ଭୁବନେଶ୍ୱର, ୧୮ା୩(ବ୍ୟୁରୋ): ବର୍ଷବର୍ଷ ଧରି ହୋଲଡିଂ ଟ୍ୟାକ୍ସ ଦେଇ ନ ଥିବା ୩୪୩ଜଣ ବଡ଼ ଖିଲାପକାରୀଙ୍କ ତାଲିକା ରାଜଧାନୀର ବିଭିନ୍ନ ରାସ୍ତା ପାର୍ଶ୍ୱରେ ଥିବା ବଡ଼ ହୋର୍ଡ଼ିଂରେ ଲଗାଯାଇଛି। ସେମାନଙ୍କ ନାମକୁ ସର୍ବ ସାଧାରଣରେ ପ୍ରକାଶ କରିବା ସହ ସେମାନେ ମୋଟ ୧୧ କୋଟି ଟଙ୍କାର ଟ୍ୟାକ୍ସ ବକେୟା ରଖିଥିବା ଭୁବନେଶ୍ୱର ମହାନଗର ନିଗମ ବିଏମ୍ସି ସୂଚନା ଦେଇଛି। ବର୍ଷ ବର୍ଷ ଧରି ଯେଉଁମାନେ ହୋଲ୍ଡିଂ ଟ୍ୟାକ୍ସ ଦେଇ ନାହାନ୍ତି ସେମାନଙ୍କ ନାମ ହୋର୍ଡିଂରେ ଉଲ୍ଲେଖ ରହିଛି ବୋଲି ବିଏମ୍ସି ଆଡିଶନାଲ କମିଶନର ସୁରଥଚନ୍ଦ୍ର ମଲ୍ଲିକ କହିଛନ୍ତି। ବିଏମ୍ସି କର୍ତ୍ତୃପକ୍ଷ ଓ ୱାର୍ଡ ଅଫିସରମାନେ ଅନେକ ଚେଷ୍ଟା କରି ବକେୟା ଟଙ୍କା ଆଦାୟ କରିପାରୁ ନାହାନ୍ତି। ତେଣୁ ହୋର୍ଡିଂ ଜରିଆରେ ଖିଲାପକାରୀଙ୍କ ନାମ ଘୋଷଣା କରିବାକୁ ବିଏମ୍ସି ବାଧ୍ୟ ହୋଇଛି। ଟ୍ୟାକ୍ସ ବାବଦକୁ ବାକି ଥିବା ଟଙ୍କା ପଇଠ ନ କଲେ ଓପିଡିଆର୍ ଆଇନ ଅନୁଯାୟୀ ସେହି ଟଙ୍କା ଆଦାୟ ହେବ ବୋଲି ମଲ୍ଲିକ କହିଛନ୍ତି।
ଭୁବନେଶ୍ୱର ସହରର ପ୍ରମୁଖ ସ୍ଥାନ ବାଣୀବିହାର, ଜୟଦେବ ବିହାର, ଗଙ୍ଗନଗର, ମାଷ୍ଟରକ୍ୟାଣ୍ଟିନ୍ ଆଦି ସ୍ଥାନରେ ଟ୍ୟାକ୍ସ ଖିଲାପକାରୀଙ୍କ ନାମ ସହ ସମ୍ପୂର୍ଣ୍ଣ ତଥ୍ୟକୁ ବିଏମ୍ସି ଦ୍ୱାରା ଲଗାଯାଇଛି। ସ୍ମାର୍ଟ ସିଟିକୁ ଆହୁରି ସୁନ୍ଦର କରିବାକୁ ହେଲେ ସାଧାରଣ ଲୋକଙ୍କ ସହାୟତାର ଆବଶ୍ୟକ ରହିଛି। ଠିକ୍ ସମୟରେ ଟ୍ୟାକ୍ସ ଦେଇ ବିଏମ୍ସିକୁ ସାହାଯ୍ୟ କରିବାକୁ ପ୍ରତି ୱାର୍ଡ଼ରେ ସାଧାରଣ ଲୋକଙ୍କୁ କର୍ପୋରେଟରମାନେ ପୂର୍ବରୁ ସଚେତନ ମଧ୍ୟ କରାଉଥିଲେ। ତଥାପି କୋଟି କୋଟି ଟଙ୍କା ବାକି ପଡ଼ି ରହିଛି ବୋଲି ମଲ୍ଲିକ କହିଛନ୍ତି।
