ମାଲକାନଗିରି/ପଡ଼ିଆ,୨୪ା୧: (ଦୁର୍ଯ୍ୟୋଧନ ପାତ୍ର / ଭାସ୍କର ରାଓ): ମାଲକାନଗିରି ଜିଲା ପଡ଼ିଆ ଥାନା ଅଞ୍ଚଳରେ ଏକ ଦୁଃଖଦ ଘଟଣା ଦେଖିବାକୁ ମିଳିଛି। ସ୍ତ୍ରୀଙ୍କ ବେକ କାଟି ହତ୍ୟା କଲା ପରେ ସ୍ବାମୀ ନିଜେ ଗଳା କାଟି ଆତ୍ମହତ୍ୟା କରିଛନ୍ତି।
ସୂଚନାନୁଯାୟୀ, ଛତିଶଗଡ଼ ସୁକୁମା ଜିଲା କୁଣ୍ଟା ଗ୍ରାମର କୋଣ୍ଡା ବାବୁ (୩୮) ଓଡ଼ିଶା ମାଲକାନଗିରି ଜିଲା ପଡ଼ିଆ ସଦରମହକୁମା ଗ୍ରାମର ପେଦି ପଦ୍ମାରାଓଙ୍କ ଝିଅ ବେଣୁ ପେଦିଙ୍କୁ କିଛିବର୍ଷ ପୂର୍ବରୁ ବିବାହ କରିଥିଲେ। ସ୍ତ୍ରୀ ବେଣୁ (୩୨) ନିଜ ବାପଘରେ ପଡ଼ିଆରେ ଆସି ରହୁଥିଲେ। ମଙ୍ଗଳବାର ରାତିରେ ସ୍ବାମୀ କୋଣ୍ଡା ବାବୁ ଶ୍ୱଶୁର ଘରକୁ ଆସିଥିବା ବେଳେ ଶ୍ୱଶୁର ଘରେ କେହି ନ ଥିବା ସମୟରେ ସ୍ବାମୀ ସ୍ତ୍ରୀଙ୍କ ମଧ୍ୟରେ କୌଣସି କାରଣରୁ ଝଗଡ଼ା ହୋଇଥିଲା। କୋଣ୍ଡା ବାବୁ ଭାରସାମ୍ୟ ହରାଇ ଏକ ଧାରୁଆ ଛୁରିରେ ସ୍ତ୍ରୀଙ୍କ ବେକ କାଟି ଦେଇଥିଲେ। ଫଳରେ ଘଟଣାସ୍ଥଳରେ ସ୍ତ୍ରୀ ବେଣୁଙ୍କ ମୃତ୍ୟୁ ଘଟିଥିଲେ। ପରେ କୋଣ୍ଡା ବାବୁ ନିଜ ବେକକୁ ଛୁରି ଦ୍ୱାରା କାଟି ଦେଇଥିଲେ।ଘଟଣା ସମ୍ପର୍କରେ ପଡ଼ିଶା ଲୋକ ଜାଣିଲା ପରେ କୋଣ୍ଡା ବାବୁଙ୍କୁ ପ୍ରଥମେ ପଡ଼ିଆ ଡାକ୍ତରଖାନା ଓ ପରେ ମାଲକାନଗିରି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ତେବେ ଆଜି ଚିକିତ୍ସାଧୀନ ଅବସ୍ଥାରେ ସ୍ବାମୀ କୋଣ୍ଡା ବାବୁଙ୍କ ମୃତ୍ୟୁ ଘଟିଛି। ପଡ଼ିଆ ପୋଲିସ ଘଟଣାସ୍ଥଳକୁ ଯାଇ ସ୍ତ୍ରୀଙ୍କ ମୃତଦେହ ଜବତ କରିବା ସହ ଆଜି ମାଲକାନଗିରିରେ ସ୍ବାମୀଙ୍କ ମୃତଦେହ ବ୍ୟବଚ୍ଛେଦ ପରେ ଦମ୍ପତିଙ୍କ ମୃତଦେହକୁ ପରିବାରକୁ ହସ୍ତାନ୍ତର କରିବେ ବୋଲି ଜଣାପଡ଼ିଛି। ଏ ସମ୍ବନ୍ଧରେ ପଡ଼ିଆ ପୋଲିସ ଏକ ମାମଲା ରୁଜୁ କରି ଘଟଣା ତଦନ୍ତ ଜାରି ରଖିଛି।
