ଭୁବନେଶ୍ୱର,୧୨।୩(ବ୍ୟୁରୋ): କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର-୨୦୨୧ ଶୁକ୍ରବାର ପ୍ରଦାନ କରାଯାଇଛି। ନୂଆଦିଲ୍ଲୀର କମାନୀ ପ୍ରେକ୍ଷାଳୟରେ ଆୟୋଜିତ ଉତ୍ସବରେ ଏକାଡେମୀ ସଭାପତି ଚନ୍ଦ୍ରଶେଖର କମ୍ବର ଦେଶର ୨୪ଟି ଭାଷାର ପୁରସ୍କୃତ ଲେଖକଙ୍କୁ ପୁଷ୍ପଗୁଚ୍ଛ, ଅଙ୍ଗବସ୍ତ୍ର ଓ ଉପଢୌକନ ଦେଇ ସମ୍ବର୍ଦ୍ଧିତ କରିଥିଲେ। ଏଥିରେ ଓଡ଼ିଶାର ଦୁଇଜଣ ପୁରସ୍କୃତ ହୋଇଛନ୍ତି। କବି ଡ. ହୃଷୀକେଶ ମଲ୍ଲିକ ତାଙ୍କର କବିତା ପୁସ୍ତକ ‘ସରିଯାଇଥିବା ଅପେରା’ ଏବଂ ସାନ୍ତାଳୀ ଲେଖକ ନିରଞ୍ଜନ ହାଁସଦା ପୁରସ୍କୃତ ହୋଇଛନ୍ତି।
ଉତ୍ସବରେ ମୁଖ୍ୟଅତିଥି ଭାବେ ପ୍ରତିଷ୍ଠିତ ମରାଠୀ ଲେଖକ ଭାଲଚନ୍ଦ୍ର ନେମାଡ଼େ ଯୋଗଦେଇ କହିଲେ, ଭାରତୀୟ ସାହିତ୍ୟରେ ଭାରତୀୟତାର ଅନ୍ବେଷଣ ଓ ପ୍ରତିଷ୍ଠା ଲେଖକଙ୍କ ଲକ୍ଷ୍ୟ ହେବା ଉଚିତ। ଦକ୍ଷିଣ ଏସିଆର ଭାଷା ଓ ସାହିତ୍ୟ ସମଗ୍ର ପୃଥିବୀରେ ପ୍ରାଚୀନ। ଏହି ଦୃଷ୍ଟିରୁ ଭାରତୀୟ ସଂସ୍କୃତିର ପ୍ରାଚୀନତା ସର୍ବଜନ ସ୍ବୀକୃତ। ସାହିତ୍ୟ ଏକାଡେମୀ ୨୪ ଭାଷାରେ ପୁରସ୍କାର ପ୍ରଦାନ କରୁଥିଲେ ହେଁ ଆହୁରି ଅନେକ ଭାଷା ରହିଛି, ଯହିଁରେ ବଳିଷ୍ଠ ସାହିତ୍ୟ ସୃଷ୍ଟି ହେଉଛି। ପୁରସ୍କାର ପ୍ରଦାନ ପ୍ରସଙ୍ଗରେ ଏସବୁ ଭାଷାର ସାହିତ୍ୟକୁ ବିଚାରକୁ ନେବାର ଆବଶ୍ୟକତା ରହିଛି ବୋଲି ନେମାଡେ ଗୁରୁତ୍ୱାରୋପ କରିଥିଲେ। ଏକାଡେମୀ ସଭାପତି ଚନ୍ଦ୍ରଶେଖର କମ୍ବର କହିଲେ, ଭାରତୀୟ ଭାଷାର ବିବିଧତା ମଧ୍ୟରେ ଐତିହ୍ୟ ପ୍ରତିଷ୍ଠା ହେଉଛି ଭାରତୀୟ ସାହିତ୍ୟର ମୂଳ କଥା। ଉପସଭାପତି ମାଧବ କୌଶିକ କହିଲେ, ଏକାଡେମୀ ପୁରସ୍କାର ଅର୍ଥ ନୁହେଁ ଯେ ଏହା ଲେଖକଙ୍କୁ ପ୍ରତିଷ୍ଠା କରିଥାଏ। ସେଥିପାଇଁ ଏହାର ଗୁରୁତ୍ୱ ଲେଖକଙ୍କ ମଧ୍ୟରେ ରହିଛି। ଉତ୍ସବରେ ସଚିବ କେ. ଶ୍ରୀନିବାସ ରାଓ ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ। ଓଡ଼ିଆ ଭାଷା ଉପଦେଷ୍ଟା ମଣ୍ଡଳୀର ଆବାହକ ଡ. ବିଜୟାନନ୍ଦ ସିଂହ ଓ ସାନ୍ତାଳୀ ଭାଷାର ଆବାହକ ମଦନ ମୋହନ ସୋରେନ ଉପସ୍ଥିତ ଥିଲେ।
