ପୁରୀ, ୯ା୧(ଅଜିତ୍ କୁମାର ମହାନ୍ତି): ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ନିମନ୍ତେ ଭକ୍ତଙ୍କୁ ଯେପରି ସମସ୍ୟା ନ ହେବ ସେଥିଲାଗି ସରକାରଙ୍କ ପକ୍ଷରୁ ପଦକ୍ଷେପ ନିଆଯାଉଛି। ଏହି ପରିପ୍ରେକ୍ଷୀରେ ଆସନ୍ତା ୨୦ ତାରିଖରୁ ନାଟମଣ୍ଡପ ପରିସରରେ ଧାଡ଼ିଦର୍ଶନ ବ୍ୟବସ୍ଥା ଆରମ୍ଭ ହେବାକୁ ଯାଉଛି। ସେହିପରି ଏଏସ୍ଆଇ ପକ୍ଷରୁ ରତ୍ନଭଣ୍ଡାର ମରାମତି କାର୍ଯ୍ୟ ଚାଲିଛି। ନିର୍ଦ୍ଦିଷ୍ଟ ସମୟ ମଧ୍ୟରେ କାମ ସାରିବାକୁ କୁହାଯାଇଛି। କାର୍ଯ୍ୟ ଠିକ୍ ସମୟରେ ସରିବ ବୋଲି ଆଶା ରହିଛି। କାର୍ଯ୍ୟ ସରିବାର ଗୋଟିଏ ସପ୍ତାହ ପରେ ରତ୍ନଅଳଙ୍କାର ଗଣତିମଣତି ଆରମ୍ଭ ହେବ। ବୁଧବାର ପୁରୀ ଗସ୍ତରେ ଆସିଥିବା ଅବସରରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଏହା କହିଛନ୍ତି।
ହରିଚନ୍ଦନ ଆହୁରି କହିଛନ୍ତି, ଶ୍ରୀମନ୍ଦିର ପରିକ୍ରମା ମାର୍ଗର ଡିଜାଇନ୍ ପରିବର୍ତ୍ତନ କରାଯିବା ନେଇ ବର୍ତ୍ତମାନ ଡିପିଆର୍ ପ୍ରସ୍ତୁତି ଚାଲିଛି। ଗବେଷଣା କେନ୍ଦ୍ର, ଅନ୍ନଯଜ୍ଞ ମଣ୍ଡପ ଆଦି ସହ ଅନ୍ୟ କିଛି ମଣ୍ଡପର ଡିପିଆର୍ ପ୍ରସ୍ତୁତି ପାଇଁ ବିଭାଗକୁ କୁହାଯାଇଛି। ଏହା ପ୍ରସ୍ତୁତ ପରେ ଏନେଇ ବିଭିନ୍ନ ସ୍ଥାନରେ ଆଲୋଚନା କରାଯିବ। ଏଥିସହ ଖୁବ୍ଶୀଘ୍ର କଲ୍ଚରାଲ ଆଡ୍ଭାଇଜରି କମିଟି ଗଠନ ହେବ। ମହାପ୍ରଭୁଙ୍କ ସଂସ୍କୃତିକୁ ନେଇ ଗବେଷଣା କରୁଥିବା ବ୍ୟକ୍ତିବିଶେଷ ଏହି କମିଟିରେ ରହିବେ, ଯେଉଁମାନେ ଆଉ କ’ଣସବୁ କରାଯାଇପାରିବ ସେ ନେଇ ପରାମର୍ଶ ଦେବେ। ଯାହାସବୁ ଘୋଷଣା କରାଯାଇଛି, ତାହା ପୂରଣ କରାଯିବ। ଅପରପକ୍ଷରେ ଯେଉଁ ଗବେଷଣା କେନ୍ଦ୍ର କରାଯିବ, ତା’ ଉପରେ ରଘୁନନ୍ଦନ ଲାଇବ୍ରେରି କରାଯିବାକୁ ନିଷ୍ପତ୍ତି ହୋଇଛି ବୋଲି ଆଇନମନ୍ତ୍ରୀ କହିଛନ୍ତି।
