ଦେବଗଡ,୧୫।୪(ଶଶାଙ୍କ ଶେଖର ଝାଙ୍କର): ବିବାହ ପ୍ରଲୋଭନ ଦେଖାଇ ଜଣେ ଛାତ୍ରୀଙ୍କ ସହିତ ଶାରୀରୀକ ସମ୍ପର୍କ ସ୍ଥାପନ କରିବା ପରେ ପ୍ରତାରଣା ଅଭିଯୋଗରେ ଏକ କଲେଜର ଜଣେ ଅଧ୍ୟାପକ ଗିରଫ ହେବା ଘଟଣା ଆଜି ମୁଖ୍ୟ ଚର୍ଚ୍ଚାର ବିଷୟ ସାଜିଛି । ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଦେବଗଡ ସହରର ଏକ ମହାବିଦ୍ୟାଳୟର ନିଳାଞ୍ଚଳ ରାଜହଂସ ନାମକ ଜଣେ ଅଧ୍ୟାପକ ଉକ୍ତ ମହାବିଦ୍ୟାଳୟର ଯୁକ୍ତ ୩ ଶ୍ରେଣୀର ଜଣେ ଛାତ୍ରୀଙ୍କୁ ୨୦୨୪ ସେପ୍ଟେମ୍ବର ମାସରୁ ପ୍ରେମ ଫାଶରେ ଫସାଇବା ସହ ବିବାହ ପ୍ରଲୋଭନ ଦେଖାଇ ଅନେକବାର ଶାରୀରୀକ ରଖି ଆସୁଥିଲେ । ୨୦୨୫ ଜାନୁଆରୀରେ ଉଭୟେ ଦେଓଝରଣ ପର୍ଯ୍ୟଟନସ୍ଥଳୀକୁ ଯାଇ ପ୍ରଥମଥର ପାଇଁ ଶାରୀରୀକ ସମ୍ପର୍କ ରଖିଥିବାବେଳେ ପରବର୍ତ୍ତୀ ସମୟରେ ମଧ୍ୟ ଏହା ଜାରି ରହିଥିଲା । ଗତ ୧୧ ତାରିଖ ଦିନ ଅଧ୍ୟାପକ ରାଜହଂସ ବିବାହ ପ୍ରଲୋଭନ ଦେଖାଇ ଉକ୍ତ ଛାତ୍ରୀଙ୍କୁ ଡାକିବାରୁ ଛାତ୍ରୀ ଜଣକ ଘର ଲୋକଙ୍କୁ ନଜଣାଇ କଲେଜ ଯିବା ବାହାନାରେ ଘରୁ ପଳାଇ ଆସିଥିଲେ। ଉଭୟେ ଭବାନୀପାଟଣା ଯିବାସହ ସେଠାରେ ଥିବା ରାଜହଂସଙ୍କ ଭଡା କୋଠରୀରେ ରହିଥିଲେ। ଏହା ପରିଦିନ ଅର୍ଥାତ୍ ଗତ ୧୨ ତାରିଖ ସକାଳେ ଉଭୟେ ଏକ ବାଇକ ଯୋଗେ ଏଠାକୁ ଆସିଥିଲେ ଓ ରାଜହଂସ ତାଙ୍କୁ ଦେବଗଡରେ ଛାଡି ଦେଇଥିଲେ । ଛାତ୍ରୀ ଜଣକ ବିବାହ କଥା କହିବାରୁ ଅଧ୍ୟାପକ ରାଜହଂସ ତାଙ୍କୁ ରୋକଠୋକ ଭାବେ ମନା କରିଦେଇଥିଲେ। ଫଳରେ ଛାତ୍ରୀ ଜଣକ ଘରକୁ ଫେରି ଏକଥା ପରିବାର ଲୋକଙ୍କୁ ଜଣାଇବା ସହ ସୋମବାର ଏନେଇ ଦେବଗଡ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ଆଧାରରେ ଦେବଗଡ ଥାନା ପୋଲିସ ଅଧ୍ୟାପକ ରାଜହଂସଙ୍କ ବିରୁଦ୍ଧରେ ବିଭିନ୍ନ ଦଫାରେ ୧୯୬/୨୬ରେ ଏକ ମାମଲା ରୁଜୁକରି ଘଟଣାର ତଦନ୍ତ ଚଳାଇଥିଲା। ମଙ୍ଗଳବାର ତାଙ୍କୁ ଗିରଫ କରି ସନ୍ଧ୍ୟାରେ କୋର୍ଟ ଚାଲାଣ କରିଥିବା ଜଣାପଡିଛି । ଏ ଘଟଣା ପ୍ରଘଟ ହେବାପରେ ଦେବଗଡ ସହରରେ ଏହା ମୁଖ୍ୟ ଚର୍ଚ୍ଚାର ବିଷୟ ପାଲଟିଛି।
