ନୂଆଦିଲ୍ଲୀ,୨୭।୩: ଷ୍ଟାର ମହିଳା ଶଟଲର ପି ଭି ସିନ୍ଧୁ ରବିବାର କ୍ୟାରିୟରରେ ଆଉ ଏକ ଟାଇଟଲ ହାସଲ କରିଛନ୍ତି। ସେ ଥାଇଲାଣ୍ଡର ବୁସାନାନ ଓଙ୍ଗବାମରୁନଫାନଙ୍କୁ ଫାଇନାଲରେ ହରାଇ ହାତେଇଛନ୍ତି ସୁଇସ୍ ଓପନ ଟ୍ରଫି। ସିନ୍ଧୁ ପ୍ରତିପକ୍ଷ ଖେଳାଳିଙ୍କୁ ୨୧-୧୬, ୨୧-୮ ଗେମ୍ରେ ହରାଇ ଦେଇଛନ୍ତି। ଏହି ବିଜୟ ଲାଗି ତାଙ୍କୁ ମାତ୍ର ୪୯ ମିନିଟ୍ ଲାଗିଥିଲା। ଚଳିତ ବର୍ଷ ଏହା ସିନ୍ଧୁଙ୍କ ଲାଗି ଦ୍ୱିତୀୟ ଟାଇଟଲ। ଏଥି ପୂର୍ବରୁ ସିନ୍ଧୁ ଜାନୁୟାରୀରେ ସୟଦ ମୋଦି ଇଣ୍ଡିଆ ଇଣ୍ଟରନ୍ୟାଶନାଲ ଟାଇଟଲ ଜିତିଥିଲେ।
ଅନ୍ୟପକ୍ଷରେ ସୁଇସ୍ ଓପନର ପୁରୁଷ ସିଙ୍ଗଲ୍ସ ବର୍ଗ ଟାଇଟଲ ଦୌଡ଼ରେ ରହିଛନ୍ତି ଏଚ୍ ଏସ୍ ପ୍ରଣୟ। ସେ ଫାଇନାଲରେ ଜୋନାଥନ ଖ୍ରୀଷ୍ଟିଙ୍କୁ ଭେଟିବେ।
