ଦାରିଙ୍ଗବାଡ଼ି,୨୮ା୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ଶିଶୁଶ୍ରମିକ ନିରୋଧ ଯୋଜନା ଫେଲ୍ ମାରୁଛି। ପ୍ରତି ମାସରେ ଏନେଇ ଟାସ୍କ ଫୋର୍ସର ଘନଘନ ବୈଠକ ସତ୍ତ୍ୱେ ଅଞ୍ଚଳରେ ଶିଶୁଶ୍ରମିକଙ୍କ ସଂଖ୍ୟା କମିବାରେ ନାମ ଧରୁନି। ଏଭଳି ଘଟଣା ଦେଖିବାକୁ ମିଳିଛି ଉକ୍ତ ବ୍ଲକ ସିମନବାଡ଼ି ଅଞ୍ଚଳରେ। ଗୁରୁବାର ମଧ୍ୟାହ୍ନ ଖରାରେ କିଛି ନାବାଳିକାଙ୍କୁ ଏକ ପିକଅପ୍ ଭ୍ୟାନ୍ରେ ଆମ୍ବ ତୋଳିବାକୁ ବୋହି ନିଆଯାଉଥିବା ଘଟଣା ବୁଦ୍ଧିଜୀବୀ ମହଲରେ ତୀବ୍ର ନିନ୍ଦା କରାଯିବା ସହ ଅସନ୍ତୋଷ ଦେଖାଯାଇଛି। ଦାରିଙ୍ଗବାଡ଼ି ପଟୁ ବାଲିଗୁଡାକୁ ସଂଯୋଗ କରୁଥିବା ୫୯ ନଂ ଜାତୀୟ ରାଜପଥର ସିମନବାଡ଼ି ଛକରେ ଏହି ପିକଅପ୍ ଭ୍ୟାନ ରହିଥିବା ଦେଖି କିଛି ବୁଦ୍ଧିଜୀବୀ କନ୍ଧମାଳ ଶିଶୁ ସୁରକ୍ଷା ଅଧିକାରୀ ରଶ୍ମିତା କରଣ, ଦାରିଙ୍ଗବାଡ଼ି ସିଡିପିଓ ସନ୍ଧ୍ୟାରାଣୀ ପଣ୍ଡା ଏବଂ ଆଇଆଇସି ସଂଗ୍ରାମ କେଶରୀ ଜେନାଙ୍କୁ ଫୋନ୍ କରିଥିଲେ। ଫୋନ ପାଇ ଦାରିଙ୍ଗବାଡ଼ି ଆଇଆଇସିଙ୍କ ନିର୍ଦ୍ଦେଶ କ୍ରମେ ସବ୍ଇନ୍ସପେକ୍ଟର ଲକ୍ଷ୍ମୀ ମାଝୀ ସଦଳବଳ ଉକ୍ତ ପିକଅପ୍କୁ ପିଛା କରିଥିଲେ ମଧ୍ୟ ପୋଲିସ ତାଙ୍କୁ ଧରିବାରେ ଅସମର୍ଥ ହୋଇଥିଲା।
ଗୋଟିଏ ପଟେ ରାଜ୍ୟ ସରକାର ଶ୍ରମିକଙ୍କୁ ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ କାମ ନ କରିବାକୁ ନିର୍ଦ୍ଦେଶ ଦେଇଥିବା ବେଳେ ଏଠି ଖୋଲାଖୋଲି ନିୟମ ଉଲ୍ଲଘଂନ କରାଯାଇ ନାବାଳିକାମାନଙ୍କୁ ପ୍ରଚଣ୍ଡ ରୌଦ୍ରତାପରେ ଶ୍ରମିକ ଭାବେ କାର୍ଯ୍ୟରେ ନିୟୋଜିତ କରାଯାଉଥିବା ଅଭିଯୋଗ ହେଉଛି। ଅଞ୍ଚଳରେ ବାଲ୍ୟ ବିବାହ ଏବଂ ଶିଶୁଶ୍ରମିକଙ୍କ ସୁରକ୍ଷା ପାଇଁ ସରକାର ଲକ୍ଷଲକ୍ଷ ଟଙ୍କା ଖର୍ଚ୍ଚ କରି ପ୍ରତିମାସରେ ସ୍ବେଚ୍ଛାସେବୀ ଅନୁଷ୍ଠାନ ଓ ସରକାରୀ ଅଧିକାରୀମାନଙ୍କୁ ନେଇ କମିଟି ଗଠନ କରି ବ୍ୟାପକ ସଚେତନ କରାଉଥିଲେ ମଧ୍ୟ ଏହାର ତଦାରଖର ଅଭାବ ଯୋଗୁ ଏବେ ମଧ୍ୟ ଉକ୍ତ ଅଞ୍ଚଳରେ ଶିଶୁଶ୍ରମିକମାନେ ବିଭିନ୍ନ କଷ୍ଟ କାର୍ଯ୍ୟରେ ନିୟୋଜିତ ହେଉଛନ୍ତି ବୋଲି ଅଭିଯୋଗ ହେଉଛି।
ଏନେଇ ସିଡିପିଓ ପଣ୍ଡାଙ୍କୁ ପଚାରିବାରୁ ସେ ଖବର ପାଇ ଦାରିଙ୍ଗବାଡ଼ି ଥାନାକୁ ଜଣାଇଥିଲେ। ତେବେ ପୋଲିସ ଘଟଣାସ୍ଥଳରେ ପହଞ୍ଚିଥିଲେ ମଧ୍ୟ ଶିଶୁଶ୍ରମିକ ନେଇ ଯାଉଥିବା ପିକଅପ୍ର ସନ୍ଧାନ ମିଳିଲା ନାହିଁ। ଘଟଣାର ତଦନ୍ତ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
