ରାଞ୍ଚି,୨୭।୧: ଚଳିତବର୍ଷ ସାଧାରଣତନ୍ତ୍ର ଦିବସ ପୂର୍ବରୁ ପଦ୍ମ ପୁରସ୍କାର ଘୋଷଣା କରାଯାଇଛି। ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୧୧୯ ଜଣଙ୍କୁ ପୁରସ୍କାର ଦିଆଯିବ। ଝାଡଖଣ୍ଡର ଛୁଟନୀ ଦେବୀ ଏଥର ପଦ୍ମଶ୍ରୀ ପୁରସ୍କାର ପାଇବାକୁ ମନୋନୀତ ହୋଇଛନ୍ତି। ଜୀବନରେ ଅନେକ ପ୍ରତାଡନା ସହିଥିବା ଛୁଟନୀ ଏବେ ଚାରିଆଡେ ଚର୍ଚ୍ଚାରେ ଅଛନ୍ତି। ବିବାହର ୧୬ ବର୍ଷ ପରେ ଜଣେ ତାନ୍ତ୍ରିକଙ୍କ କଥାରେ ୧୯୯୫ରେ ତାଙ୍କୁ ଡାହାଣୀ କହି ମାରିଦେବାକୁ ଉଦ୍ୟମ କରାଯାଇଥିଲା। ଏକଥା ସେ ଜାଣିବା ପରେ ଜୀବନ ବଞ୍ଚାଇବା ପାଇଁ ୪ ପିଲାଙ୍କୁ ସାଥିରେ ଧରି ରାତାରାତି ଘରୁ ବାହାରି ପଳାଇ ଆସିଥିଲେ। ଗାଁ ଛାଡି ଆସି ୮ ମାସ ପର୍ଯ୍ୟନ୍ତ ସେ ଏକ ଗଛ ତଳେ ଆଶ୍ରୟ ନେଇଥିଲେ। ଏହାପରେ ବାପଘରେ ରହି ସମାଜରୁ ଡାହାଣୀ ପ୍ରଥା ଦୂର ପାଇଁ ଚେଷ୍ଟା ଚଳାଇଥିଲେ। ଗ୍ରାମବାସୀଙ୍କୁ ଏକାଠି କରି ସେ ଏହି ପ୍ରୟାସ ଆରମ୍ଭ କରିଥିଲେ। ନକ୍ସଲ ପ୍ରଭାବିତ ଅଞ୍ଜଳରେ ମହିଳାଙ୍କୁ ଏକତ୍ର କରି ଏକ ସଂଗଠନ କରି ଡାହାଣୀ ପ୍ରଥା ଦୂର ପାଇଁ ପ୍ରୟାସ ଜାରି ରଖିଛନ୍ତି। ଗତ ସୋମବାର ସନ୍ଧ୍ୟାରେ ହଠାତ୍ ତାଙ୍କ ଫୋନ୍ ଆସିଥିଲା ଯେ ଏଥର ତାଙ୍କୁ ପଦ୍ମଶ୍ରୀ ପୁରସ୍କାର ଦିଆଯିବ। ଏହା ଶୁଣି ସେ ବେଶ୍ ଖୁସିରେ କାନ୍ଦି ପକାଇଥିଲେ। ମାତ୍ର ତୃତୀୟ ଶ୍ରେଣୀ ପର୍ଯ୍ୟନ୍ତ ପଢିଥିବା ଛୁଟନୀ ଦେବୀ ୧୯୭୮ରେ ବିବାହ କରିଥିଲେ। ଏହାପରେ ଡାହାଣୀ ସନ୍ଦେହରେ ପ୍ରତାଡିତ ୧୨୫ ଜଣ ମହିଳାଙ୍କୁ ନେଇ ସେ ସଂଗଠନ କରିଥିଲେ। ଏହାସହ ସେ ଜଣେ ସାମାଜିକ କାର୍ଯ୍ୟକର୍ତ୍ତା ଭାବେ ମଧ୍ୟ କାର୍ଯ୍ୟ କରୁଛନ୍ତି।
