ମାଲକାନଗିରି, ୨୬।୧ (ଡି.ଏନ.ଏ.) – ରାଜ୍ୟ ଓ କେନ୍ଦ୍ର ସରକାର ଜନସାଧାରଣଙ୍କୁ ଉନ୍ନତମାନର ସ୍ବାସ୍ଥ୍ୟସେବା ଯୋଗାଇଦେବାକୁ ବହୁ ଅର୍ଥ ବ୍ୟୟ କରୁଛନ୍ତି। ମାତ୍ର ବାସ୍ତବତା ଏହାଠାରୁ ବହୁଦୂରରେ। କେଉଁଠି ଡାକ୍ତରଖାନାରେ ଚିକିତ୍ସା ଅଭାବରୁ ରୋଗୀଙ୍କ ମୃତ୍ୟୁ ହେଉଛି ତ କେଉଁଠି ରାସ୍ତା ନ ଥିବାରୁ ରୋଗୀ ପାଖରେ ପହଞ୍ଚତ୍ପାରୁନି ଆମ୍ବୁଲାନ୍ସ। ପରିବାର ଲୋକେ ବାଧ୍ୟହୋଇ କାଉଡ଼ି ଅବା ଖଟିଆରେ ରୋଗୀଙ୍କୁ ବୋହି ନେଉଛନ୍ତି ଡାକ୍ତରଖାନା। ମାଲକାନଗିରି ଜିଲା ଖଇରପୁଟ ବ୍ଲକ ଅନ୍ତର୍ଗତ ବଣ୍ଡାଘାଟିରେ ମଙ୍ଗଳବାର ଏପରି ଏକ ଦୃଶ୍ୟ ଦେଖିବାକୁ ମିଳିଛି। ବଣ୍ଡାଘାଟିର ବେଲଗୁଡ଼ା ଗ୍ରାମର ସମ୍ବାରି କିର୍ସାନିଙ୍କ ଦେହ ଅସୁସ୍ଥ ହେବାରୁ ତାଙ୍କୁ ଡାକ୍ତରଖାନା ନେବା ସମସ୍ୟା ହୋଇଥିଲା। କାରଣ ଘାଟି ଅଞ୍ଚଳ ରୂପେ ପରିଚିତ ଉକ୍ତ ଗ୍ରାମକୁ ରାସ୍ତା ନ ଥିଲା। ମୋବାଇଲ ସେବା ମଧ୍ୟ ନ ଥିବାରୁ ପରିବାର ଲୋକେ ଏବଂ ଗ୍ରାମବାସୀ ଏକ କାଉଡ଼ି ଓ ଝୁଡ଼ିରେ ସମ୍ବାରିଙ୍କୁ ବସାଇ ଦୀର୍ଘ ୧୨ କି.ମି. ବୋହି ଆଣି ମୁଦୁଲିପଡ଼ା ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ସମ୍ବାରିଙ୍କୁ ମୁଦୁଲିପଡ଼ାରୁ ଆମ୍ବୁଲାନ୍ସ ଯୋଗେ ଖଇରପୁଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଡାକ୍ତର ସ୍ଥାନାନ୍ତର କରିଥିଲେ। ଏବେ ସମ୍ବାରି ଖଇରପୁଟ ସ୍ବାସ୍ଥ୍ୟକେନ୍ଦ୍ରରେ ସୁସ୍ଥ ଥିବା ଜଣାପଡ଼ିଛି।
