ନୂଆଦିଲ୍ଲୀ,୧୭।୫: କେନ୍ଦ୍ରମନ୍ତ୍ରୀ ବନ୍ଦୀ ସଞ୍ଜୟ କୁମାରଙ୍କ ପୁଅ ବନ୍ଦୀ ଭଗୀରଥ ସାଇକୁ ତେଲେଙ୍ଗାନା ପୋଲିସ ଶନିବାର ଗିରଫ କରିଛି। ତେବେ କେନ୍ଦ୍ରମନ୍ତ୍ରୀ ପୁଅକୁ ସରେଣ୍ଡର କରାଇଥିବାର ଦାବି କରୁଛନ୍ତି। କେନ୍ଦ୍ରମନ୍ତ୍ରୀଙ୍କ ପୁଅ ବିରୋଧରେ ନାବାଳିକା ପ୍ରତି ବଳାତ୍କାର ଅଭିଯୋଗ ରହିଛି। ମାମଲାରେ ବନ୍ଦୀ ଭଗୀରଥ ସାଇର ଗିରଫ ପାଇଁ ପୋଲିସ ‘ଲୁକ୍ ଆଉଟ୍ ସର୍କୁଲାର’ ଜାରି କରିଥିଲା। ବଳାତ୍କାର ଅଭିଯୋଗ ପରେ ବି.ଭଗୀରଥ ସାଇର ଗିରଫ ପାଇଁ ସାଇବରାବାଦ ପୋଲିସ ୫ଟି ସ୍ୱତନ୍ତ୍ର ଟିମ୍ ଗଠନ କରିଥିଲା।
ପୋଲିସ କଲ୍ ଡିଟେଲସ୍ ରେକର୍ଡ (ସିଡିଆର) ଓ ଇଣ୍ଟରନେଟ୍ ପ୍ରୋଟକଲ (ଆଇପି) ଟ୍ରେସ୍ କରି ଲଗାତାର ବି.ଭଗୀରଥ ସାଇକୁ ପିଛା କରୁଥିଲା। ଯେତେବେଳେ ପୋଲିସ ଚାରିଆଡୁ ଘେରି ଯାଇଥିଲା ସେତେବେଳେ ମୁକୁଳିବାର ବାଟ ନ ପାଇ ବି.ଭଗୀରଥ ଆତ୍ମ ସମର୍ପଣ ପାଇଁ ଓକିଲ ଟିମ୍ ସହିତ ପହଞ୍ଚିବାକୁ ନିଷ୍ପତ୍ତି ନେଇଥିଲା। ତେବେ ତା ପୂର୍ବରୁ ପୋଲିସ୍ ତାକୁ ଗିରଫ କରିଥିବାର ଦାବି କରୁଛି। ତେବେ ତାଙ୍କ ପିତା ଏକ ସୋସିଆଲ ମିଡିଆ ପୋଷ୍ଟ କରି ପୁଅକୁ ଆତ୍ମସମର୍ପଣ କରାଇଥିବା ଦାବି କରୁଛନ୍ତି।
ଏହି ପୁରା ପ୍ରକରଣ ଜଣେ ୧୭ ବର୍ଷ ବୟଷ୍କା ନାବାଳିକା ପ୍ରତି ଯୌନ ଉତ୍ପୀଡ଼ନ ଭଳି ଗୁରୁତର ଅଭିଯୋଗ ସମ୍ପର୍କିତ। ଏ ନେଇ ପେଟବଶିରବାଗ ପୋଲିସ ଥାନାରେ ରୁଜୁ ଏତଲା ଅନୁସାରେ ପୋଲିସ ଭାରତୀୟ ନ୍ୟାୟ ସଂହିତା ଧାରା ୭୪ ଓ ୭୫ ସହିତ ପକସୋ ଆଇନର ଧାରା ୧୧ ଓ ୧୨ରେ ମୋକଦ୍ଦମା ରୁଜୁ କରାଯାଇଛି। ପୋଲିସ ଅନୁସାରେ ମାମଲାରେ ପୀଡ଼ିତା ଓ ଅଭିଭାବକଙ୍କ ବୟାନ ରେକର୍ଡ ହେବା ପରେ ଆହୁରି କଠୋର ଧାରା ସଂଯୁକ୍ତ କରାଯାଇଛି।
