କଟକ, ୨୪ା୩ (କାର୍ତ୍ତିକ ସାହୁ)- ବେଆଇନ ବନ୍ଧୁକ କାରବାର ମାମଲାରେ କମିଶନରେଟ୍ ପୋଲିସ ୨ ଜଣଙ୍କୁ ଗିରଫ କରି ରବିବାର କୋର୍ଟ ଚାଲାଣ କରିଛି। ସେମାନେ ହେଲେ ଉକ୍ତ କାରବାରର ମୁଖ୍ୟ ଅଭିଯୁକ୍ତ ତଥା କିଙ୍ଗପିନ ବିହାର ମୁଙ୍ଗେର ଅଞ୍ଚଳର ଗୋଲ୍ଡେନ୍ ସିଂ(୩୪) ଓ କଟକ କେଶରପୁର ଅଞ୍ଚଳର ୱାସିମ୍ ଖାନ୍ (୨୫)। ଗୋଲ୍ଡେନ୍ଙ୍କଠାରୁ ୨ଟି ବନ୍ଧୁକ ଓ ଗୁଳି ଏବଂ ଓ୍ବାସିମ୍ଙ୍କ ନିକଟରୁ ଗୋଟିଏ ଦେଶୀ ବନ୍ଧୁକ ସହ ଗୁଳି ଜବତ କରାଯାଇଛି। ତେବେ ଜଗତ୍ପୁର ଓ ମଙ୍ଗଳାବାଗ ଥାନାରେ ରୁଜୁ ୨ଟି ମାମଲାରେ ଏହି ଅଭିଯୁକ୍ତ ଦ୍ୱୟଙ୍କୁ ଗିରଫ କରାଯାଇଛି ବୋଲି କଟକ ଡିସିପିଙ୍କ କାର୍ଯ୍ୟାଳୟରେ ରବିବାର ଅନୁଷ୍ଠିତ ଖବରଦାତା ସମ୍ମିଳନୀରେ ଡିସିପି କେ.ବି. ସିଂ ସୂଚନା ଦେଇଛନ୍ତି।
କଟକ ଓ ଏହାର ପାର୍ଶ୍ୱବର୍ତ୍ତୀ ଜିଲାଗୁଡ଼ିକରେ ଗୋଲ୍ଡେନ୍ ସିଂ ଚୋରା ବନ୍ଧୁକ କାରବାର ଚଳାଇ ଆସୁଥିଲେ। ଏ ସମ୍ପର୍କରେ ଜଗତ୍ପୁର ଥାନାରେ ଅଭିଯୋଗ ହେବା ପରେ ପୋଲିସ ଏକ ମାମଲା(ନଂ.୧୪୭/୨୪) ରୁଜୁ କରି ତଦନ୍ତ କରିଥିଲା। ଏହାପରଠାରୁ ଅଭିଯୁକ୍ତ ଜଣକ ଫେରାର ହୋଇଯାଇଥିଲେ। ପୋଲିସ ତଦନ୍ତ କରିବାବେଳେ ଗୋଲ୍ଡେନ୍ ବିହାରର ମୁଙ୍ଗେର ଅଞ୍ଚଳରେ ଥିବା ଜାଣିବାକୁ ପାଇଥିଲା। ତୁରନ୍ତ ତାଙ୍କୁ ଧରିବା ପାଇଁ କଟକ ଜୋନ୍-୧ ଏସିପି ଅରୁଣ କୁମାର ସ୍ବାଇଁଙ୍କ ତତ୍ତ୍ୱାବଧାନ ଓ ସ୍ପେଶାଲ ସ୍କ୍ବାଡ୍ ଏସ୍ଆଇ ସୁନୀଲ ଯାଦବଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ୍ ବିହାର ଯାଇଥିଲା। ସେଠାରେ ପହଞ୍ଚି ସ୍ଥାନୀୟ ପୋଲିସ ସହାୟତାରେ ମୁଙ୍ଗେର ଅଞ୍ଚଳରୁ ଗୋଲ୍ଡେନ୍ଙ୍କୁ ଗିରଫ କରିଥିଲା। ତାଙ୍କୁ ଓଡ଼ିଶା ଅଣାଯାଇ ରବିବାର କୋର୍ଟରେ ହାଜର କରାଯାଇଥିଲା। ବେଆଇନ ବନ୍ଧୁକ କାରବାର ସମ୍ପର୍କରେ ଅଧିକ ତଥ୍ୟ ହାସଲ ପାଇଁ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ ବୋଲି ପୋଲିସ ସୂଚନା ଦେଇଛି।
