ଭୁବନେଶ୍ୱର, ୨୪।୮(ବ୍ୟୁରୋ)/କଟକ ରୋଡ,(ଡି.ଏନ୍.ଏ.): ଆଗକୁ ମା’ଙ୍କ ପୂଜା। ବିରାଜିବେ ଜଗତଜନନୀ ମା’ ଦୁର୍ଗା। ଯେଉଁଥିପାଇଁ ଚଳଚଞ୍ଚଳ ହୋଇପଡ଼ିଛି ଭୁବନେଶ୍ୱରର ସମସ୍ତ ପୂଜା ମଣ୍ଡପ। ତେଣୁ ଶୁକ୍ରବାର ପବିତ୍ର ଜନ୍ମାଷ୍ଟମୀ ଅବସରରେ ବିଭିନ୍ନ ଦୁର୍ଗାପୂଜା କମିଟି ପକ୍ଷରୁ ମାଟି ଅନୁକୂଳ ଆରମ୍ଭ ହୋଇଛି। ଏଥିସହ ହାଉସିଂବୋର୍ଡ ଦୁର୍ଗା ପୂଜା ସମିତି, ଡୁମୁଡୁମା ଦୁର୍ଗା ପୂଜା ସମିତି, ଗଜପତି ନଗର ଦୁର୍ଗାପୂଜା ସମିତି, ରୁଚିକା ବଜାର ଦୁର୍ଗାପୂଜା ସମିତି, ଜୟଦେବ ବିହାର ଦୁର୍ଗାପୂଜା ସମିତି ଓ କଳାରାହାଙ୍ଗ ଦୁର୍ଗାପୂଜା ସମିତି ପକ୍ଷରୁ ମାଟି ଅନୁକୂଳ କାର୍ଯ୍ୟ ଶେଷ ହୋଇଛି।
ନୟାପଲ୍ଲୀ ଦୁର୍ଗାପୂଜା ସମିତି
ନୟାପଲ୍ଲୀ ଦୁର୍ଗାପୂଜା ସମିତି ପକ୍ଷରୁ ୩୨ତମ ଶାରଦୀୟ ପୂଜା ପାଇଁ ଶୁଭ ଶଙ୍ଖ ବାଜିଛି। ବିଧି ମୁତାବକ, କୁଆଖାଇ ନଦୀ ଘାଟରୁ ପଟୁଆର ମଧ୍ୟରେ ପାଲିଙ୍କିରେ ମାଟି ଅଣାଯାଇଛି। ମହାମାୟା ମା’ଙ୍କ ମୃଣ୍ମୟୀ ମୂର୍ତ୍ତି ନିମନ୍ତେ ଆସିଥିବା ମାଟିକୁ ସହରର ବିଭିନ୍ନ ଦେବ ପୀଠ ପରିକ୍ରମା କରାଯାଇଥିଲା। ପରେ ଆସିଥିବା ମାଟିକୁ ପୂଜା ମଣ୍ଡପରେ ବିଧି ମତେ ପୂଜାର୍ଚ୍ଚନା ସହ ସ୍ଥାପନା କରାଯାଇଥିଲା। ଏ ନେଇ ସମିତିର ଉପଦେଷ୍ଟା ନବକିଶୋର ବେହେରା କହିଛନ୍ତି, ପୌରାଣିକ ରୀତିରେ ଆମେ ଏହି ମହାପାର୍ବଣର ପର୍ବକୁ ପାଳନ କରିଛୁ। ଏବେଠୁ ସମିତିର ସମସ୍ତ ସଦସ୍ୟ ହାତରେ ସୂତା ବାନ୍ଧି ନିଷ୍ଠାରେ ରହି ମା’ଙ୍କ ଶାରଦୀୟ ପୂଜାକୁ ସୂଚାରୁ ରୂପେ ସମ୍ପାଦନ ପାଇଁ ସଂକଳ୍ପ ନେଇଛୁ। ଏହି ଅବସରରେ ସମିତିର ସଭାପତି ପବିତ୍ର ମୋହନ ବେହେରା, ସମ୍ପାଦକ ମହେନ୍ଦ୍ର ବଳବନ୍ତରାୟ, ଚିତ୍ରସେନ ବେହେରା, ସୁଶାନ୍ତ କୁମାର ଦାଶ, ଜେ.ପି ଦାସଙ୍କ ସମେତ ସମସ୍ତ ସଦସ୍ୟ ଉପସ୍ଥିତ ଥିଲେ।
ପାଇକରାପୁର ଦୁର୍ଗାପୂଜା କମିଟି
