ନୂଆଦିଲ୍ଲୀ/ଓ୍ବାଶିଂଟନ/ମସ୍କୋ,୮।୩ : ରୁଷିଆ ଏବଂ ୟୁକ୍ରେନ ଯୁଦ୍ଧ ଯୋଗୁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ସୋମବାରରେକର୍ଡ ସ୍ତରରେ ପହଞ୍ଚିଛି। ୨୦୦୮ ଗତ ୧୪ ବର୍ଷ ପରେ ଏହା ସର୍ବୋଚ୍ଚ ସ୍ତର ଛୁଇଁଛି। ବ୍ରେଣ୍ଟ ଅଶୋଧିତ ତୈଳ ଦର ବ୍ୟାରେଲ ପିଛା ୧୩୯ ଡଲାର ରେକର୍ଡ ସ୍ତରରେ ପହଞ୍ଚିଛି।
ତେବେ ଯୁଦ୍ଧ ଶେଷ ନ ହେଲେ ଏହା ବ୍ୟାରେଲ୍ ପିଛା ୩୦୦ ଡଲାରରେ ପହଞ୍ଚିବାର ଆଶଙ୍କା ରହିଛି। ଏସମ୍ପର୍କରେ ସୂଚନା ରୁଷିଆ ଉପ ପ୍ରଧାନମନ୍ତ୍ରୀ ଆଲେକ୍ସଜାଣ୍ଡାର ନୋଓ୍ବାକ୍ ପ୍ରଦାନ କରିଛନ୍ତି। ନୋଓ୍ବାକ୍ଙ୍କ ଏହି ସୂଚନା ରୁଷିଆ ଗଣମାଧ୍ୟମ ସଂସ୍ଥା ପକ୍ଷରୁ ପ୍ରକାଶ ପାଇଛି।
ଏଭଳି ହେଲେ ଭାରତ ସମେତ ପୃଥିବୀର ସମସ୍ତ ଦେଶରେ ପେଟ୍ରୋଲ ଏବଂ ଡିଜେଲ ଦାମ ଦୁଇଗୁଣା ହେବା ଆଶଙ୍କା ଘନେଇବାରେ ଲାଗିଛି। ଆମେରିକା ବିଦେଶମନ୍ତ୍ରୀ ଏଣ୍ଟୋନି ବ୍ଲିଙ୍କନ କହିଛନ୍ତି ଯେ, ଆମେରିକା ଏବଂ ୟୁରୋପୀୟ ଦେଶ ସମୂହ ରୁଷିଆରୁ ତୈଳ ଆମଦାନୀ ଉପରେ କଟକଣା ଲଗାଇବାକୁ ବିଚାର କରୁଛନ୍ତି। ରୁଷିଆ ବିଶ୍ୱର ବୃହତ୍ତମ ତୈଳ ଉତ୍ପାଦନକାରୀ ଦେଶ ମଧ୍ୟରୁ ଅନ୍ୟତମ। ରୁଷିଆ ୟୁରୋପକୁ ୪୦ ପ୍ରତିଶତ ତୈଳ ଏବଂ ଗ୍ୟାସ୍ ରପ୍ତାନୀ କରିଥାଏ। ଭାରତ ମଧ୍ୟ ରୁଷିଆଠାରୁ ଅଶୋଧିତ ତୈଳ କ୍ରୟ କରିଥାଏ।
ଜେପି ମୋର୍ଗାନ ପୂର୍ବାନୁମାନ କରିଛି ଯେ ୨୦୨୨ରେ ଅଶୋଧିତ ତୈଳ ଦର ବ୍ୟାରେଲ ପିଛା ୧୮୫ ଡଲାର ଛୁଇଁପାରେ। ଜେପି ମୋର୍ଗାନର ବିଶେଷଜ୍ଞଙ୍କ ଅନୁଯାୟୀ, ଯଦି ରୁଷିଆରୁ ଆସୁଥିବା ତୈଳ ଯୋଗାଣ ପ୍ରଭାବିତ ହୁଏ, ତେବେ ଏହା ଦିନକୁ ୩ ମିଲିୟନ ବ୍ୟାରେଲ ଅର୍ଥାତ୍ ୩୦ ଲକ୍ଷ ବ୍ୟାରେଲ ଅଶୋଧିତ ତୈଳର ଚାହିଦା ଉପରେ ପ୍ରଭାବ ପକାଇବ। ୨୦୦୮ରେ ଅଶୋଧିତ ତୈଳ ଦାମ ବ୍ୟାରେଲ ପିଛା ୧୪୭ ଡଲାର ଥିଲା।
