ନାଗପୁର,୮।୧: ପରସ୍ପରକୁ ବହୁତ ଭଲପାଉଥିଲେ। ସୁଖଦୁଃଖ ମଧ୍ୟରେ ବିତିଚାଲିଥିଲା ବିବାହ। ହେଲେ ୨୬ତମ ବିବାହ ବାର୍ଷିକୀରେ ବାଛି ନେଲେ ଆତ୍ମହତ୍ୟାର ବାଟ। ସେ ପୁଣି ଗୋଟିଏ ସର୍ତ୍ତରେ। ଗୋଟିଏ କବରରେ ହାତରେ ହାତ ରଖି ଆମକୁ ବିଦାୟ ଦେବ। ଏଭଳି ଏକ ହୃଦୟ ବିଦାରକ ଘଟଣା ମହାରାଷ୍ଟ୍ରର ନାଗପୁର ଜିଲାର ମାର୍ଟିନ ନଗରରେ ଦେଖିବାକୁ ମିଳିଛି। ସୋମବାର ଅପରାହ୍ନରେ ସେ ବିବାହ ଦିନର ପୋଷାକ ପିନ୍ଧି ୨୬ତମ ବିବାହ ବାର୍ଷିକୀ ପାଳନ କରିଥିଲେ। ହେଲେ ମଙ୍ଗଳବାର ଆତ୍ମହତ୍ୟା କରିନେଇଥିଲେ। ଆତ୍ମହତ୍ୟା କରିବା ପୂର୍ବରୁ ପତ୍ନୀପତି ଭିଡିଓ କରି ପରିଜନମାନଙ୍କୁ ନ କାନ୍ଦିବା ଲାଗି ଅପିଲ କରିଥିଲେ। ଏପରିକି ଏହାକୁ ଷ୍ଟାଟସ୍ରେ ରଖିଥିଲେ। ଏବେ ଏହି ଘଟଣା ଚର୍ଚ୍ଚାର ବିଷୟ ପାଲଟିଛି।
୫୪ ବର୍ଷୀୟ ଜାରିଏଲ ଓସ୍କାର ମୋନକ୍ରିପ୍ଙ୍କ ମୃତଦେହ ରୋଷେଇ ଘରୁ ଝୁଲନ୍ତା ଅବସ୍ଥାରେ ମିଳୁଥିଲା। ସେହିଭଳି ପତ୍ନୀ ଆନି ଜାରିଏଲ ମୋନକ୍ରିପ(୪୬)ଙ୍କ ମୃତଦେହ ଡ୍ରଇଂ ରୁମ୍ରେ ଥିବା ଖଟ ଉପରେ ପଡ଼ିଥିଲା। ୨୬ ବର୍ଷ ତଳେ ପିନ୍ଧିଥିବା ବିବାହ ଡ୍ରେସ୍କୁ ସେ ପିନ୍ଧିଥିବା ବେଳେ ତାଙ୍କ ମୃତଦେହକୁ ଧଳା କପଡ଼ାରେ ଗୁଡ଼ା ଯାଇଥିଲା। ଏପରିକି ତାଙ୍କ ଉପରେ ଫୁଲ ପକାଯାଇଥିଲା। ଏହି ଦୃଶ୍ୟ ଦେଖି ଜାରିଏଲ ସମ୍ଭବତଃ ପତ୍ନୀଙ୍କୁ ଆଗ ଜୀବନ ନେବାକୁ ଦେଇଥିବା ସ୍ପଷ୍ଟ ହେଉଥିବା ପୋଲିସ କହିଛି।
ସୁଇସାଇଡ୍ ନୋଟରେ ସେମାନେ ଲେଖିଥିଲେ- ଆମ ମୃତ୍ୟୁ ଲାଗି କେହି ଦାୟୀ ନୁହନ୍ତି। ନିଜ କଷ୍ଟ ଆଉ ସହି ହେଉନାହିଁ। ଏଣୁ ଆତ୍ମହତ୍ୟା କରୁଛୁ। ସମ୍ପର୍କୀୟଙ୍କ ମୁତାବକ ବିବାହର ୨୬ ବର୍ଷ ହୋଇଗଲାଣି, ତଥାପି ସେମାନେ ନିସନ୍ତାନ ଥିଲେ। ଆର୍ଥିକ ସ୍ଥିତି ଠିକ୍ ନ ଥିଲା। ଏଣୁ ଦୁହେଁ ଦୁଃଖି ଥିଲେ। ସ୍ବାମୀଙ୍କର ୪ ବର୍ଷ ହେଲାଣି ଚାକିରି ନ ଥିଲା। ସାଧାରଣ ଜୀବନଯାପନ ଲାଗି ସେମାନଙ୍କୁ କଷ୍ଟ କରିବାକୁ ପଡ଼ୁଥିଲା। ଏସବୁ ଘଟଣା ଯୋଗୁ ସେ ବଡ଼ ପଦକ୍ଷେପ ଗ୍ରହଣ କରିଛନ୍ତି।
ଆନି ନିଜର ଶେଷ ଇଚ୍ଛାରେ ଦୁହିଁଙ୍କୁ ଗୋଟିଏ କବରରେ ପୋତାଯାଉ ବୋଲି ଲେଖିଥିଲେ। ପୋଷ୍ଟମର୍ଟମ ପରେ ତାହା ହିଁ ହୋଇଛି। ଜରିପଟକା କ୍ୟାଥଲିକ୍ କବରସ୍ଥାନରେ ଦୁହିଁଙ୍କୁ ହାତରେ ହାତ ମିଶାଇ କବର ଦିଆଯାଇଛି। ଏହି ସମୟରେ ସେଠାରେ ଉପସ୍ଥିତ ଲୋାକେ ଭାବୁକ ହୋଇଯାଇଥିଲେ।
ପୋଲିସ ଅଧିକାରୀଙ୍କ ମୁତାବକ, ଯେତେବେଳେ ପୋଲିସ ମୃତଦେହ ଜବତ କରିବାକୁ ପହଞ୍ଚିଥିଲା, ସେଠାରେ କିଛି ସମ୍ପର୍କୀୟ ମଧ୍ୟ ପହଞ୍ଚିଥିଲେ। ସେମାନେ କହିଥିଲେ ଯେ ଆତ୍ମହତ୍ୟା କରିବା ପୂର୍ବରୁ ସେମାନେ ଭିଡିଓ କରି ଛାଡ଼ିଥିଲେ। ପୋଲିସ ଏବେ ସମସ୍ତ ସୂଚନାକୁ କେନ୍ଦ୍ର କରି ତଦନ୍ତ କରୁଛି।
