ନୟାଗଡ଼/ରଣପୁର,୧୯।୧୦(ଲୋକନାଥ ମିଶ୍ର/ ସୁକାନ୍ତ କିଶୋର ଡାକୁଆ)ବର୍ଷା ନ ଥିବାରୁ ଧାନ ଜମି ଶୁଖିଲା ପଡିଛି। ପାଖରେ ଜଳସେଚନ ସୁବିଧା ଥାଇ ବି ଜମିରେ ପାଣି ମାଡୁନି । ଏଭଳି ସ୍ଥଳେ ବୁଧବାର ଶତାଧିକ ଚାଷୀ ଉତ୍ତେଜିତ ହୋଇ ନୟାଗଡ଼ ଜିଲା ରଣପୁର କ୍ଷୁଦ୍ର ଜଳସେଚନ ବିଭାଗର ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ଘେରିଥିଲେ । ଜମିକୁ ଭେଟବର ବନ୍ଧରୁ ପାଣି ଛାଡିବାକୁ ନାରା ଦେଇଥିଲେ । ଚାଷୀ ଆନ୍ଦୋଳନକୁ ଏଡାଇବା ପାଇଁ କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ଭେଟବର ବନ୍ଧରୁ ସ୍ବଳ୍ପ ସମୟ ପାଇଁ ପାଣି ଛଡା ହୋଇଛି। ଜମିରେ ପାଣି ମାଡ଼ିବା ପରେ ଚାଷୀମାନେ ଧାରଣାରୁ ହଟିଥିଲେ ।
ଅଭିଯୋଗ ଅନୁଯାୟୀ, ଭେଟବର ବନ୍ଧ ପାର୍ଶ୍ୱବର୍ତ୍ତୀ ଅଞ୍ଚଳରେ ରଣପୁର ବ୍ଳକର ହଂସରା, ଆନନ୍ଦପୁର, କୃଷ୍ଣାଦେଇପୁର, ଟାଙ୍ଗିସାହି, ନୂଆସାହି, ଗୋପାଳପୁର, ବରମୂଳ, ନରସିଂହପୁର, ନାଟିମୀ, ସାମନ୍ତରାପୁର, ନିହଲ ପ୍ରସାଦ ଗଁା ସମେତ ରଣପୁର ଏନ୍ଏସିିର ମାର୍ଥ ପଦର, ପାମ୍ପଡା, ଜୟପୁର, ଭୋଇସାହି, ବଳଭଦ୍ରପୁର, ଆରଡା ଆଦି ଗଁାର ୧୫ ହଜାରରୁ ଊର୍ଦ୍ଧ୍ୱ ଚାଷୀଙ୍କର ଜମି ରହିଛି । ଏହି ଜମି ଖରିଫ ଋତୁରେ ଫାଟିବାକୁ ଯାଉଥିବାବେଳେ ଭେଟବର ବନ୍ଧରୁ ଧାନ ଜମିକୁ ଜଳସେଚନ ନ ହେବାରୁ ଚାଷୀ ଉତ୍ତେଜିତ ହୋଇ ପ୍ରତିବାଦ କରିଥିଲେ । ଜମିରେ ପାଣି ନ ମାଡ଼ିଲେ ଧାରଣା ହଟିବନି ବୋଲି ଦାବି କରି ଆନ୍ଦୋଳନକୁ ତ୍ୱରାନ୍ବିତ କରିଥିଲେ। ଏନେଇ କେତେଜଣ ଚାଷୀ କହିଛନ୍ତି, ବ୍ୟାଙ୍କ ସୋସାଇଟି ଓ ଧାର କରଜ, ସୁନା ବନ୍ଧକ ରଖି କୃଷି ଋଣ ଆଣିଛୁ । ଧାନ ଫୁଲ ଉଠାଇବା ସମୟରେ ମୌସୁମୀ ଗାଏବ ହୋଇଯାଇଛି । ଏଭଳିସ୍ଥଳେ ଚାଷୀ ଓ ଚାଷ ପାଇଁ କ୍ଷୁଦ୍ର ଜଳସେଚନ ବିଭାଗ ପଦକ୍ଷେପ ନ ନେବାରୁ ଆନ୍ଦୋଳନର ରୂପ ନେଇଥିଲା।
