ଗୁଣୁପୁର,୨୪ା୪(ସଙ୍କେତ ପାତ୍ର): ରାୟଗଡ଼ା ଜିଲାର ଗୁଣୁପୁର ଥାନା ଅନ୍ତର୍ଗତ ସିର୍ଜୁଳିଗଠଲପଦର ମୁଖ୍ୟ ରାସ୍ତାରେ ଗୋଟିଏ ଦିନରେ ପୃଥକ୍ ସଡ଼କ ଦୁର୍ଘଟଣା ଘଟି ୩ ଜଣଙ୍କ ଜୀବନ ଯାଇଥିବାବେଳେ ୨ ଜଣ ଗୁରୁତର ହୋଇଥିବା ଖବର ମିଳିଛି। ପ୍ରଥମ ଦୁର୍ଘଟଣା ଜଗନ୍ନାଥପୁର ପଞ୍ଚାୟତର ବଡ଼ବାରଡ଼ି ନିକଟରେ ଘଟିଥିଲା। ଦୁଇଟି ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବାରୁ ଉପର ଗୁମୁରିଗୁଡ଼ା ଗ୍ରାମର ଆର୍କା ଭୁଗାନ (୬୦) ଓ ଆନ୍ଧ୍ରପ୍ରଦେଶର ଆଡାମଗୁଡ଼ା ଗ୍ରାମର ଶିବା ମାଣ୍ଡାଙ୍ଗୀ (୩୦)ଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଏହି ଦୁର୍ଘଟଣାରେ ତ୍ରିପତି ଆପ୍ରାକା ଗୁରୁତର ହୋଇଥିବା ବେଳେ ଶଙ୍କର ଶବର ସାମାନ୍ୟ ଆହତ ହୋଇଛନ୍ତି। ଗୁରୁତରଙ୍କୁ ପ୍ରଥମେ ଗୁଣୁପୁର ଉପଖଣ୍ଡସ୍ତରୀୟ ହସ୍ପିଟାଲରେ ଚିକିତ୍ସା ପରେ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ଖବର ଅନୁଯାୟୀ, ଆର୍କା ଭୁଗାନ ଜଣେ ଖ୍ରୀଷ୍ଟିଆନ ପାଷ୍ଟର ଥିଲେ ଏବଂ ଭୋଜ୍ ଅବସରରୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିଲା।ଅନ୍ୟପଟେ ଦ୍ୱିତୀୟ ଦୁର୍ଘଟଣା ରେଙ୍ଗଲପଦର ନିକଟରେ ଘଟିଥିଲା। ଏକ ମେକ୍ସ ପିକଅପ୍ ଭ୍ୟାନ ପଛପଟୁ ବାଇକ୍କୁ ଧକ୍କା ଦେବାରୁ ଦୀପକ ଗୌଡ଼(୩୨)ଙ୍କ ମୃତ୍ୟୁ ଘଟିଥିଲା। ସେ ଜଣେ ପୋଲିସ କନଷ୍ଟେବଳ
ବୋଲି ଜଣାପଡ଼ିଛି। ଏହି ଦୁର୍ଘଟଣାରେ କେଦାରନାଥ ଗୌଡ଼(୫୨) ଗୁରୁତର ହୋଇ ବ୍ରହ୍ମପୁରକୁ ସ୍ଥାନାନ୍ତର ହୋଇଛନ୍ତି। ଉଭୟେ ଦାଦା ପୁତୁରା ସମ୍ପର୍କର ଥିବା ସୂଚନା ମିଳିଛି। ଦୁଇଟି ଦୁର୍ଘଟଣାସ୍ଥଳରେ ଦମକଳ ବାହିନୀ ଓ ସ୍ଥାନୀୟ ଲୋକଙ୍କ ସହଯୋଗରେ ଆହତମାନଙ୍କୁ ଉଦ୍ଧାର କରାଯାଇଥିଲା। ଗୁଣୁପୁର ପୋଲିସ ଉଭୟ ଘଟଣାରେ ମାମଲା ରୁଜୁ କରି ଯାନବାହନ ଜବତ କରିଥିବା ବେଳେ ଶବଗୁଡିକୁ ବ୍ୟବଚ୍ଛେଦ ପାଇଁ ପଠାଇଛି। ଏସ୍ଡିପିଓ ବାବୁଲି ନାୟକ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଥିବା ବେଳେ ଥାନା ଅଧିକାରୀ କମଳକାନ୍ତ ବସନ୍ତ କହଁର ଓ ଏସ୍ଆଇ ରଞ୍ଜିତ ତ୍ରିପାଠୀ ତଦନ୍ତ ଜାରି ରଖିଛନ୍ତି।
