ଡେରାଡୁନ,୧୮ା୧: ଉତ୍ତରାଖଣ୍ଡ ସରକାର ଏକ ଗୁରୁତ୍ୱପୂର୍ଣ୍ଣ ତଥା କଡ଼ା ପଦକ୍ଷେପ ଗ୍ରହଣ କରିଛନ୍ତି। ଧାର୍ମିକ ସ୍ଥଳରେ ରିଲ୍ ଏବଂ ବ୍ଲଗ କରିବା ନେଇ ବଢ଼ୁଥିବା ବିବାଦକୁ ଦୃଷ୍ଟିରେ ରଖି, ଚଳିତ ବର୍ଷ ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଏବଂ ଯମୁନୋତ୍ରୀ ମନ୍ଦିର ଭିତରେ ମୋବାଇଲ ନିଷେଧ କରିବାକୁ ନିଷ୍ପତ୍ତି ନିଆଯାଇଛି। ପ୍ରଶାସନ ବିଶ୍ୱାସ କରେ ଯେ, ଏହି ନିଷ୍ପତ୍ତି କେବଳ ଅନାବଶ୍ୟକ ବିବାଦକୁ ରୋକିବା ସହିତ ଭକ୍ତମାନଙ୍କୁ ସମ୍ପୂର୍ଣ୍ଣ ଭକ୍ତି ଏବଂ ଏକାଗ୍ରତାର ସହିତ ତୀର୍ଥଯାତ୍ରା କରିବାକୁ ମଧ୍ୟ ଅନୁମତି ଦେବ।
ଚାରିଧାମ ଯାତ୍ରା ପ୍ରସ୍ତୁତି ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ବସିଥିଲା। ଏଥିରେ ଗଡ଼ଓ୍ବାଲ କମିଶନର ବିନୟ ଶଙ୍କର ପାଣ୍ଡେଙ୍କ ଅଧ୍ୟକ୍ଷତାରେ ଚାରିଧାମ ଯାତ୍ରା ଟ୍ରାଞ୍ଜିଟ କ୍ୟାମ୍ପରେ ଅନୁଷ୍ଠିତ ହୋଇଥିଲା। ଗଡ଼ଓ୍ବାଲ ଇନ୍ସପେକ୍ଟର ଜେନେରାଲ ରାଜୀବ ସ୍ବରୂପ, ବିଭିନ୍ନ ଜିଲାର ଜିଲାପାଳ ଏବଂ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ। ଯାତ୍ରା ବ୍ୟବସ୍ଥା ସମ୍ପର୍କରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।
ଗତ କିଛି ବର୍ଷ ମଧ୍ୟରେ କେଦାରନାଥ ପରିସରରେ ମୋବାଇଲ ବ୍ୟବହାର କରି ରିଲ ଏବଂ ଭ୍ଲଗ୍ ତିଆରି କରିବା ନେଇ ଅନେକ ବିବାଦ ଦେଖାଦେଇଛି, ଯାହା ମନ୍ଦିରର ମର୍ଯ୍ୟାଦାକୁ ବିପଦରେ ପକାଇଥାଏ। ଏହାକୁ ଧ୍ୟାନରେ ରଖି, ବଦ୍ରିନାଥର ସିଂହଦ୍ୱାର ବାହାରେ ମୋବାଇଲକୁ କଡ଼ାକଡ଼ି ନିଷିଦ୍ଧ କରାଯିବ। କେଦାରନାଥ, ଗଙ୍ଗୋତ୍ରୀ ଏବଂ ଯମୁନୋତ୍ରୀ ମନ୍ଦିର ପରିସରରେ ଭକ୍ତମାନଙ୍କୁ ମୋବାଇଲ ନେବାକୁ ମଧ୍ୟ ନିଷେଧ କରାଯିବ। ଶ୍ରୀ ବଦ୍ରିନାଥ-କେଦାରନାଥ ମନ୍ଦିର କମିଟି (BKTC) ଏବଂ ସମ୍ପୃକ୍ତ ଜିଲା ପ୍ରଶାସନ ମନ୍ଦିରରେ ପ୍ରବେଶ କରିବା ପୂର୍ବରୁ ଭକ୍ତଙ୍କ ମୋବାଇଲ ସୁରକ୍ଷା ସୁନିଶ୍ଚିତ କରିବା ପାଇଁ ଉପଯୁକ୍ତ ବ୍ୟବସ୍ଥା କରିବେ।
ସରକାର କେବଳ ବ୍ୟବସ୍ଥା ପର୍ଯ୍ୟନ୍ତ ସୀମିତ ନୁହେଁ, ବରଂ ପୂଜାସ୍ଥଳର ପବିତ୍ରତା ଏବଂ ଧାର୍ମିକ ଶୃଙ୍ଖଳା ପ୍ରତି ମଧ୍ୟ ଚିନ୍ତିତ। ବିଶ୍ୱାସ ଏବଂ ଶୃଙ୍ଖଳା ଉଭୟକୁ ବିଚାରକୁ ନେଇ
ଧାର୍ମିକସ୍ଥଳଗୁଡ଼ିକର ମର୍ଯ୍ୟାଦା ବଜାୟ ରଖିବାକୁ ସମୟୋଚିତ ଏବଂ ଠୋସ୍ ପଦକ୍ଷେପ ନେଇଛନ୍ତି ଗଡ଼ଓ୍ବାଲ କମିଶନର।
