କଟକ,୨୨ା୯(ସୁପ୍ରିୟା ପ୍ରିୟଦର୍ଶିନୀ): ଏପ୍ରିଲ ପୂରି ସେପ୍ଟେମ୍ବର ସରିବାକୁ ବସିଲାଣି। ହେଲେ କାର୍ଯ୍ୟକ୍ଷମ ହୋଇପାରିଲା ନାହିଁ ଛତ୍ରବଜାର ଅର୍ବାନ ହାଟ। ଏପରିକି ଚଳିତ ମାସ ୧୬ ତାରିଖରେ ଏହାକୁ ଉଦ୍ଘାଟନ କରାଯାଇଥିଲା। ଲୋକାର୍ପଣ ହେବାର ୫ ଦିନ ପରେ ବି ଅର୍ବାନ ହାଟ କାର୍ଯ୍ୟକ୍ଷମ ହେଲା ନାହିଁ। ଅପରପକ୍ଷରେ ସ୍ଥାୟୀ ଏବଂ କଂକ୍ରିଟ ପିଣ୍ଡିିରେ ବସି ବେପାର କରିବା ଲକ୍ଷ୍ୟରେ ଥିବା ପରିବା ବ୍ୟବସାୟୀ ବର୍ତ୍ତମାନ ପର୍ଯ୍ୟନ୍ତ ଅନ୍ଧାରରେ। କାରଣ ଏକ ହଜାରରୁ ଅଧିକ ବ୍ୟବସାୟୀ ଥିବାବେଳେ ନିିର୍ମାଣ ହୋଇଥିବା ୫୫୦ ପିଣ୍ଡି କାହାକୁ ମିଳିବ ତା ସ୍ଥିର ହୋଇପାରିନାହିଁ। ସେଥିପାଇଁ ପିଣ୍ଡିଟିଏ ପାଇବା ପାଇଁ କେତେ ଦେୟ ଦେବାକୁ ହେବ, ହାଟ ଭିତରକୁ କେବେ ବ୍ୟବସାୟୀ ଯିବେ, ତାର ଠିକ୍ ସୂଚନା କାହା ପାଖରେ ନାହିଁ। ତେବେ ଏହାକୁ ନେଇ ବ୍ୟବସାୟୀ ମହଲରେ ଅସନ୍ତୋଷ ତେଜିବାରେ ଲାଗିଛି।
ଛତ୍ରବଜାର ପରିବା ମାର୍କେଟ ଏବେ ସ୍ମାର୍ଟ ଅର୍ବାନ ହାଟର ରୂପ ଦେବା ପାଇଁ ସିଏମ୍ସି ପକ୍ଷରୁ ପ୍ରାୟ ୩ କୋଟି ଟଙ୍କା ଖର୍ଚ୍ଚରେ ଏହାକୁ ନିର୍ମାଣ କରାଯାଇଛି। ହାଟରେ ୫୫୦ ଜଣ ପରିବା ବ୍ୟବସାୟୀଙ୍କ ବସିବା ପାଇଁ ବ୍ୟବସ୍ଥା ହୋଇଛି। ତାଳଦଣ୍ଡା କେନାଲର ମୁଖ୍ୟ ରାସ୍ତା ପାର୍ଶ୍ୱରେ ନିର୍ମିତ ଏହି ସ୍ମାର୍ଟ ହାଟକୁ ପ୍ରବେଶ ପ୍ରସ୍ଥାନ ପାଇଁ ତିନୋଟି ମୁଖ୍ୟ ବାଟ ରହିଥିବା ବେଳେ ହାଟ ଆଗରେ ଦୁଇଚକିଆ ଗାଡ଼ି ପାର୍କିଂ ବ୍ୟବସ୍ଥା କରାଯାଇଛି। ହେଲେ ଚାରିଚକିଆ ଗାଡ଼ି ପାର୍କିଂ ବ୍ୟବସ୍ଥା କରାଯାଇ ନ ଥିବାରୁ ଆଗକୁ ଏହାକୁ ନେଇ ହୁଏତ ଟ୍ରାଫିକ ସମସ୍ୟା ଉପୁଜିବାର ସମ୍ଭାବନା ରହିଛି। ରେଭେନ୍ଶା ବିଶ୍ୱବିଦ୍ୟାଳୟର ପୁରୁଣା କ୍ବାର୍ଟର୍ସର ପ୍ରାୟ ତିନି ଏକରରୁ ଅଧିକ ଜାଗାକୁ ୭ଫୁଟ ପୋତାଯାଇ ଏହି ସ୍ମାର୍ଟ ହାଟ ନିର୍ମାଣ କରାଯାଇଛି। ସ୍ମାର୍ଟ ହାଟ ଭିତରେ ୩୫ଟି ବ୍ଲକ କରାଯାଇ ପିଣ୍ଡି ହୋଇଛି। ଏହି ପିଣ୍ଡିଗୁଡ଼ିକରେ ପ୍ରାୟ ୫ଶହ ପରିବା ବ୍ୟବସାୟୀ ବ୍ୟବସାୟର ସୁଯୋଗ ପାଇବେ। ହେଲେ ପିଣ୍ଡି ସଂଖ୍ୟାଠାରୁ ଛତ୍ରବଜାରରେ ପରିବା ବ୍ୟବସାୟୀଙ୍କ ସଂଖ୍ୟା ଦୁଇଗୁଣ ରହିଛି। କାହାକୁ ପିଣ୍ଡି ମିଳିବ, କିଏ ବ୍ୟବସାୟ କରିବ ତାହା ବର୍ତ୍ତମାନ ପର୍ଯ୍ୟନ୍ତ ସ୍ପଷ୍ଟ ହୋଇପାରି ନାହିଁ। ସେହିପରି ଗତ ଏପ୍ରିଲରେ ହାଟ କାର୍ଯ୍ୟକ୍ଷମ ହେବ ବୋଲି ସିଏମ୍ସି ପକ୍ଷରୁ କୁହାଯାଇଥିବା ବେଳେ ଲୋକାର୍ପଣ ପରେ ମଧ୍ୟ ଏହା ଚାଲୁ ହୋଇପାରିଲା ନାହିଁ। ଏହାକୁ ନେଇ ଚାଷୀ ଏବଂ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ତେବେ ଛତ୍ରବଜାର ରାସ୍ତାକଡ଼ରେ ବସୁଥିବା ଅନେକ ଚାଷୀ ଏବଂ ବ୍ୟବସାୟୀଙ୍କୁ ଥଇଥାନ କରିବା ଲାଗି ଅର୍ବାନ ହାଟର ପରିକଳ୍ପନା କରାଯାଇଥିଲା। ଯେଉଁଥିଲାଗି ୨୦୧୯ ମସିହାଠାରୁ ପ୍ରକ୍ରିୟା ଆରମ୍ଭ ହୋଇଛି। ହେଲେ ଗତ ୩ବର୍ଷ ଭିତରେ ଏ ନିଷ୍ପତ୍ତି ହୋଇପାରିନାହିଁ, ଯେ ଅର୍ବାନ ହାଟର ପ୍ରକୃତ ହିତାଧିକାରୀ କିଏ ହେବ। ତେଣୁ ଏହାର କାର୍ଯ୍ୟକାରିତା ଓ ସଫଳତା ନେଇ ପ୍ରଶ୍ନ ଉଠିଲାଣି।
