ଯାଜପୁର ଅଫିସ,୧୮ା୧: ଯାଜପୁର ଜିଲା ବରୀ ବ୍ଲକର ୮୯ ଗ୍ରାମ ଓ କୋରେଇ ବ୍ଲକର ୧୫୮ ଗ୍ରାମ ପାଇଁ ୨ଟି ମେଗା ପାଇପ ଜଳଯୋଗାଣ ପ୍ରକଳ୍ପକୁ ପ୍ରଶାସନିକ ମଞ୍ଜୁରୀ ମିଳିଛି। ଏଥିରେ କୋରେଇ ବ୍ଲକ ପାଇଁ ୧୩୮.୬୯ କୋଟି ଏବଂ ବରୀ ବ୍ଲକ ପାଇଁ ୧୫୭.୪୮ କୋଟି ଭାବେ ମୋଟ ୨୯୬.୬୯ କୋଟି ଟଙ୍କା ବ୍ୟୟ ଅଟକଳ ରଖାଯାଇଛି। ଏନେଇ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କ କାର୍ଯ୍ୟାଳୟରୁ ଗତ ୧୫ ତାରିଖରେ ପଞ୍ଚାୟତିରାଜ ଓ ପାନୀୟ ଜଳ ବିଭାଗର ପ୍ରିନ୍ସିପାଲ ସେକ୍ରେଟାରୀଙ୍କୁ ସୂଚିତ କରାଯାଇଛି। ଏହି ପ୍ରକଳ୍ପଦ୍ୱୟ କାର୍ଯ୍ୟକାରୀ ହେଲେ ବରୀ ଓ କୋରେଇ ବ୍ଲକରେ ଲାଗି ରହିଥିବା ପାନୀୟ ଜଳ ସମସ୍ୟା ଦୂର ହେବ ବୋଲି ଆଶା କରାଯାଉଛି। ଅନ୍ୟପକ୍ଷେ ପୂର୍ବରୁ ନିର୍ମାଣାଧୀନ ୬ଟି ମେଗା ଜଳ ଯୋଗାଣ ପ୍ରକଳ୍ପରୁ ଗୋଟିଏ ବି ଶେଷ ହୋଇ ନଥିବାରୁ ସମ୍ପୃକ୍ତ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। କାର୍ଯ୍ୟରେ ବିଳମ୍ବ ଦେଖାଇ ଠିକାସଂସ୍ଥା ଏସ୍କାଲେଶନ ବିଲ ପାଇବାରେ ମଧ୍ୟ ସଫଳ ହୋଇଛନ୍ତି। ସୂଚନାଯୋଗ୍ୟ ଯେ, ସୁକିନ୍ଦା ବ୍ଲକର ୩୭ଟି ଗ୍ରାମକୁ ୭୯.୫୬ କୋଟି ଟଙ୍କା, ବଡଚଣା ଓ ଧର୍ମଶାଳା ବ୍ଲକ ପାଇଁ ୩୫୧.୪୪ କୋଟି ଟଙ୍କା, ଦଶରଥପୁର ବ୍ଲକର ୩୫ଟି ଗ୍ରାମ ପଞ୍ଚାୟତ ପାଇଁ ୧୯୧.୮୫ କୋଟି ଟଙ୍କା, ସୁକିନ୍ଦା ଖଣି ପ୍ରଭାବିତ ଅଞ୍ଚଳବାସୀଙ୍କ ପାଇଁ ପ୍ରଥମ ପ୍ରକଳ୍ପ ନିମନ୍ତେ ୧୦୬.୯୧ କୋଟି ଟଙ୍କା ଏବଂ ଦ୍ୱିତୀୟ ପ୍ରକଳ୍ପ ଲାଗି ୩୪.୪୬ କୋଟି ଟଙ୍କା ମଞ୍ଜୁର ହୋଇ ନିର୍ମାଣାଧୀନ ରହିଛି। ଏହିସବୁ ମେଗା ଜଳଯୋଗାଣ ପ୍ରକଳ୍ପକୁ ଅଣଓଡ଼ିଆ ଠିକାସଂସ୍ଥା ପକ୍ଷରୁ ନିର୍ମାଣ କରାଯାଉଛି। ସେମାନଙ୍କ ଉପରେ ବିଭାଗୀୟ ଅଧିକାରୀଙ୍କ କୌଣସି କର୍ତ୍ତୃତ୍ୱ ରହୁ ନ ଥିବାରୁ ମନମାନି କାମ ହେଉଛି। ଫଳରେ ବର୍ଷ ବର୍ଷ ଧରି କାମ ପଡ଼ି ରହୁଛି ବୋଲି ଅଭିଯୋଗ ହେଉଛନ୍ତି।
