ନୂଆଦିଲ୍ଲୀ,୨୨।୧: ହିମାଚଳ ପ୍ରଦେଶର ସୋଲାନର କୁମାରହାଟ୍ଟି-ନାହାନ ଜାତୀୟ ରାଜପଥ-୫ ସ୍ଥିତ ଗାନ୍ଧୀଗ୍ରାମ ନିକଟରେ ଏକ ଘରୋଇ ରିସର୍ଟରେ ନୀରଜ ଚୋପ୍ରା ଏବଂ ହିମାନି ମୋର ବିବାହ କରିଛନ୍ତି। ଏହି ବିବାହରେ ବର ଏବଂ କନ୍ୟା ପରିବାର ପକ୍ଷରୁ କେବଳ ୬୬ ଜଣ ଲୋକ ଯୋଗ ଦେଇଥିଲେ। ସମସ୍ତ ବିବାହ ରୀତିନୀତି ୧୫ରୁ ୧୭ ଜାନୁଆରୀ ମଧ୍ୟରେ ଅନୁଷ୍ଠିତ ହୋଇଥିଲା।
ଅଲିମ୍ପିକ ପଦକ ବିଜେତା ନୀରଜ ଚୋପ୍ରା ଜାନୁଆରୀ ୧୬ ତାରିଖରେ ସୋଲାନରେ ସୋନିପତର ହିମାନୀ ମୋରଙ୍କୁ ବିବାହ କରିଛନ୍ତି। ବିବାହ ପରେ ଦୁହେଁ ଆମେରିକା ଚାଲିଯାଇଛନ୍ତି। ସେ ମେ’ରେ ଭାରତ ଫେରିବାର ସମ୍ଭାବନା ଅଛି। ପରିବାର ପକ୍ଷରୁ କୁହାଯାଇଛି ଯେ ତାଙ୍କ ଫେରିବା ପରେ ହିଁ ଏକ ସ୍ବାଗତ ସମାରୋହର ଆୟୋଜନ କରାଯିବ।
ବିବାହ ଉତ୍ସବ ସମୟରେ ନୀରଜ ନିର୍ବନ୍ଧ, ବିବାହ ଏବଂ ବିଦାୟ ପାଇଁ କେବଳ ଗୋଟିଏ ଟଙ୍କା ଏବଂ ଗୋଟିଏ ସୁନାମୁଦ୍ରା ନେଇଛନ୍ତି। ଉଭୟ ପରିବାର କୌଣସି ଯୌତୁକ ବିନା ବିବାହ କରିଛନ୍ତି। ନୀରଜ ଚୋପ୍ରାଙ୍କ କାକା ଭୀମ ଚୋପ୍ରା କହିଛନ୍ତି ଯେ ନୀରଜ ଏବଂ ହିମାନୀଙ୍କ ବିବାହ ଉଭୟ ପରିବାରର ଖୁସି ଏବଂ ସମ୍ମତିରେ ହୋଇଛି।
ହିମାନୀଙ୍କ ବାପା ଚାନ୍ଦରାମ ମୋର କହିଛନ୍ତି ଯେ ଜାନୁଆରୀ ୧୬ ତାରିଖରେ ବିବାହ ପରେ, ନୀରଜ ଏବଂ ହିମାନୀ ଜାନୁଆରୀ ୧୭ ତାରିଖରେ ଲାଦ୍ରାସୋଲି ଗ୍ରାମସ୍ଥିତ ତାଙ୍କ ଘରକୁ ଆସିଥିଲେ। ଏହା ସହିତ, ଘରୁ ବାହାରିବା ସମୟରେ ସେ ନୀରଜଙ୍କୁ ୫୦୦ ଟଙ୍କା ଉପହାର ଦେଇଥିଲେ।
