ଭୋଗରାଇ,୨୮।୫( ପ୍ରଦୀପ ଦାସ ): ବାଲେଶ୍ୱର ଜିଲା ଭୋଗରାଇ ବ୍ଲକ କମର୍ଦ୍ଦା – ବାଲିଆପାଳ ରାସ୍ତା ଜଳଧା ଗ୍ରାମ ଛକ ଠାରେ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ଗୁରୁବାର ସକାଳେ ପଶ୍ଚିମବଙ୍ଗରୁ ବାଲିଆପାଳ ଅଭିମୁଖେ ଯାଉଥିବା ଏକ ଲୁଣ ବୋଝେଇ ଇଞ୍ଜିନ ରିକ୍ସା ଭାରସାମ୍ୟ ହରାଇ ରାସ୍ତା ପାର୍ଶ୍ୱକୁ ଓଲଟି ପଡିଥିଲା । ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ରିକ୍ସା ତଳେ ଚାପି ହୋଇଥିବା ରିକ୍ସା ଚାଳକ ଓ ଖାଲାସୀକୁ ଉଦ୍ଧାର କରି କମର୍ଦ୍ଦା ଜଳେଶ୍ୱରପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ ।
ଡାକ୍ତର ସେଠାରେ ପଶ୍ଚିମବଙ୍ଗ ପୂର୍ବ ମେଦିନୀପୁର ଜିଲା ରାମନଗର ଥାନା ଦେଉଳି ଗ୍ରାମର ଖାଲାସୀ ମଣ୍ଟୁପାଳ (୩ ୮ )ଙ୍କୁ ମୃତ ଘୋଷଣା କରିଥିବା ବେଳେ ରିକ୍ସା ଚାଳକ ସୁକୁମାର ଭୂୟାଁଙ୍କୁ ଆହତ ବସ୍ଥାରେ ଚିକିତ୍ସା କରାଯାଉଛି । କମର୍ଦ୍ଦା ପୋଲିସ ଏହି ଦୁର୍ଘଟଣାରେ ଏକ ଅପମୃତ୍ୟୁ ମାମଲା ରୁଜୁକରି ଶବକୁ ଜଳେଶ୍ୱରପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇ ପ୍ରାଥମିକ ତଦନ୍ତ ଜାରି ରଖିଥିବାର ସୂଚନା ମିଳିଛି ।
