରିପୋର୍ଟକୁ ଉନ୍ମୋଚନ କରିଛନ୍ତି।
ପୂର୍ବରୁ ୧୫ରୁ ୪୯ ବର୍ଷ ବୟସ ବର୍ଗର ମହିଳାଙ୍କ ଉପରେ ଏନ୍ଏଫ୍ଏଚ୍ଏସ୍-୪ ରିପୋର୍ଟ ପ୍ରକାଶ ପାଇଥିବାବେଳେ ଏଥର ୧୮ରୁ ୪୯ ବର୍ଷ ବୟସର ମହିଳାଙ୍କୁ ସର୍ଭେରେ ସାମିଲ କରାଯାଇଥିଲା। ରିପୋର୍ଟ ଅନୁଯାୟୀ ୩୨ ପ୍ରତିଶତ ବିବାହିତା ମହିଳା (୧୮ରୁ ୪୯ ବର୍ଷ) ଶାରୀରିକ, ଯୌନ କିମ୍ବା ଭାବାବେଗଜନିତ ହିଂସାର ଶିକାର ହୋଇଥାନ୍ତି। ବୈବାହିକ ହିଂସା ମଧ୍ୟରୁ ଶାରୀରିକ ହିଂସା ସର୍ବାଧିକ ୨୮ ପ୍ରତିଶତ ହୋଇଥିବାବେଳେ ଏହା ପଛକୁ ଭାବାବେଗ ଜନିତ ହିଂସା ଓ ଯୌନ ହିଂସା ରହିଛି। କର୍ନାଟକରେ ମହିଳାଙ୍କ ପ୍ରତି ଘରୋଇ ହିଂସା ସର୍ବାଧିକ ୪୮ ପ୍ରତିଶତ ହୋଇଥିବାବେଳେ ଏହା ପଛକୁ ବିହାର, ତେଲଙ୍ଗାନା, ମଣିପୁର ଓ ତାମିଲନାଡୁ ରହିଛନ୍ତି। ଲାକ୍ଷାଦ୍ୱୀପରେ ଘରୋଇ ହିଂସା ସର୍ବନିମ୍ନ ୨.୧ ପ୍ରତିଶତ ରହିଛି।
ରିପୋର୍ଟ ଅନୁଯାୟୀ, ସହରାଞ୍ଚଳ ତୁଳନାରେ ଗ୍ରାମାଞ୍ଚଳ ମହିଳା ଅଧିକ ଶାରୀରିକ ହିଂସାର ସମ୍ମୁଖୀନ ହୋଇଥାନ୍ତି। ଗ୍ରାମାଞ୍ଚଳରେ ୩୨ ପ୍ରତିଶତ ମହିଳା ଶାରୀରିକ ହିଂସାର ଶିକାର ହେଉଥିବାବେଳେ ସହରାଞ୍ଚଳରେ ୨୪ ପ୍ରତିଶତଙ୍କୁ ଏଭଳି ହିଂସାର ସମ୍ମୁଖୀନ ହେବାକୁ ପଡ଼ିଥାଏ। ସେହିପରି ୧୮ ପ୍ରତିଶତ ଶିକ୍ଷିତା ମହିଳା ଏବଂ ୪୦ ପ୍ରତିଶତ ସ୍କୁଲ୍ ଯାଇ ନ ଥିବା ମହିଳା ଘରୋଇ ହିଂସାର ଶିକାର ହୋଇଥାନ୍ତି। ଗରିବ ପରିବାର ଅପେକ୍ଷା ସ୍ବଚ୍ଛଳ ପରିବାରରେ ଘରୋଇ ହିଂସା ଘଟଣା କମ୍ ଦେଖିବାକୁ ମିଳିଥାଏ। ସ୍ବଚ୍ଛଳ ବର୍ଗର ୧୭ ପ୍ରତିଶତ ମହିଳା ହିଂସାର ଶିକାର ହେଉଥିବାବେଳେ ଅସ୍ବଚ୍ଛଳ ବର୍ଗର ୩୯ ପ୍ରତିଶତଙ୍କୁ ଏଭଳି ନିର୍ଯାତନା ସହିବାକୁ ପଡ଼ିଥାଏ ବୋଲି ରିପୋର୍ଟରେ କୁହାଯାଇଛି।
୮୦ ପ୍ରତିଶତ ଶାରୀରିକ ହିଂସା ସ୍ବାମୀଙ୍କ ଦ୍ୱାରା ହୋଇଥାଏ। ୨୧ ପ୍ରତିଶତ ଶିକ୍ଷିତ ସ୍ବାମୀ ଘରୋଇ ହିଂସାରେ ସମ୍ପୃକ୍ତ ରହୁଥିବାବେଳେ ସ୍କୁଲ୍ ଯାଇ ନ ଥିବା ୪୩ ପ୍ରତିଶତ ସ୍ବାମୀ ଏଭଳି କାର୍ଯ୍ୟରେ ସାମିଲ ହୋଇଥାନ୍ତି। ସେହିପରି ମଦ୍ୟପ ସ୍ବାମୀଙ୍କ ଯୋଗୁ ମହିଳାମାନେ ଅଧିକ ଶାରୀରିକ କିମ୍ବା ଭାବାବେଗ ଜନିତ ହିଂସାର ସମ୍ମୁଖୀନ ହୁଅନ୍ତି। ରିପୋର୍ଟ ଅନୁଯାୟୀ ହିଂସାର ଶିକାର ହେଉଥିବା ମହିଳାଙ୍କ ମଧ୍ୟରୁ ୭୦ ପ୍ରତିଶତଙ୍କ ସ୍ବାମୀ ମଦ ପିଇଥାନ୍ତି।
