କେଗାଁ, ୨୬।୨ (ଡି.ଏନ୍.ଏ.)- କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଚପ୍ରିଆ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ରହିଛେ କେଗାଁ ପ୍ରାଥମିକ ସ୍ବାସ୍ଥ୍ୟ ଉପକେନ୍ଦ୍ର। ଉପକେନ୍ଦ୍ରଟା ଭଂଗା ଦଦ୍ରା ହେଇ ବିପଦ୍ ଅବସ୍ତାରେ ରହିଛେ। ଏନ୍ତାଥି ଇଠାନେ କାମ୍ କରୁଥିବାର ସୁଆସ୍ତିଅ କରମୀ ଝନ୍କ ନିଜର ଜୀବନ୍କେ ପାଏନ୍ ଛଡ଼େଇ ଇ ଦଦ୍ରା ଘରେ ରହୁଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ଇ ସ୍ବାସ୍ଥ୍ୟ ଉପକେନ୍ଦ୍ରର କୁଠାଟା ୩୫ ବଛର ପୁରନା। ଆଏଜ୍କେ ୫ ବଛର ତଲେ ଘରଟାକେ ବିପଦ ବଲି ବିଭାଗ ତରଫୁ ଘୋଷନା କରାଯାଇଛେ। କୁଠାର ଭିତ୍ରି ଫାଲର ଛାତ୍ରୁ ଭିନେ ଭିନେ ସମିଆରେ ଚକ୍ଡ଼ା ଚକ୍ଡ଼ା ସିମେଟ ପଲସ୍ତର ଛାଡ଼ି ଲୁହା ଛଡ଼୍ ଜଲ୍ଜଲ୍ ଦିଶୁଛେ। ବରଷା ଦିନେ ଇ ସମସିଆଟା ଦୁଇଗୁନା ହେଇଯାଉଛେ, ଛାତୁ ଅନବରତ ପାଏନ୍ ଗଲୁଛେ। ଛାତ୍ରେ ତାରପଲିନ୍ ଢପା ହେଇଥିଲେ ବି ସେଟା ଖରାବରଷା ଖାଇ ଖରାପ ହେଇଯାଉଛେ। ଇ ବିପଦ୍ ଅବସ୍ତାରେ ଥିବାର କୁଠାରେ ଜୀବନ୍କେ ପାଏନ୍ ଛଡ଼େଇ ସୁଆସ୍ତିଅ କରମୀ ଝନ୍କ ଲୁକ୍କୁ ସୁଆସ୍ତିଅ ସେବା ଯୁଗେଇ ଆସୁଛନ୍। ହେଲେ କେତେବେଲେ କେନ୍ପରକାର ଅଘଟନ ଘଟି ଧନ୍ ଜୀବନ୍ର କ୍ଷୟକ୍ଷତି ହେବା କିଛି କହି ନାଇଁହୁଏ ବଲି ସୁଆସ୍ତିଅ କରମୀ ସ୍ବର୍ଣ୍ଣଲତା ମଲ୍ଲିକ କହିଛନ୍। ଇ ବାବ୍ଦେ ବାରବାର ଉଚ କତୁରପକ୍ଷକୁଁ କୁହାଯାଉଥିଲେ ବି ନୂତନ କୁଠା ତିଆର କି ଇତାର ବିକଲ୍ପ ଦିଗେ ପଦକ୍ଷେପ ନାଇଁ ନିଆଯିବାର ବଲି କରମୀ ଝନ୍କ କହିଛନ୍। ଇଆଡ଼େ କେଗଁାରେ ଘର ଭଡ଼ା ନାଇଁ ମିଲବାର ଲାଗି କରମୀ ଝନ୍କ ଉପେ ଶୂଇନ୍ ହେଇ ଇ ଦଦ୍ରା କୁଠାରେ ରହୁଛନ୍। ସେନ୍ତା ସ୍ବାସ୍ଥ୍ୟ ବିଭାଗ ତରଫୁ ଚପ୍ରିଆ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ କୋଟି କୋଟି ଟଁକା ଖରଚ୍ରେ ନୂତନ କୁଠା ତିଆର ହେଇଛେ। ହେଲେ ସେ ସବୁ ଭୁତକୁଠି ଲେଖେଁ ପଡ଼ିରହିଥିଲାବେଲେ ଯେନ୍ଠାନେ ନିହାତି ଦରକାର ଅଛେ ସେଠାନେ କୁଠାର ଅଭାବ ରହିଛେ। ଇ ଘଟନାକେ ନେଇ ଦିନୁ ଦିନ୍କେ ଅଂଚଲବାସୀକର ଭିତରେ ଅସନ୍ତୋଷ ଭାବ ବଢ଼ତେଲ ଯାଉଛେ। ଇ ଦିଗେ ଜିଲା ପରଶାସନ ଆର ବିଭାଗୀୟ ଉଚ କତୁରପକ୍ଷ ଦୁରୁଷ୍ଟି ଦେଇ ଉପକେନ୍ଦ୍ରର ଲାଗି ନୂତନ କୁଠା ତିଆରି ଦିଗେ ପଦକ୍ଷେପ ନେବାକେ ଅଂଚଲବାସୀ ଦାବି କରିଛନ୍।
