କାମାକ୍ଷାନଗର,୨୮।୪(ସୁଧୀର କୁମାର ପରିଡା): ଢେଙ୍କାନାଳ ଜିଲା କାମାକ୍ଷାନଗର ଅଞ୍ଚଳରେ ଏକ ଚାଞ୍ଚଳ୍ୟକର ଘଟଣା ସାମ୍ନାକୁ ଆସିଛି। ମା’ଙ୍କ ଚିକିତ୍ସା ପାଇଁ ଟଙ୍କା ରୋଜଗାର କରିବାକୁ ଆସି ଯୌନ ନିର୍ଯାତନାର ଶିକାର ହୋଇଛନ୍ତି ଜଣେ ନାବାଳିକା।
ନାବାଳିକା ଜଣକ ଅଞ୍ଚଳର ପରିଚିତ ବ୍ୟକ୍ତିଙ୍କ ପରାମର୍ଶରେ ଭୁବନେଶ୍ୱର ଆସିଥିଲେ। ଟଙ୍କା ରୋଜଗାର କରି ମା’ଙ୍କୁ ଭଲ କରିବା ନେଇ ମନରେ ଥିଲା ଗଭୀର ଆତ୍ମବିଶ୍ୱାସ। ହେଲେ ନାବାଳିକା ଜଣକ ଭୁବନେଶ୍ୱରରେ ପହଞ୍ଚିବା ପରେ ପରିଚିତ ବ୍ୟକ୍ତି ଜଣକ ତାଙ୍କୁ ୧ଲକ୍ଷ ଟଙ୍କାରେ ଅନ୍ୟଜଣଙ୍କୁ ବିକ୍ରି କରି ଦେଇଥିଲେ। ପରେ ସମ୍ପୃକ୍ତ ବ୍ୟକ୍ତି ଜଣକ ନାବାଳିକାଙ୍କୁ ଧରି ଉତ୍ତରପ୍ରଦେଶର ଝାନ୍ସି ନେଇଯାଇଥିଲେ। ସେଠାରେ କିଣିଥିବା ବ୍ୟକ୍ତି ଜଣକ ତିନିମାସ ଧରି ତାଙ୍କ ସହ ଶାରୀରିକ ସମ୍ପର୍କ ରଖିବା ପରେ ଗର୍ଭନଷ୍ଟ କରାଇ ଆଉ ଜଣକୁ ୫୦ ହଜାର ଟଙ୍କାରେ ବିକ୍ରି କରି ଦେଇଥିଲେ। ସେଠାରେ ମଧ୍ୟ ନାବାଳିକା ଜଣକ ବର୍ଷେ ଯୌନ ନିର୍ଯାତନା ଭୋଗିବା ପରେ ବହୁକଷ୍ଟରେ ଖସି ଆସି କାମାକ୍ଷାନଗର ଥାନା ପହଞ୍ଚି ଘଟଣା ସଂକ୍ରାନ୍ତରେ ଅଭିଯୋଗ କରିଛନ୍ତି।
ଏପରିକି କଙ୍କଡାହାଡ଼ ଥାନା ଅଞ୍ଚଳର ଜଣେ ଦଲାଲ ତାଙ୍କୁ ଚାକିରୀରେ ରଖାଇଦେବାକୁ କହି ବିକ୍ରି କରି ଦେଇଥିବା ନାବାଳିକା ଜଣକ ଅଭିଯୋଗ କରିଛନ୍ତି। ଅଭିଯୋଗର ଗୁରୁତ୍ୱକୁ ଦୃଷ୍ଟିରେ ରଖି କାମାକ୍ଷାନଗର ପୋଲିସ କଙ୍କଡାହାଡ଼ ଥାନା ଅଞ୍ଚଳର ଦଲାଲଙ୍କୁ ଧରିବା ପାଇଁ ଉଦ୍ୟମ ଆରମ୍ଭ କରିଥିବା ବେଳେ ଏହିପରି ଅନେକ ଝିଅଙ୍କୁ ଦଲାଲ ଜଣକ ବିକ୍ରି କରୁଥିବା ଜଣାପଡିଛି। ଏନେଇ କାମାକ୍ଷାନଗର ଥାନାରେ ଏକ ମାମଲା(ନଂ.୩୫୪/୨୬) ରୁଜୁ ହୋଇଥିବା ବେଳେ କାମାକ୍ଷାନଗର ଏସଡିପିଓ ଚିତ୍ତରଞ୍ଜନ ବେହେରା ତୁରନ୍ତ ଆସାମୀଙ୍କୁ ଧରିବା ପାଇଁ ପୋଲିସ ପଦକ୍ଷେପ ନେଉଥିବା କହିଛନ୍ତି।
Dharitri – Odisha’s No.1 Odia Daily