ସୂଚନାଯୋଗ୍ୟ, ଜଗତ୍ପୁର ପୋଲିସ ଗତ ୧୦ ତାରିଖରେ ବନ୍ଧୁକ ବେପାରୀ ବାବୁଆ ଓରଫ ପ୍ରକାଶ ବେହେରାଙ୍କୁ ଗିରଫ କରିଥିଲା। ତାଙ୍କ ନିକଟରୁ ଗୋଟିଏ ପିସ୍ତଲ ଓ ୩ଟି ଗୁଳି ଜବତ କରିଥିଲା। ବାବୁଆଙ୍କ ସହିତ ବେଆଇନ ବନ୍ଧୁକ କାରବାରରେ ସାମିଲ ଜଗତ୍ସିଂହପୁର ଜିଲା ତିର୍ତ୍ତୋଲ ଅଞ୍ଚଳର ପିଣ୍ଟୁ ଓରଫ ପ୍ୟାରୀମୋହନ ଦାସ ଓ ମିହିର କୁମାର ରାୟଙ୍କୁ ପୋଲିସ ଗିରଫ କରିଥିଲା। ପୁନର୍ବାର ୧୭ ତାରିଖରେ ଆଉ ଜଣେ ଅଭିଯୁକ୍ତ ଢେଙ୍କାନାଳ ସଦର ଥାନା ଅଧୀନ ଗୋବିନ୍ଦ ପ୍ରସାଦ ଅଞ୍ଚଳର ପିଙ୍କୁ ଓରଫ ପ୍ରିୟବ୍ରତ ସାମଲକୁ ଗିରଫ କରାଯାଇଥିଲା। ତାଙ୍କ ନିକଟରୁ ବନ୍ଧୁକ ଓ ଗୁଳି ଜବତ କରାଯାଇଥିଲା। ଏହି ସମସ୍ତ ଅଭିଯୁକ୍ତଙ୍କୁ ପୋଲିସ ଜେରା କରିବାବେଳେ ବନ୍ଧୁକ କାରବାରର ମୂଳ ବିହାରର ମୁଙ୍ଗେର ଓ ଜମ୍ମୁଇ ଜିଲାର ଅଞ୍ଚଳର ବୋଲି ଜଣାପଡିଥିଲା। ଅଭିଯୁକ୍ତମାନଙ୍କଠାରୁ ହାସଲ ହୋଇଥିବା ତଥ୍ୟ ଆଧାରରେ କମିଶନରେଟ୍ ପୋଲିସର ସ୍ବତନ୍ତ୍ର ଟିମ୍ ବିହାରର ମୁଙ୍ଗେର ଅଞ୍ଚଳକୁ ଯାଇ ବନ୍ଧୁକ କାରବାରର ମୁଖ୍ୟ ଗୋଲ୍ଡେନ୍ଙ୍କୁ ଗିରଫ କରିଥିଲା।
ସେହିପରି ବେଆଇନ ବନ୍ଧୁକ କାରବାରରେ ସମ୍ପୃକ୍ତ ଆଉଜଣେ ଅଭିଯୁକ୍ତ ୱାସିମ୍ ଖାନ୍ଙ୍କୁ ମଙ୍ଗଳାବାଗ ପୋଲିସ କେଶରପୁର ଅଞ୍ଚଳରୁ ଗିରଫ କରି ରବିବାର କୋର୍ଟ ଚାଲାଣ କରିଛି। ତାଙ୍କୁ ପଚରାଉଚରାବେଳେ ସେ ଗୋଲ୍ଡେନ୍ଙ୍କଠାରୁ ବନ୍ଧୁକ କିଣି ଅନ୍ୟମାନଙ୍କୁ ବିକ୍ରି କରୁଥିବାବେଳେ ପୋଲିସ ନିକଟରେ ସ୍ବୀକାର କରିଛନ୍ତି। ଏ ନେଇ ଥାନାରେ ଏକ ମାମଲା(ନଂ.୯୫/୨୪) ରୁଜୁ ହୋଇଛି। ଓ୍ବାସିମ୍ଙ୍କ ନଁାରେ କଟକର ବିଭିନ୍ନ ଥାନାରେ ୮ଟି ମାମଲା ରୁଜୁ ହେଇଥିବା ପୋଲିସ ଜାଣିବାକୁ ପାଇଛି।
