ବଲାଙ୍ଗୀର,୪ା୩(ବୀରେନ୍ଦ୍ର କୁମାର ଝାଙ୍କର):ବଲାଙ୍ଗୀର ଲୋକ ସଭା ଆସନ ଅଧୀନରେ ବଲାଙ୍ଗୀର ଜିଲାର ୫ ଏବଂ ସୁବର୍ଣ୍ଣପୁର ଜିଲାର ୨ଟିକୁ ମିଶାଇ ୭ଟି ବିଧାନସଭା ଆସନ ରହିଛି। ୨୦୧୯ ନିର୍ବାଚନରେ ଭାଜପାରୁ ସଙ୍ଗୀତା କୁମାରୀ ସିଂଦେଓ, ବିଜେଡିରୁ କଳିକେଶ ନାରାୟଣ ସିଂଦେଓ ଏବଂ କଂଗ୍ରେସରୁ ସମରେନ୍ଦ୍ର ମିଶ୍ର ପ୍ରାର୍ଥୀ ହୋଇଥିଲେ। ଭାଜପା ପ୍ରାର୍ଥୀ ସଙ୍ଗୀତା ସଂଦେଓ ଲୋକ ସଭାକୁ ନିର୍ବାଚିତ ହୋଇଥିଲେ। ୨୦୨୪ ନିର୍ବାଚନରେ ତିନି ପ୍ରମୁଖ ଦଳର ପ୍ରାର୍ଥୀ କିଏ ହେବେ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଗଲାଣି। ଏଥର କଲିକେଶ ବଲାଙ୍ଗୀର ଆସନରୁ ବିଜେଡି ବିଧାୟକ ପ୍ରାର୍ଥୀ ହେବେ ବୋଲି ଚର୍ଚ୍ଚା ଜୋର ଧରିଛି। ଗତ କିଛିଦିନ ହେଲା ସେ ଏଇ ବିଧାନସଭା ନିର୍ବାଚନ ମଣ୍ଡଳୀର ବିଭିନ୍ନ ଗଁା ଓ ସହରରେ ବୁଲି ଅଧିକ ସମୟ ଦେଉଛନ୍ତି। ଏଭଳି ସ୍ଥିତିରେ ବିଜେଡିର ଲୋକ ସଭା ପ୍ରାର୍ଥୀ କିଏ ହେବେ ସେ ନେଇ ଅଧିକ କଳ୍ପନାଜଳ୍ପନା ପ୍ରକାଶ ପାଇଛି।
ପ୍ରଥମରୁ ଡବ୍ଲ୍ୟୁଓଡିସି ଅଧ୍ୟକ୍ଷ ଅସିତ ତ୍ରିପାଠୀ ଏଥର ପ୍ରାର୍ଥୀ ହେବେ ବୋଲି କୁହାଯାଉଥିଲା। ତେବେ ତାଙ୍କ ନଁା ଚର୍ଚ୍ଚାକୁ ଆସିବା ପରେ ତାଙ୍କ ବ୍ୟକ୍ତିତ୍ୱର ବିଭିନ୍ନ ଦିଗକୁ ନେଇ ଆଲୋଚନା ହୋଇଥିଲା। ଜଣେ ଅଫିସର ଭାବେ ତାଙ୍କୁ ଲୋକେ ଯେତିକି ଚିହ୍ନିଛନ୍ତି ନେତା ଭାବେ ସେତିକି ଗ୍ରହଣ କରିବେ କି ନାହିଁ ସେନେଇ ବି ଆଲୋଚନା ହେଲା। ଏହାପରେ ଟିଟିଲାଗଡ଼ ବିଧାୟିକା ତଥା ମନ୍ତ୍ରୀ ଟୁକୁନୀ ସାହୁ, ସୋନପୁର ବିଧାୟକ ତଥା ମନ୍ତ୍ରୀ ନିରଞ୍ଜନ ପୂଜାରୀ ଏବଂ ବୀରମହାରାଜପୁର ବିଧାୟକ ପଦ୍ମନାଭ ବେହେରା, ରାଜ୍ୟ ସଭା ସଦସ୍ୟ ତଥା ଆଦିବାସୀ ନେତା ନିରଞ୍ଜନ ବିଶି ଏବଂ ପାଟଣାଗଡ ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ସରୋଜ ମେହେର ବିଜେଡିର ଲୋକ ସଭା ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି। ତେବେ ଉପରୋକ୍ତ ନେତା, ମନ୍ତ୍ରୀ ଓ ବିଧାୟକଙ୍କ ଘନିଷ୍ଠ ସମର୍ଥକ ଓ କର୍ମୀ ମହଲରେ ହେଉଥିବା ଚର୍ଚ୍ଚାକୁ ବିଶ୍ଳେଷଣ କଲେ ବିଜେଡିର ସବୁ ଟାଣୁଆ ବିଧାୟକ ଓ ମନ୍ତ୍ରୀ ନିଜ ନିଜ ବିଧାନସଭାର ସୁରକ୍ଷିତ ଆସନ ଛାଡି ଲୋକ ସଭା ଆସନରେ ପ୍ରାର୍ଥୀ ହେବାକୁ ଅନିଚ୍ଛୁକ ବୋଲି ଖୋଲାଖୋଲି ଆଲୋଚନା ହେଉଛି। ଅଯୋଧ୍ୟା ରାମମନ୍ଦିର ନିର୍ମାଣ ପରେ ଲୋକ ସଭା ନିର୍ବାଚନରେ ବେଶୀ ଫାଇଦା ଭାଜପା ସପକ୍ଷରେ ଯିବ ବୋଲି ଚର୍ଚ୍ଚା ହେଉଛି। ଏସବୁ ଶୁଣିଦେଲେ ଅନେକଙ୍କୁ ପରାଜୟ ଭୟ ଘାରୁଛି। ଅନ୍ୟପଟେ ଲୋକ ସଭା ଆସନକୁ ନେଇ ବିଜେଡି ଓ ଭାଜପା ଉଚ୍ଚନେତୃତ୍ୱ ସ୍ତରରେ କାଳେ ଗୁପ୍ତ ବୁଝାମଣା ହୋଇଯିବ ଏବଂ ଏହାର ସବୁ ଫାଇଦା ଭାଜପା ସପକ୍ଷରେ ଚାଲିଯିବ, ସେହି ଭୟ ବି ବିଜେଡିର ସମ୍ଭାବ୍ୟ ପ୍ରାର୍ଥୀଙ୍କୁ ଘାରୁଛି। ଏଭଳି ପରିସ୍ଥିତିରେ ବିଜେଡିର କଥିତ ଭୀତତ୍ରସ୍ତ ମନ୍ତ୍ରୀ, ବିଧାୟକ ଓ ନେତାମାନେ ସେମାନଙ୍କୁ କିଭଳି ଦଳୀୟ ଲୋକ ସଭା ପ୍ରାର୍ଥୀ ନକରି ବିଧାନସଭା ପ୍ରାର୍ଥୀ କରିବେ ସେଥିପାଇଁ ଉପର ସ୍ତରରେ ନିଜ ନିଜ ଲବିରେ ମାତିଥିବା ଚର୍ଚ୍ଚା ଜୋର ଧରିଛି। ଅନେକ ନେତା ଓ ମନ୍ତ୍ରୀ କୁଆଡେ ଗୋଇନ୍ଦା ବିଭାଗ ଅଧିକାରୀଙ୍କୁ ଗୋପନ ଅନୁସନ୍ଧାନ ରିପୋର୍ଟ ମାଗିବାରେ ଲାଗିପଡିଛନ୍ତି। ଏଭଳି ସ୍ଥିତିରେ କଂଗ୍ରେସ ଦଳର ଜଣେ ଆଦିବାସୀ ନେତାଙ୍କୁ ବିଜେଡି ଲୋକ ସଭା ପ୍ରାର୍ଥୀ ହେବାକୁ ପ୍ରସ୍ତାବ ଦିଆଯାଇଥିବା କୁହାଯାଉଛି। ସେଇ ନେତା ଜଣକ ବି କୁଆଡେ ଲୋକ ସଭା ପ୍ରାର୍ଥୀ ପାଇଁ ରାଜି ନହୋଇ ବିଧାୟକ ପ୍ରାର୍ଥୀ ପଦ ଦାବି କରିଥିଲେ। ଉଭୟ ପକ୍ଷରୁ ସହମତି ନହେବାରୁ ସେଇ ନେତା ଜଣକ ଘରକୁ ଫେରି ଆସିଥିବା ଜିଲାରେ ଚର୍ଚ୍ଚାର ବିଷୟ ହୋଇଛି। ଏଭଳି ସ୍ଥିତିରେ ଦଳୀୟ ହାଇକମାଣ୍ଡ କାହାକୁ ଲୋକ ସଭା ପ୍ରାର୍ଥୀ ଘୋଷଣା କରିବେ ତାକୁ ନେଇ କଳ୍ପନାଜଳ୍ପନା ଓ ଦ୍ୱନ୍ଦ୍ୱ ଲାଗିରହିଛି।