ଭୁବନେଶ୍ୱର ମହାନଗର ନିଗମ ଅନ୍ତର୍ଗତ ପାଇକରାପୁର ସାର୍ବଜୀନନ ଦୁର୍ଗପୂଜା କମିଟି ପକ୍ଷରୁ ମାଟି ଅନୁକୂଳ ପର୍ବ ଅନୁଷ୍ଠିତ ହୋଇଯାଇଛି। କୁଆଖାଇ ନଦୀପୀଠରେ ବ୍ରାହ୍ମଣଙ୍କ ମନ୍ତ୍ରପାଠ ସାଙ୍ଗକୁ ହୋମ କାର୍ଯ୍ୟ ସମ୍ପାଦନ ପରେ ମାଟି ଅଣାଯାଇଥିଲା। ଉଲ୍ଲେଖଥାଉ କି, ପୁରାତନ ଦେବୀପୀଠ ତଥା ସବୁଜିମାମୟ ପାହାଡ଼, ଦେଉଳିଆ ପାହାଡ଼ ପାଦଦେଶରେ ପାଇକରାପୁର ଦୁର୍ଗାପୂଜା ଅନୁଷ୍ଠିତ ହୁଏ। ଏହିବର୍ଷ ସୁଉଚ୍ଚ ଐତିହାସିକ ଅଟ୍ଟାଳିକା ଓ ଆଲୋକମାଳାରେ ଶୋଭା ପାଇବେ ମା’ ଦୁର୍ଗତି ନାଶିନୀଙ୍କ ତୋରଣ। ଏଥର ଶବ୍ଦ ପ୍ରଦୂଷଣ ଓ ପ୍ଲାଷ୍ଟିକମୁକ୍ତ ପୂଜା କାର୍ଯ୍ୟକ୍ରମ ଅନୁଷ୍ଠିତ ହେବ। ଚଳିତବର୍ଷ ଭିନ୍ନ ଭିନ୍ନ ପ୍ରକାରର ପ୍ରତିଯୋଗିତା ଓ ଭଜନ, ପାଇକ ଆଖଡ଼ାର କାର୍ଯ୍ୟକ୍ରମ ଓ ପୁରାତନ ଲୋକନୃତ୍ୟକୁ ପ୍ରାଧାନ୍ୟ ଦିଆଯିବ। କାର୍ଯ୍ୟକ୍ରମରେ ଉପଦେଷ୍ଟା ଅଶୋକ କୁମାର ପାଲାଟାସିଂହ, ସଭାପତି ସୌମ୍ୟକାନ୍ତ ପାଇକରା, ଲିପୁ ସାହୁ, ଦୁର୍ଯ୍ୟୋଧନ ପ୍ରଧାନ ଓ ସମସ୍ତ କର୍ମକର୍ତ୍ତାଗଣ ଉପସ୍ଥିତ ଥିଲେ।
ଶ୍ରୀ ଶ୍ରୀ ମହାବୀର ପୂଜା କମିଟି
ଦଶହରା ସମୟରେ ଭୁବନେଶ୍ୱରର ସମସ୍ତ ଜାଗାରେ ମା’ ଦୁର୍ଗା, ହରପାର୍ବତୀ ପୂଜା ପାଉଥିବା ବେଳେ ନୟାପଲ୍ଲୀ ୱାର୍ଡ ନଂ. ୩୯ରେ ଥିବା ନୂଆସାହିରେ ଚଳିତବର୍ଷକୁ ମିଶାଇ ୧୦ ବର୍ଷ ହେବ ଶୃଙ୍ଖଳାର ସହ ମହାବୀରଙ୍କ ପୂଜା କରାଯାଉଛି। ପରମ୍ପରା ରୀତି ନୀତି ଅନୁଯାୟୀ ଚଳିତବର୍ଷ ହେବାକୁ ଥିବା ପୂଜା ପାଇଁ ମହାବୀରଙ୍କ ମୂର୍ତ୍ତି ନିର୍ମାଣ ନିମନ୍ତେ ଜନ୍ମାଷ୍ଟମୀରେ କୁଆଖାଇ ନଦୀପଠାରୁ ଶ୍ରୀ ଶ୍ରୀ ମହାବୀର ପୂଜା କମିଟି, ନୂଆସାହି, ନୟାପଲ୍ଳୀ, ଭୁବନେଶ୍ୱର ପକ୍ଷରୁ ମାଟି ଅନୁକୂଳ କରାଯାଇଛି। ନୂଆସାହି ମହାବୀର ପୂଜା ମଣ୍ଡପରୁ କମିଟିର ସମସ୍ତ ସଦସ୍ୟ କୁଆଖାଇ ନଦୀପଠାରେ ପହଞ୍ଚତ୍ ବ୍ରାହ୍ମଣଙ୍କ ଦ୍ୱାରା ପୂଜାର୍ଚ୍ଚନା କରି ମାଟି ଅନୁକୂଳ କରାଯାଇଥିଲା। ପରେ ଅନୁକୂଳ ମାଟିକୁ ଶୋଭାଯାତ୍ରାରେ ସହର ପରିକ୍ରମା କରି ବାଟରେ ଥିବା ସମସ୍ତ ଦେବଦେବୀଙ୍କ ମନ୍ଦିରରେ ପୂଜାର୍ଚ୍ଚନା କରି ଶେଷରେ ନୂଆସାହିରେ ଥିବା ଆଖଣ୍ଡଳମଣୀ ମନ୍ଦିରରେ ମାଟିକୁ ରଖା ଯାଇଥିଲା। ମହାବୀରଙ୍କ ମୂର୍ତ୍ତି ନିର୍ମାଣ ହେବା ପର୍ଯ୍ୟନ୍ତ ଏହି ମାଟିକୁ ମନ୍ଦିରରେ
